Mat 21
a21:1 Mak 11:1-11; Luk 19:28-40; Sion 12:12-19
 
Mat 21
b21:12 Mak 11:15-19; Luk 19:45-48; Sion 2:13-22
 
Mat 21
c21:18 Mak 11:12-14,20-24
 
Mat 21
d21:23 Mak 11:27-33; Luk 20:1-8
 
Mat 21
e21:33 Mak 12:1-12; Luk 20:9-19
 
f21:44 Dan 2:44-45; Aes 8:14

Matthew 21

Asan More Masmasien Min Iesu Navong Kistal en Out Serusalem a 

Navong Iesu ka onen keil umai vesesal en out Serusalem, keil akistal en meteimal ten out Betfas, vesesal en Hou Nei Olip. En out enek, Iesu sila meatin elu onen vit, “Milheha en meteimal koa keisom. Ka hatte tas, milhehotin dongki tai asar kati ral min titan. Milheluvat keilu ka milheti keilu luhemai venau. Ka munak meatin etai hesak visi keke heting koe kamil, milhehiteni mini milhehit, 'Asuv envat keilu,' ka hatte tas, kei hemaen keilu.”

Koanik kur out vasakin asa koa Ahi viteni ka en provet onen mai vi anatin koa vit,

“Kihiteni min meatin keil koa aro en taon ten out Serusalem kihit,
'!Mihelesi! Asuv houlu onami mul mai keke valosil kat kami.
Kei, sakien onen merau enges, ka mul muloh en dongki tai.
Anatin, mul rondan en sili dongki tai enges ka mul mai.'”(Sak 9:9)

Ka meatin keilu onen Iesu luva ka lumumoni suval koa Iesu viteni. Keilu luri dongki ka titan. Evus, lukuvin kot onealu en dongki keilu enek ka Iesu rondan eni. Marmari vangi meatin keil umai ka asak mesen revi sise keke Iesu voual ien. Keil avoein kot keil ome en sise ka teisav en keil amusah oumeil ka aling revi en sise. Houlu en mari vangi meatin keil enek koa uva amulamu en Iesu ral min koakeil akatau emun avisohiso vina nesa avit,

“!Masmasien min Natin asuv houlu Deved!
!Tokolkatien hel en kei koa mai en isen Iahova!(Sam 118:26)
!Masmasien hehina min Ahi en out nesa!”

10 Ka navong Iesu kistal en out Serusalem, longlongien enek ka vasi taon ka me-Serusalem vasi keil amuti manin ka arun usili houlu “?Isei enek koa mul mai?”

11 Ka marmari vangi meatin keil avit kesi avit, “Koanik vi Iesu, provet tai ten out Nasaret en provins ten out Kaleli.”

Iesu Likat Rasilin Meatin Houlu ran Eim Votut b 

12 Navong arokol Serusalem, Iesu va neim en teahu ten Eim Votut ka likat rasilin meatin vasi keil koa asalem en tounah vuo amul avul tounah eni. Kei vou vilehiles avet onen koakeil amul akekes en mane ka out tatondanien onen koakeil asalem en ame keil avahi sanien votut. 13 Ka navong mumoni, sel kat keil vit, “En Tus Votut amutisi avit,'Eim onak ihise en Eim Tahisien.'(Aes 56:7) Ka kami mimumoni suk mai vi'Eim mon tarhena keil'.”(Ser 7:11)

14 Ka navong Iesu mul en teahu ten Eim Votut, metovar keil ka koakeil asakras avoual umai veni ka kei sak revi keil.

15 En avong enek emun, titiali keil amul avisohiso en teahu ten Eim Votut avit, “Masmasien min Natin asuv houlu Deved.” Ka navong asuv keil onen pris keil ka tiser keil ten mengkatien onen Mosis ales mormore tounah keil koa Iesu mumoni ka alonge asa koa titiali keil avisohiso eni, tine vepeng houlu.

16 Sakini keil avis Iesu avit, “?Koraengon asa titiali keil ekek amul aviteni?”

Ka Iesu vit kesi vit, “Anatin, nalonge. ?Mukave, kami mirvulitei Tus Votut onen Ahi? Veni kei mul vit,

'Ahi, keik kosak mesen sise keke kilong masmasien hehat minuk,
heka en titiali ka tivava keil.(Sam 8:2)

17 Evus, Iesu loh kovien keil ka mea ran out Serusalem. Kei ka onen keil uva en taon ten out Betani, ka en out enek, amatil.

Iesu Sesendan Vati Fik Tai c 

18 En visokon semau, navong Iesu mul mual va ris en out Serusalem, amai kati en sise. 19 Ka les vati fik tai mul en vali sise. Ka navong va vesesal veni, votini keke heite tovuol, les outes. Sakini, Iesu viteni min vati fik vit, “!Heiai hetovuol emun enuk!” Ka hatte tas, vati fik enek mukou.

20 Navong meatin keil onen Iesu alesi, amuti manin ka avisi avit, “?Vati fik enek mukou hatte tas mukave?”

21 Ka Iesu vit kesi min keil vit, “Anatin eli naviteni min kami, munak demkatien onami mul ka mihermundem maentei asa koa mivisi, kami mikilea mivoumon asa koa namumoni en vati fik. Ka roviteis koanik, mikilea emun mivahiteni min hou koanik mivahit, 'Kimea ran vulum ka kiso sasom enuk kiha en atas,' ka hekur out. 22 Munak mikul anatin keke tounah hekistal, tounah vasi koa mihehis Ahi veni, hekistal hehi anatin.”

Hetetamen Keil Onen Siu Keil Avis Iesu Usil Isei Maeni Voumon Umen Onen d 

23 Navong arokol Serusalem, Iesu va en teahu ten Eim Votut. Ka navong kei mul visein meatin keil, asuv keil onen pris keil ka elda keil umai veni ka avisi avit, “?Vensa komumon tounah keil ekek? ?Isei maenuk kovoumoni?”

24 Ka Iesu vit kesi min keil vit, “Inau mun, mahis kami en tounah tai. Munak mihehit kesi minau, inau mun nihiteni min kami isei maen nau moumon tounah keil enek. 25 Alhit visi minau. ?Isei maen Sion vahi baptaes en meatin keil? ?Ahi vuo meatin enges?”

Keil aselus rahiti min keil eris avit, “?Rehehiten sa? Munak rehehit 'Ahi maeni', kei hehiteni minir hehit, '?Mukonek, vensa suk mirkul anatin entei selusien onen?'
26 Ka munak rehehit, 'Meatin maeni', rehemetau en mari vangi meatin keil veni keil vasi amundemi keke Sion Baptis vi provet tai onen Ahi.” 27 Sakini, avit kesi min Iesu avit, “Komai merkileatei isei maeni.”

Ka Iesu viteni min keil vit, “Mukonek, inau mun nirvitentei isei maen nau moumon tounah keil ekek.”

Iesu Ra Tatavol Usil Longkatien onen Natnali Elu

28 Ka Iesu ra usil tatavolien tai min keil vit, “?Kami mirendem sa? Meatin tai, natnali elu. Avong tai, meatin enek va ven moeite ka viteni mini vit, 'Natkuli, kosa, kiha kum en neiai oseratel.'

29 “Ka natnali enek vit kesi mini vit, 'Ekrovattei.' Ka katau, rendemien onen viles ka va mum.

30 “Evus, tata va ven natnali tamun ka viten selusien vati tas. Ka natnali enek vit risi mini vit, 'Tahos tata, niha.' Ka evus, kei rovatei.

31 “?Isei en keilu mumon asa tata envati?”

Keil avit, “Kei koa mulamu.”

Iesu viteni min keil vit, “Anatin eli naviteni min kami, koakeil alah mane ten takis ka hoeaso keil, Ahi mul mai vi Asuv Houlu en moulien one mulamu en kami.
32 Veni Sion mai ven kami keke vatie sise ten maluen mivousili. Ka kami mirkul anatin entei selusien onen, ka koakeil akur mane ten takis ka hoeaso keil alonge ka akul anatin en selusien onen. Ka avaseini miles asa koa amumoni, mirvilestei ran tisaen onami ka mirkul anatin entei eni.”

Iesu Ra Tatavol Usil Longkatien onen Meatin Keil Koa Alei Kat Neiai Tai e 

33 Evus, Iesu ra usil tatavolien tamun min keil vit, “En avong tai, horetan tai luh neiai osen. Kei mumon vieh ka rahiti, ka kil avul tai koa vi out koa avita lin heiai ien keke vasakin site vastal rani. Evus, muti avet tai vina nesa talekokoeien. Navong mumoni evus, kei maen meatin sav keil umai alei kati ka keil avat kati keke isan hati heiai keil mini navong men. Evus, kei va en ualien tai. 34 Avong houlu mai muli, heiai men. Sakini, horetan enek sila slev keil onen uva keke avahis koakeil alei kat neiai osen avasan hati heiai mini.

35 “Ka navong arokol neiai, meatin keil koa alei kati avuli kat slev keil onen: tai amu puruni, tamun amu vini, ka koa etel en keil, akove. 36 Evus, horetan enek sila slev sav keil koa avi houlu mok mulin koa sila mulamu. Ka meatin keil koa alei kat neiai enek amumoni vati tas min keil. 37 Katau en keil vasi, horetan sila natnali va ven keil veni kei viteni min kei sasen vit, “Keil ihouhou ven natkuli.'

38 “Ka navong koakeil alei kat neiai ales natnali, aviteni min keil eris avit, '!Ei, natin horetan kati keisom koa hekur neiai koanek navong tata onen hemat! !Almai, rovou vini! !Hesakini, tounah keil onen hemai hehi orer esuk!' 39 Sakini keil uva avuli kati, alisi va hae ran neiai enek, ka amu vini.”

40 Evus, Iesu vis hetetamen onen Siu keil koa araengon tatavolien enek vit, “?Ka mukave? ?Navong horetan ten neiai enek hemai ris, houmon sa min meatin keil enek?”

41 Ka keil avit kesi avit, “Kei hesa kes matien koa tisaso min meatin tatisaso keil enek. Evus, hemaen neiai onen heha min meatin sav keil koa isani mini hati heiai koa men en avong mal teni.”

42 Evus, Iesu viteni min keil vit, “?Mukave, kami mirvulitei Tus Votut? Veni kei viteni vit,

'Pos koa meatin keil toumien alei seseini,
kei varei mai vi more vatiseng kati ten eim mulin pos sav keil.
Koanik, Iahova mumoni,
ka rolesi tahos imok!'(Sam 118:22-23)

43 “Sakini, naviteni min kami, tahosien ten hiasuvien onen Ahi koa mimul mikuri, Ahi helah lati ran kami Siu keil, ka hesani suk min meatin keil ten kantri sav koa akilea along kat ren ka ason heite en moulien one. 44 Koakeil asesein vatiseng enek, imot eni ka sie hemavulvul varei. Ka munak vatiseng enek hemot heta kat keil, ave hemakoako.” f 

45 Navong asuv keil onen pris keil ka Farasi keil along tatavolien keil onen Iesu, akilea keke mul selus usil keil. 46 Sakini keil alekat sise avahuli kati, ka ametaun marmari vangi meatin keil veni keil amundemi keke Iesu vi provet tai.

Copyright information for `PMA