Matthew 2

Hetetamen Keil Alekat Iesu Keke Avahouhou Mini

Iesu avasi en meteimal ten out Betlehem en provins ten out Sudea, en avong koa Mari Herod vi asuv houlu. Katau en hasuen onen Iesu, hetetamen tei keil aka en out ist ka umai akistal en taon ten out Serusalem. Koakeil enek ales hitu keil keke avalei kilea asa koa hekur out en out netan. Ka navong arokol Serusalem amul avis meatin keil avit, “?Titiali koa avasi koa vi asuv houlu onen Siu keil mul kave? Veni avong mero veah en out ist, komai meles hitu onen kistal rohtoh. Sakini, memai suk keke mevaha netan mini.”

Navong asuv houlu Mari Herod raeng koteh longlongien koanek, mundemko houlu ral min meatin vasi keil emun koa aro en out Serusalem.
2:3 Mari Herod mundemko houlu veni mundemi vit meatin sav hesak visi hekur vulin. Ka meatin vasi keil koa aro en out Serusalem amundemko veni ametaun vurohien onen Herod koa mu vini ahin onen ka tei en natnali keil kati tuai.
Sakini Herod vise ruain asuv keil onen pris keil ka tiser keil ten Mengkatien onen Mosis ka vis keil vit, “?Kristo koa Ahi vat kati min Siu keil, ihasi kave?”

Ka keil avit risi mini avit, “Ihasi en meteimal ten out Betlehem en provins ten out Sudea, veni Ahi viteni ka en tisien onen provet Maeka vit,

'Avaseini keke vatiamal onen Betlehem vi havivi mok en vatiamal sav keil onen me-Sudah keil,
ka nisakin asuv houlu tai hekistal en vatiamal koanek.
Kei helosil kat revi meatin keil onak ten out Isrel
hesuval meatin tai mul losil kat revi sipsip keil osen.'”(Maeka 5:2)

Evus asuv houlu Mari Herod vise lelau en hetetamen keil enek koa ale kilea asa koa kur out ka en hitu keil umai veni. Evus, kei vis revi keil en avong sa varei keil ales hitu koanek kistal rohtoh eni. Evus, Herod sila keil uva en out Betlehem ka viteni min keil vit, “Miheha ka mihelekat revi titiali enek. Navong mivotini, mihemai ris mihehiteni minau, keke inau mun niha ka niha netan mini.”

Navong hetetamen keil enek araengon asa koa asuv houlu viteni min keil, uva keke avahotin titiali enek. Ka navong amusil sise one uva, hitu koa alesi navong aro veah en out ist, kistal eris. Ka navong keil ales hitu koanek, asi keil houlu mok. Hitu koanek mulamun keil va rokol avong vati mal varei en out koa titiali ro ien. 11 Navong keil uva neim, ales titiali keilu mama onen, Meri. Ka navong alesi, aretengeiril ka uva netan mini. Evus, alah lat more sanien keil one ka asani mini. Asan gol, forangkansen, ka mir.
2:11 Forangkansen ka mir luvi toeai koa amumon senta eni koa vi sanien keil koa mal onen asuv houlu tai.
12 Ka en vongien, en matil vovoien tai, Ahi sel kat keil keke irvatei mun ven Mari Herod. Sakini amusil sise sav uva ris en out one.

Tata ka Mama onen Iesu Luvusi Telohosai Telva en out Isip

13 Navong hetetamen keil enek uva, angelo tai onen Ahi Asuv kistal ven Siosep en matil vovoien tai ka viteni mini vit, “!Kimea! !Kikalah kikur titiali ka mama onen mithelohosai mitheha en out Isip! Mitheto en out enek hetokol avong koa nihiteni keke mithemai ris eni. Kumoni veni hervitei tuetin, asuv houlu Mari Herod helekat titiali koanik keke vouasi vamat.”

14 Sakini, en vongien enek varei, Siosep mea vus titiali, ka keilu mama onen telohosai telva en out Isip. 15 Telro en out enek rokol avong koa asuv houlu Mari Herod mat. Tounah enek kistal vasakin selusien koa Ahi Asuv viteni ka en provet Hosea mai vahi anatin koa vit,“Navise natkuli hemea ran out Isip.”(Hos 11:1)

16 Navong Herod lei kilea keke hetetamen keil enek aluvosi, tin katiat vis katiat. Sakini, sila meatin tavaeen keil onen uva en out Betlehem ka out vasi vesesal en out enek keke avou vasin titiali keil eni koa avi meahos koa sua one elu ka vita netan. Mumoni mukonek usil avong mal koa meatin keil ten hitu aviteni min Herod keke ales hitu enek kistal rohtoh. 17 Tounah keil enek sakin asa koa Ahi viteni ka en provet Seremaea mai vi anatin koa vit,

18 “Meatin keil ten out Rama araengon tounah tai,
along verien ten tangien koa keih.
Resel raleh
matien onen titan keil.
Ka seseini avahat lat ris rendemien onen,
veni titan keil avupuol varei.”(Ser 31:15)

Siosep ka Meri Luvus Iesu Telmai Ris Ran Out Isip

19 Navong telro veah en out Isip, Mari Herod mat. Sakini angelo tai kistal ven Siosep en matil vovoien tai 20 ka viteni mini vit, “!Kimea! Kikalah kihous titiali, ka keilu mama onen, mitheha ris en atan ten out Isrel, veni koakeil avit avou vini titiali enek, umat tuai.” 21 Sakini Siosep mea vus titiali, ka keilu mama onen, telva ris en atan ten out Isrel.

22 Ka navong Siosep raengoni keke Arkelaos kur vulin tata onen, Mari Herod, mai vi asuv houlu ten provins ten out Sudea, kei metau keke telvaha en out enek. Ka Ahi sel kati en matil vovoien tai keke nahatei en out Sudea. Sakini telva en provins ten out Kaleli 23 ka telro en out enek en taon ten out Nasaret. Sakini asa koa Ahi viteni ka en provet keil mai vi anatin koa vit, “Ihise en koan Nasaret.”

Copyright information for `PMA