Mat 19
a19:1 Mak 10:1-12
 
Mat 19
b19:13 Mak 10:13-16; Luk 18:15-17
 
Mat 19
c19:16 Mak 10:17-31; Luk 18:18-30
 

Matthew 19

Iesu Selus Usil Tasilien ten Tetaliheien a 

Navong Iesu selus en tounah keil enek evus, kei ka onen keil alokovein provins ten out Kaleli ka uva en provins ten out Sudea en usi Oaisal Sodan. Marmari vangi meatin keil amusili en out enek, ka kei sak revi keil.

En avong enek, Farasi keil koan umai veni keke avasak visi. Sakini avisi avit, “Hit visi min komai. ?Mengkatien orer maen meatin hetasil ran ahin onen ven rendemien vasi enges?”

Ka Iesu vit kesi min keil vit, “?Mukave, kami mirvulitei Tus Votut onen Ahi? Veni mul viteni keke mulamu, navong Ahi mumon tounah en out netan, kei'mumon meatin, tai vi meahos ka tamun vi ahin.'(Sen 1:27) Ka viteni mun vit,'Ven koanek, meahos hemea ran tata ka mama onen, ka heapil hetal min ahin onen, ka keilu luhetas.'(Sen 2:24) Sakini keilu lurovitei mun elu, ka lumai lutas. Sakini asa koa Ahi kap vituaini, meatin enges noumontei natasil.”

Ka Farasi keil avisi avit, “?Mukonek, vensa varei Mosis meng kati vit,'Meatin koa vit valokovein ahin onen, hesan Setifiket ten Tasilien mini, evus, kilea vasila lati?'(Dut 24:1)”

Ka Iesu vit kesi vit, “Mosis maen kami milokovein ahin keil onami veni vatumi keih ramat. Ka sakien enek tovuol en avong Ahi mum rohtoh en tounah vasi. Ka naviteni min kami keke meatin koa lokovein ahin onen, koa romatiltei ral min meatin sav tai, ka kur ahin sav, en meten Ahi, meatin enek mul mum tisa ral mini.”

10 Navong selus min keil evus, meatin keil onen Iesu aviteni mini avit, “Munak hemukonek en meatin hetal min ahin onen, hetahos imok keke meatin tai heto sasen ka hertetalihetei.”

11 Ka Iesu vit kesi min keil vit, “Rovitei meatin vasi koa kilea vousil hihiseien enek, ka meatin keil koan, Ahi san keihoen min keil keke avousili. 12 Ven meatin keil koan asakras avatetalihe veni out lu one tisa navong avasi keil. Ka meatin keil koan mun asakras avatetalihe veni meatin sav purun out lu one. Ka meatin tateisav emun amumon rendemien one keke anatetalihetei keke voum ven hiasuven onen Ahi. Meatin koa kilea vousil sakien enek, tahos keke housili.”

Iesu San Tokolkatien min Titiali Keil b 

13 Evus, meatin keil akur titiali keil umai ven Iesu keke valing hen en keil ka vahis ven keil. Ka navong meatin keil onen ales keil avul kat keil.

14 Ka Iesu selus min keil vit, “Almaen titiali keil avamai venau ka minating koetei keil, veni Ahi vi asuv houlu onen vati meatin keil koa amukonek.” 15 Sakini, navong umai veni, Iesu ling hen en keil ka san tokolkatien min keil. Evus, Iesu ka onen keil alokovein out enek.

Meatin Hau Tai Koa Tounah Onen Houlu Vit Vakur Moulien ten Lisenges c 

16 Navong Iesu mul mual va, meatin tai mai veni ka visi vit, “Tiser, numon sa koa hetahos keke nakilea makur moulien ten lisenges?”

17 Iesu vit kesi vit, “?Kovis nau usil asa koa tahos vensa? Ahi enges, kei sasen tahos. Ka munak emvati kovakur moulien ten lisenges, kilong kat mengkatien keil onen.”

18 Meatin enek visi vit, “?Ka mengkatien sa en keil?”

Ka Iesu vit kesi vit, “'Minouastei meatin namat. Minakurtei ahin vuo meatin onen hanu sav. Minahenantei tounah onen meatin sav. Minoumontei luvosien naha kat isen meatin sav.
19 Mihehouhou min tata ka mama onami keil.'(Eks 20:12-17) Ka,'Envatien onami hel en meatin sav keil hesuval koa kami emivat kami eris.'(Lev 19:18)”

20 Ka meatin hau enek vit risi min Iesu vit, “Inau nalong kat mengkatien vasi keil enek. ?Asa tamun narvinvintei veah eni?”

21 Iesu viteni mini vit, “Munak keik emvati kovamal vasi, kiha kisalem en tounah vasi onom ka kisan mane teni min koakeil tounah one tovuol. Ka munak kumoni hemukonek, tounah onom hehi houlu en out nesa. Hevus, kimai ris ka kusil nau.”

22 Ka navong meatin hau enek raengon selusien onen, kei longe tisa ka va rani veni tounah keil onen houlu ka enrovattei valokoveini.

23 Evus, Iesu viteni min meatin keil onen vit, “Anatin eli naviteni min kami, hekeih vareis min meatin koa tounah onen houlu keke vamaen Ahi vahi asuv houlu onen. 24 ?Mimundemi keke mari kamel tai kilea vakirisil en meten nidil tai koa havivi vis havivi mok? !Vuo, sakras! Ka meatin koa tounah onen houlu hekeih imok helin koanek keke vamaen Ahi vahi asuv houlu onen.”

25 Navong meatin keil onen Iesu araengoni, keil amuti manin houlu ka avisi avit, “?Mukonek, isei suk kilea vakur moulien ten lisenges?”

26 Iesu lei rahit en keil ka vit, “!Keinek! Meatin sakras voumoni, ka Ahi enges kilea voumon tounah vasi.”

27 Evus, Pita viteni mini vit, “?Kolesi? Komai melokovein tounah vasi onomai keke mevousil katuk. ?Mukonek, Ahi hesan asa min komai?”

28 Ka Iesu viteni min keil vit, “Anatin eli naviteni min kami, en avong koa tounah vasi ten out netan hehi heite hau, inau, Natin Meatin, nitondan en vuluk ten keihoen hetal min muohien. Ka en avong enek, kami mun koa mimusil inau mihetondan retai en vulin ten keihoen teindan elu (12) ka mihelosil kat meatin vasi keil koa amul en vatiamal teindan elu (12) ten out Isrel. 29 Ka meatin vasi koa alokovein teim se, vuo tue keil, vuo ahine keil, vuo tata, vuo mama, vuo titiali, vuo ah se keil venau, Ahi hesan ris uite teni hehi houlu vis hehi houlu mok hehi handred tai (100) helin asa koa alokoveini. Ka katau en tounah keil enek, keil ikur moulien ten lisenges emun. 30 Ka houlu koa avi hetetamen kosa, imai ihi heisav enges, ka houlu koa avi meatin heisav kosa, imai suk ihi hetetamen keil.”
19:30 Koanik suval meatin hau koa vi hetetamen en out netan, ka kei romusiltei Iesu suval koa meatin keil onen mumoni. Sakini, en out nesa, kei hehi heisav ka meatin keil onen Iesu imai suk ihi hetetamen keil.


Copyright information for `PMA