Mat 14
a14:1 Mak 6:14-29; Luk 9:7-9
 
Mat 14
b14:13 Mak 6:30-44; Luk 9:10-17; Sion 6:1-14
 
Mat 14
c14:22 Mak 6:45-52; Sion 6:15-21
 

Matthew 14

Matien Onen Sion Baptis a 

En avong enek, Asuv Herod Antipas koa losil kat provins ten out Kaleli raengon longlongien keil usil tounah koa Iesu mul mumoni. Sakini, viteni min hetetamen keil onen vit, “Iesu enek vi Sion Baptis varei. Avaseini kei mat, ka moul eris ran matien. Ven koanik, kei mul mumon merikel keil.”

Asuv houlu Herod Antipas mundemko mukok veni kei varei san ren keke meatin keil tavaeen onen uva avuli kat Sion, apar kati, ka alingi en eim takeih. Kei vuroh kat Sion veni navong venan Herodias, ahin onen Pilip, koa vi tunali, Sion selus keih mini vit, “Sakien onom tisa ka rali koteh mengkatien onen Ahi.” Ka avaseini Herod vit vouas Sion vamat, kei romumontei veni metaun vurohien onen meatin keil veni amundemi keke Sion Baptis vi provet tai.

Ka en avong mal ten avong avasi asuv houlu Herod eni, amumon mari ale tai ka natnahin Herodias vol veni en meten meatin vasi keil. Sakini Herod si mok ka mumon hatkatien takeih min atouli enek keke hesani mini asa varei hehisi. Sakini, atouli enek va ven mama onen ka selus mini. Evus, mai ris ka viteni min asuv houlu Herod vit, “Kei tinek, ekvati keke ku vini Sion Baptis. Evus, kisan vatin minau en out enek en tere tai.” Navong Herod longe, kei longe tisa vis tisa mok. Avaseini enrovattei vou vini Sion, kei san ren keke meatin keil onen avoum vousil envatien onen atouli enek. Enrovattei vamemou en meten meatin keil veni alonge mumon hatkatien takeih tuai. 10 Sakini meatin keil onen uva en eim takeih, ka ara koteh vatin Sion ran teiai onen. 11 Navong amumoni evus, aling vatin Sion mul en tere tai, ka akuri asani min atouli enek koa kuri suk va ven mama onen. 12 Navong meatin keil onen Sion alonge keke mat, umai avus teiai onen va, ka arahini. Evus, uva avit meseni min Iesu.

Iesu Vengan Meatin Keil Tousan Elim (5000) b 

13 Navong Iesu raengon longlongien keke Sion mat, kei vut en vot ral min onen keil keke avalis uva en out seh tai koa meatin keil tovuol ien. Ka navong meatin keil araengoni, keil aka en taon keil one ka akaka amusili. 14 Sakini navong Iesu mea ran vot, kei les marmari vangi meatin keil amul arosini tuai. Navong les keil, enmahis keil ka sak revi koakeil one amesai.

15 Ka navong meteiai mul munu, meatin keil onen Iesu umai veni ka aviteni avit, “Out ekek vi out seh neli ka out mul vong ke. Tahos keke kisila marmari vangi meatin keil ihaha keke akilea avaha en meteimal keil ka avahul tei anien ae.”

16 Ka Iesu viteni min onen keil vit, “Ronasila lattei keil anahaha. Kami varei mihesan tei anien min keil iani.”

17 Ka avit kesi mini avit, “!Ei! ?Mehoumoni hemukave veni anien ar rovinvintei? Ekek, veret elim enges, ka mesau mun elu enges.”

18 Ka Iesu viteni vit, “Alkuri vamai minau.” 19 Evus, kei viteni min mamari vangi meatin keil keke avatondan en more out koa oumunai mul ien. Navong arondan evus, kei kur veret koa heite elim ka mesau elu, seipat vina nesa, ka san masmasien min Ahi veni. Evus, kei vul vahas veret keil ka sani min meatin keil onen keke avatiti veret enek vatal min mesau vaha min marmari vangi meatin keil. 20 Ka meatin keil vasi akanian ka vange vil revi. Ka navong meatin keil onen Iesu uva ris keke avakur soke anien, veiat teindan elu (12) vil mules. 21 Ka en avong enek, amo keil koa akanian rokol tousan elim (5000). Ka ahin ka titiali keil arvulitei keil.

Iesu Mual en Oai c 

22 Navong akanian evus, Iesu viteni min meatin keil onen keke ilamu eni, iha en usi mari oai Kaleli. Ka kei enges ro vasila mamari vangi meatin keil uvahaha. 23 Navong sila meatin keil evus, kei mual vina nesa en vatihou tai kei sasen enges keke vahis. Ka navong vongien emai, Iesu enges ro en out enek. 24 Ka kei les vot mul luhu en mari oai Kaleli ka onen keil avotini keih avahalis veni avisu min eang takeih tai.

25 En menaouilan, out romulantei mau, Iesu mai ven keil, mul mual en oai suval mual en atan. 26 Ka navong meatin keil onen alesi mul mual en oai, keil ametau varei ka amis kai avit, “!Ei, ninin tai keinek!”

27 Ka hatte tas, Iesu selus min keil vit, “!Mihekeih! !Inau netin keinek! !Minametautei!”

28 Ka Pita vit kesi mini vit, “!Asuv, munak keik anatin, kihiteni minau mual en oai mahat venuk!”

29 Ka Iesu viteni mini vit, “!Amai!”

Sakini Pita mea ran vot ka mual en oai va ven Iesu.
30 Ka navong les tahe keil amariso ka longe keke eang muhuh keih, Pita metau ka mul visair vita en oai. Navong lesi mukok, kei mis kai vit, “!Asuv, kikataunau li!”

31 Hatte tas, Iesu san hen vuli kati ka vit, “!Demkatien onom havivi ramat! ?Vensa kormundesintei nau?”

32 Ka navong keilu luvut luva en vot, eang va netan. 33 Navong alesi mukok, meatin keil koa amul en vot uva netan min Iesu ka aviteni mini avit, “!O anatin eli, keik varei kovi Natin Ahi!”

34 Evus, keil amules amu koteh mari oai Kaleli va vio ... arokol ut en out Kenesaret. 35 Ka navong meatin keil ten out enek alei kilea en Iesu, asan selusien muloh rahit out vasi keil vesesal. Sakini, meatin keil alah koakeil vasi amesai umai ven Iesu 36 ka apeahi vamaen koakeil amesai avatokol kele eisin omon enges. Ka keil vasi koa arokoli, mesaien one va ran keil.

Copyright information for `PMA