Mat 15
a15:1 Mak 7:1-23
 
b15:13 Aes 60:21
Mat 15
c15:21 Mak 7:24-30
 
Mat 15
d15:29 Mak 8:1-10
 

Matthew 15

Iesu Visein Meatin Keil en Asa koa Hesakin Meatin Heto Vuo Hermutotei en Meten Ahi a 

En avong tai, Farasi keil ka tiser keil ten Mengkatien onen Mosis aka Serusalem umai ka avis Iesu avit, “?Vensa meatin keil onom armusil kattei sakien keil koa elda keil orer telamu asani minir? !Veni onom keil arkastei he en sise koa muto, ka mukos, akanian!”

Iesu vit kesi min keil vit, “?Ka vensa varei kami mirali koteh mengkatien onen Ahi varei keke mikilea mimusil hihiseien onami enges? Veni Ahi viteni vit,'Mihehouhou min tata ka mama onami keil.'(Eks 20:12) Ka vit risi vit,'Meatin koa hesili tata vuo mama onen, kei uasi hemat'.(Eks 21:17) Ka kami, mivihisein meatin keil keke akilea aviteni min tata ka mama one avahit, 'Tounah keil onak koa nakilea makataun kamil eni, koanek naling koe tuai vi onen Ahi enges.' Sakini, mivihisein meatin keil enek keke anahouhoutei mun min tata one vatal min tounah keil one. Sakini, hihiseien keil onami mul mumon selusien keil onen Ahi mai vi heisav enges. !Kami mimutolas en hilivemi enges! Asa koa Ahi viteni usil kami ka en provet Aesea mal koa vit,

'Meatin keil ekek avouhou minau ral min selusien keil one,
ka tine mul soutin ranau.
Avaseini keil uva netan minau,
ekrovattei mailea.
Veni amul avisein meatin keil en hihiseien keil koa ka en meatin keil enges,
ka aviteni min keil keke avi hihiseien keil kati onak!' “(Aes 29:13)

10 Evus, Iesu viles ka vise vangi meatin keil umai veni ka viteni min keil vit, “!Mihetaengon revi keke mivailea! 11 Rovitei tounah koa va neim en ongon meatin vasakini kei varmutotei en meten Ahi. !Vuo, sakras! Ka selusien koa mea ran ongon, kei enges kilea vasakin meatin varmutotei en meten Ahi.”

12 Navong alokovein meatin keil, meatin keil onen umai ven Iesu ka aviteni mini avit, “?Keik kokilea keke Farasi keil avuroh katuk navong along selusien onom?”

13 Iesu vit kesi vit, “Farasi keil enek asuval vatiai keil koa Tata onak en out nesa roluhtei, b  iahut lati hetal lite keil teni. 14 Mihelokovein keil iles. Keil asak visi avalamun meatin sav keil ka avi metovar enges. Ka munak metovar tai helamun metovar tamun, keilu vasi luhemotmot luhehita en vulvul tai.”

15 Ka Pita viteni mini vit, “Kihit kilea aneite ten tatavolien koanek min komai li.”

16 Evus, Iesu vis keil vit, “?!Kami emun, mirkileatei veah!? 17 ?Mirkileatei keke tounah vasi koa va en ongomi vitas en vangomi, ka evus, mul mea ran avemi keke hehas hehi tahul? 18 Ka tounah koa miselus eni ral min ongomi kistal en tinomi, ka keil varei amul amumon meatin romutotei en meten Ahi. 19 Veni navong tin meatin tisa, kei kilea voumon vati sakien keil ekek: mundem usil tounah tatisa keil, mu vini meatin sav keil, mul venan ahin sav, mul mum tisa ral min ahin sav keil, mul venan tounah, mul luvos meatin sav keil en kot, ka mul purun isen meatin keil. 20 Sakien keil enek mul sakin meatin romutotei en meten Ahi. Ka munak meatin rokastei hen en sise koa muto mulamu en avong taanianien, koanek rosakintei meatin enek vamai varmutotei.”

Demkatien Onen Ahin Tai koa Rovitei Siu c 

21 Evus, Iesu lokovein out enek ka va vesesal en meteimal keilu ten out Taer ka Saedon. 22 Ka ahin Kenan tai koa ro en out enek, mai veni ka peahi vit, “!O asuv eli, Natin Deved! !Emhemahis nau li! Ninin tisa tai mul en natukahin ka mul vareis puruni.”

23 Ka Iesu roviten etai selusien mini. Sakini meatin keil onen Iesu umai veni ka aviteni mini avit, “Kisila lat ahin enek heha veni kei mules visohiso keih ven ir.”

24 Sakini viteni min ahin enek vit, “Ahi sila nau keke numai ven me-Isrel keil enges koa asuval sipsip keil koa avuol.”

25 Ka ahin Kenan enek mai ka reteingeril veni ka peah risi keih vit, “!O Asuv, kikataunau li!”

26 Ka kei vit kesi mini vit, “Romaltei keke avakur anien an titiali keil ka avasonis vaha min huli keil.”

27 Ka ahin vit kesi mini vit, “Asuv, koanek anatin eli. Ka huli keil emun koa amul rahiti akilea avan soke anien koa asuv one kan rani.”

28 Evus, Iesu viteni mini vit, “!Ei mama! !Demkatien onom mariso! Asa koa kovis inau eni, kei hekistal hehi anatin.” Ka hatte tas, natnahin mai ris tahos.

Iesu Vengan Meatin Keil koa Mulin Tousan Ehat (4000) d 

29 Navong Iesu lokovein taon enek, kei ka onen keil uva amusil vali oai Kaleli. Ekonek, avina en usi hou tai ka arondan. 30 Ka mamari vangi meatin keil umai veni ka alah leimesai keil one: koakeil asakras avoual, metovar keil, koakeil ale kalkali, koakeil avi ameng, ka houlu emun koa amesai en mesaien savsav keil. Alah keil ka aling retai en keil vesesal en alen Iesu, ka kei sak revi keil vasi. 31 Ka navong meatin keil ales asa koa mumoni, amutimanen houlu veni koakeil avi ameng, aselus; koakeil ale kalkali, umai ris atahos; koakeil asakras avoual, amual; ka metovar keil, alele. Navong alesi, amasmas Ahi onen me-Isrel keil veni.

32 Evus, Iesu vise ruain meatin keil onen ka viteni min keil vit, “Ekmahis meatin keil ekek veni keil aro ral minau avong etel tuai ka anien ae tovuol. Ekrovattei masila lat keil avahaha ris teim ose navong amai kat keil, veni vahesa ave hememerau ka mete hemalikelik en sise.”

33 Ka meatin keil onen avisi avit, “!Ka romul en out volvol! ?Rehehotin anien en out kave keke rokilea rovahengan marmari vangi meatin keil ekek?”

34 Iesu vis keil vit, “?Veret ehis mikur kati?”

Avit kesi avit, “Heiti oulu (7) enges ka titi mesau vahis.”

35 Sakini Iesu viteni min mamari vangi meatin keil keke avatontan en atan. 36 Navong arondan evus, Iesu kur veret oulu (7) ka mesau vahis ka san masmasien min Ahi veni. Evus, kei vul vahasi ka sani min meatin keil onen keke avatiti vaha min meatin keil. 37 Ka keil vasi akanian ka vange vil revi. Ka navong meatin keil onen Iesu uva ris keke avakur soke anien keil, veiat oulu (7) vil mules. 38 Amo keil koa akanian en avong enek arokol tousan ehat (4000). Ka arvuli lattei ahin ka titiali keil. 39 Ka navong Iesu sila marmari vangi meatin keil uvahaha, kei ka onen keil uvut en vot ka uva en out koa avise en Makatan.

Copyright information for `PMA