Mat 17
a17:1 Mak 9:2-13; Luk 9:28-36
 
Mat 17
c17:14 Mak 9:14-29; Luk 9:37-43
 

Matthew 17

Mosis ka Ilaetsa Lumai Luselus ral min Iesu ka Aven Viles ka Vilahil a 

Avong ahetai (6) muli va, Iesu kur Pita, Tiemes ka tunali koa Sion telmusili ka mulamu en keitel telvina nesa en mari vatihou tai, en out koa keitel telro saseatel enges. Ekonek, tellele telles aven Iesu viles. Veinan vihil suval meteiai, ka eisin omon vilahil muoh vis muoh suval laet. Evus, telmali telles Mosis ka Ilaetsa lumul luselus ral min Iesu.

Navong Pita les keilu, viteni min Iesu vit, “!Asuv, tahos imok keke komaitel metro ekok! Munak keik emhehati, numon votevav hetel: tai onom, tai onen Mosis, ka tai onen Ilaetsa.”

Ka navong Pita mul veah selus, mahmah tai koa vihil mai mutaluh koe keil, ka along rea tai ka eni koa vit, “Koanik vi Natkuli kati ka envatien onak mul ien. Nasinau houlu veni. !Mithelong kati!”

Navong Pita keitel tellong rea enek, telmetau houlu ramat, telmotmot, ka naeatel vita rokol atan. Navong telmul veah netan, Iesu mai, rokol keitel, ka viteni vit, “Telmea. Mitnametautei.” Ka navong tellele vina nesa, telroles etai mun meatin, Iesu enges ro ral min keitel.

Navong telmita ris netan ran vatihou enek, Iesu meng kat keitel vit, “Mitnahitentei tounah koa mitlesi min etai meatin hetokol avong koa inau, Natin Meatin, nimoul eris ran matien.”

10 Ka telmali telvisi telvit, “?Vensa tiser keil ten Mengkatien onen Mosis aviteni keke Ilaetsa hemae helamu en Kristo koa Ahi vat kati?”
17:10 Mal 4:5


11 Iesu vit kesi vit, “Anatin keke Ilaetsa hemae ka hesak mesen meatin keil ven amaien onen Kristo. 12 Ka naviteni min kami keke Ilaetsa mai tuai ka meatin keil arlei kileatei. Keil amum tisa mini suval koa evati. Ka en vati sakien enek, inau, Natin Meatin, emun nikur mahien en hen meatin keil.” 13 Navong Iesu viteni mukok, keitel tellong kilea suk keke mul selus min keitel usil Sion Baptis.

Iesu Sak Revi Ehon Tai koa Ninin Tisa Mul Ien c 

14 Navong Iesu keitel telsuvul ran vatihou enek, telvisu en vangi meatin keil. Ka meatin tai mai ven Iesu, reteingeril mini 15 ka vit, “Asuv eli, emhemahis natkuli veni kei kur mesaien leimatmat ka mahien onen tisa mok. Avong houlu kei mot va en ahang vuo en oai. 16 Ka nakuri mai ven meatin keil onom ka asakras avasak revi.”

17 Navong longe mukok Iesu viteni vit, “!Ekovei! !Kami meatin keil ten avong kosa, mikalkali ka demkatien onami tovuol vareis! ?Nito hetal kami hetokol nengeis? Avek mah en kami koa demkatien onami tovuol. Alkur ehon vamai venau ekok.” 18 Ka navong Iesu les ehon enek, vile lat ninin tisa koa mul ien ka va rani. Hatte tas, ehon enek mai ris tahos.

19 Katau, navong meatin keil onen Iesu aro ral mini keiles, umai veni ka avisi avit, “?Vensa varei komai mesakras mevahile lat ninin tisa enek vaha?”

20 Ka Iesu vit kesi min keil vit, “Veni demkatien onami havivi ramat. Anatin eli naviteni min kami, munak mikur kat demkatien koa havivis suval titi uti mastard, mikilea mivahiteni min vatihou enek mivahit, 'Kimea ran out ekok ka kiha ke va', ka kei heha. Munak demkatien onami mul, tounah tovuol vakeih mivoumoni.” 21 
17:21 Mulamu, navong meatin keil amutis ris leta koanik onen Matiu, keil koa aling selusien koanik mul ien koa vit, “Hisien ka sakien ten aval en anien enges kilea vasakin vati ninin tisa enek vamea ran meatin.”


22 Amea ran out enek ka amual uva en provins ten out Kaleli. Ka navong amul amual, Iesu viteni min onen keil vit, “Hervitei tuetin, inau, Natin Meatin, isa lat nau niha en hen meatin keil ten out netan. 23 Keil uas nau nimat, ka en avong hetel teni, nimoul eris ran matien.” Navong meatin keil onen alonge mukok, amundemko houlu.

Iesu Vul Takis ten Eim Votut Ka en Merikel Tai

24 Avong tai, Iesu ka meatin keil onen amual ka akistal en taon ten out Kapaniam. Ekonek, meatin keil koa alah mane ten takis
17:24 Meatin tai vuli drakma elu koa suval vatu tousan elu (2000 vt).
ten Eim Votut umai ven Pita ka avisi avit, “?Mukave? ?Tiser onom mul vul takis ten Eim Votut vuo rovultei?”

25 Ka Pita vit kesi min keil vit, “Anatin, kei mul vuli.”

Ka navong Pita va neim en eim onen, roselustei veah ka Iesu visi vit, “?Mukave Saemon Pita? ?Komundem sa? ?Asuv houlu keil ten out netan alah takis ka duti
17:25 Duti suval takis ten vat koa aling kati en tounah vasi koa akuri ran out sav.
ran isei? ?Alahi ran titae keil kati vuo alahi ran meatin sav keil?”

26 Ka Pita vit kesi mini vit, “Alahi ran meatin sav keil.”

Iesu viteni mini vit, “Hemukonek, titae keil kati arvultei takis.
27 Ka avaseini keke Ahi koa vi Asuv Houlu en tounah vasi vi Tata oralu, lehul takis ten Eim Votut onen veni rotahostei lovoumon meatin keil enek avalele vatisa en ialu. Sakini kiha en mari oai Kaleli ka kison huk onom. Mesau koa kisare helamu, kikoh vas ongon ka kihotin mane tai koa hevinvin en takis oralu. Kikuri ka kiha kisani min keil.”

Copyright information for `PMA