Mat 18
a18:1 Mak 9:33-37; Luk 9:46-48
 
b18:8 Mat 5:30; Mak 9:42
Mat 18
c18:10 Luk 15:3-7
 

Matthew 18

Iesu Vit Usil Isei vi Hetetamen Imok en Meten Ahi a 

En avong enek, meatin keil onen uva ven Iesu ka avisi avit, “?En hiasuvien onen Ahi, isei vi hetetamen imok?”

Iesu vise titiali tai ka mumoni mulomal en mete. Evus, viteni min keil vit, “Anatin eli naviteni min kami, munak mihervilestei rendemien onami keke mihemai mihesuval titiali keil, kami misakras mivaha en out koa Ahi vi Asuv Houlu ien. Sakini, koakeil amumon rendemien one va netan suval titiali koanik, keil ihi hetetamen imok en out koa Ahi vi Asuv Houlu ien. Ka meatin koa hekur revi titiali tai koa mukok en isok, hesuval koa kei mul kur revi inau.

“Ka munak meatin etai hesakin meatin tai koa musil kat nau suval titiali ekek hemot en tisaen, Ahi hesan mahien koa hetisa mok mini. Hetahos imok keke ipar kat mari ahat tai en hiren meatin enek ka imarinduni en huinev ten atas. !Anatin keke tounah koa hesakin meatin hemot en tisaen il imai, ka hetisa vis hetisa mok en koakeil avi sise teni!

b  “!En vati rendemien enek, munak tai en kami, hen vuo alen sakin kei mot en tisaen, heta kotehei ka hesoni heha! Hetahos imok mini keke hati usiven hetisa ka hekur moulien ten lisenges helin munak hen vasi keilu ka alen vasi keilu hetahos ka isoni heha en ahang koa sakras vamat. !Ka munak tai en kami, meten sakin kei mot en tisaen, hekis lati ka hesoni heha! Hetahos imok mini munak meten tai hevuol ka hekur moulien ten lisenges helin munak meten vasi keilu lumul ka isoni heha en ahang koa sakras vamat.”

Tatavolien Usil Sipsip Koa Vuol c 

10 Navong titiali enek mules mulomal en mete, Iesu viteni min meatin keil onen vit, “Mihelei kat revi kami keke minalei seseintei meatin keil koa amusil inau suval titiali koanik. Anatin eli naviteni min kami keke angelo keil one aro en meten Tata onak en out nesa, ka ihit lati mini munak meatin tai mul purun keil. 11 
18:10 Mulamu, navong meatin keil amutis ris leta koanik onen Matiu, keil koa aling kat vas 11 koa mul en Luk 19:10 emun koa vit,“Inau, Natin Meatin, numai keke malekat vati meatin keil koa avuol keke moutut moulien one.”


12 “?Kami mimundemi mukave? ?Munak meatin tai, sipsip osen keil avi handred tai (100) ka tai en keil vuol, houmon sa? ?Mimundemi keke helokovein sipsip sav keil osen koa avi hanumau ehat ka teindan ouhat emun (99) il en usi hou keke kilea vaha valekat sipsip koa vuol? !Anatin! 13 Ka anatin eli naviteni min kami, munak hehotini, kei hesi kei hemariso mok ven sipsip koanik mulin sipsip sav keil osen koa arvuoltei. 14 En vati sakien enek, Tata onami en out nesa ien rovattei etai meatin koa musil inau suval titiali koanik vavuol.”

Sakien Koa Vatalimal en Tumali koa Mum Tisa Va Katuk

15 Iesu mules selus min meatin onen keil usil tisaen keil vit, “Munak tumali mum tisa va katuk, keik kos kiha veni ka kitie mini asa koa mumoni romaltei va katuk. Munak kei hetaengonuk ka milhetalimal en usite onamil, keik kisik veni milheto hetahos eris. 16 Ka munak kei hertaengontei selusien onom, kiha ris veni hetal min meatin hetas vuo helu mun keke keilu luhelesi ka luheselus en usite onom keke kosak visi kovatalimal en kamil. 17 Ka munak tumali enrovattei vataengon kamitel, mithehitehiteni en meten meatin keil ten sios. Ka munak enrovattei vataengon meatin keil ten sios emun, mihelingi heha hae ka mihoumoni mini hesuval kei vi meatin koa rokileatei Ahi vuo meatin tisa tai suval koakeil alah takis.

18 “Anatin eli naviteni min kami, asa koa miring koe en out netan, Ahi ring koe tuai en out nesa, ka asa mimaeni en out netan, Ahi maeni tuai en out nesa.

19 “Anatin eli naviteni mun min kami keke munak elu en kami en out netan ekek milhemai en rendemien hetas usil tounah tai ka milhehis veni, Tata onak en out nesa hesan ui hisien onamil. 20 Veni navong meatin elu vuo etel telmai out tas en isok, inau namul en out enek ral min keitel.”

Tatavolien Usil Mahien koa Hekistal en Koakeil Enmahisien One Tovuol

21 Evus, Pita mai ven Iesu ka visi vit, “?Asuv, munak tuak onak mum tisa va kat inau, numon methos hetal mini avong hehis? ?Hetokol avong oulu (7)?

22 Iesu vit kesi vit, “Vuo, rovitei avong oulu (7), ka kumoni avong hehi oulu (7), hevus, avong hehi oulu mun (7), hevus, avong hehi oulu mun (7) heha vio ... kosakras kovahuli mun.
18:22 Vit, “kumoni hetokol komumoni avong oulu, ka kumoni humukonek avong hanumau etel ka halualim mun” (7 x 70).


23 “Nihit kilea en sakien koanek en tatavolien tai. Hiasuvien onen Ahi suval asuv houlu tai koa envati vasak revi en kaon onen eiloheh keil onen. 24 Navong mul sak revi kaon keil, amulamun meatin tai koa kaon onen mulin gol mane
18:24 Gol mane tas suval 1000 vatu. Koanek vi mari mane tai koa meatin sakras vahul lati.
milian halualim (10,000,000).
25 Ka veni sise tovuol keke meatin enek vahul kes kaon onen, asuv houlu onen meng kati keke avasalem en kei, ahin onen ka titaealu vasi keil avahi slev keil, ka avasalem en tounah vasi one emun. En sise koanek, asuv houlu vit mane teni hehul kes kaon onen.

26 “Navong meatin enek longe mukok, reteingeril en meten asuv houlu ka peahi keih vit, '!Auei li! !Kisani minau li avong havivi mun ka nihul kes tounah vasi koa mul en kaon onak!' 27 Ka asuv houlu enmahisi, sahulin kaon onen ral mini, ka maeni vamaluv vaha.

28 “Ka navong meatin enek va hae, kei visu min eiloheh sav onen asuv houlu koa kaon onen mul ral mini koa vi gol mane vahis enges. Ka meatin enek, kei kin kat hiren varei ka viteni mini vit, '!Kihul kes mane vasi koa kokuri ranau!'

29 “Ka eiloheh enek reteingeril en meten ka peahi keih vit, '!Auei li! !Kisani minau li avong havivi mun ka nihul kes tounah vasi koa mul en kaon onak!'

30 “Ka meatin enek seseini. Kei va suk ka son eiloheh enek va en eim takeih rokol avong kilea vahul lat kaon onen. 31 Ka navong eiloheh sav keil ales asa koa kur out, keil alonge tisa houlu ka uva ven asuv houlu one ka avit vasin tounah mini.

32 “Evus, asuv houlu vise meatin enek emai ris veni ka viteni keih mini vit, '!Keik kovi meatin tai onak koa kotisa vis kotisa mok! Navong kopeah nau keke ekhemahisuk, inau nasahulin kaon onom ka namaenuk kova maeis. 33 ?Sakini, vensa emromahistei eiloheh sav onak en vati sakien koa namumoni minuk?' 34 Asuv houlu tin kat meatin onen enek houlu, sakini sa lati vaha vakur mahien en hen meatin keil ten eim takeih hetokol avong hehul lat vasin kaon onen.

35 “Ka Tata onak en out nesa emun houmoni min kami vasi housil vati sakien enek munak mihermumontei methos hetal min tuami keil en tinomi.”

Copyright information for `PMA