Mat 25
a25:14 Luk 19:11-27
 

Matthew 25

Tatavolien usil Sakmeseien onen Atouli Hau Heite Halualim (10)

Navong Iesu mul selus ral min meatin keil onen usil hemukave il isak mesen keil ven amairisien onen, ra usil tatavolien enek min keil vit, “En avong enek, hiasuvien onen Ahi hemai hesuval avong koa atouli hau halualim (10) uva keke avales tetaliheien tai. Navong out mul vavong, akur laet one ka uva avahisu min meatin koa vatetalihe keke avousili avaha en out tatetaliheien. Elim en keil vate tovuol, ka elim vate mul. Koakeil vate tovuol akur laet one ka arkur etai mun oel vatal min keil. Ka koakeil vate mul akur retai en vei oel tamun ral min laet one. Meatin tatetaliheien roun en amaien onen, ka atouli hau keil enek amul arae ka amatil.

“Ka en metavinavong, along meatin keil avisohiso avit, '!Mul mai! !Meatin tatetaliheien mul mai! !Almai alhisu mini rovousili!'

“Navong atouli hau keil enek alonge, amule amea ka amum revi laet keil one. Ka koakeil vate tovuol aviteni min koakeil vate mul avit, 'Alsan tei oel onami vamai, veni laet onomai mul mat ke.'

“Ka koakeil vate mul avit kesi min keil avit, 'Vuo li, veni oel onomai rovinvintei ven laet onami ka laet onomai emun. Mihehas en sitoa teni ka mihehul tei hehi onami.'

10 “Ka navong ahin keil enek uva avahul tei oel, meatin tatetaliheien mai kistal. Ka atouli keil koa asak mese revi, amusili ka uva neim ral mini en mari anien ten tetaliheien. Evus, meatin keil akoteh en voiteh.

11 “Ka katau, navong atouli sav keil umai akistal, umai en eim enek ka avisohiso avit, '!Asuv, Asuv! !Sehen voiteh ven komai li!'

12 “Ka meatin tatetaliheien vit kesi min keil vit, 'Anatin eli naviteni min kami, narkileatei kami varei.'”

13 Ka Iesu selus ekor en tatavolien enek vit, “En sakien enek, kami mihelei kat revi kami, veni mireingeingen avong kati ten amairisien onak.”

Tatavolien usil Hetetamen Tai koa Mundesin Meatin Toumien Etel Onen Tellei kat Mane Onen a 

14 Iesu ra usil tatavolien tamun min meatin keil onen vit, “En avong enek, amaien ten hiasuvien onen Ahi hesuval hetetamen tai koa sak mesen tounah keil onen keke vaha en out soutin. Sakini, vise ruain eiloheh etel (3) onen ka ling keitel telvalei kat tounah keil onen. 15 Kei ling retai en tounah keil onen en heatel musil meteisauen one. Min tai, hetetamen enek ling gol mane taosen elim (5,000) en hen. Min tamun, ling gol mane taosen elu (2,000) en hen. Ka min tamun koa teisav, ling gol mane taosen tas (1,000) en hen.
25:15 Gol mane enek, tai suval 1000 vatu.
Evus, hetetamen enek va suk.

16 Navong va, hatte tas, kei koa kur gol mane taosen elim (5,000) eva ka mum susur en mane enek va vio ... kur ris taosen elim (5,000) emun ral mini. 17 Ka en vati sise enek, meatin koa kur gol mane taosen elu (2,000), kei mun mum susur en mane enek ka kur ris taosen elu (2,000) mun. 18 Ka meatin koa kur gol mane taosen tas (1,000), kei va, kil avul tai, ka rahin suain mane onen asuv onen.

19 “Avong houlu muli va, ka asuv oneatel mai ris ka vise keitel keke valong revi asa telmumoni en mane koa lingi en heatel. 20 Eisisil onen koa kur gol mane taosen elim (5,000) mai veni ral min taosen elim emun ka vit, 'Asuv, keik koling gol mane taosen elim (5,000) en hek. Ka kilesi, namum susur eni ka navotin taosen elim (5,000) emun ka naling kati ral mini.'

21 “Navong asuv onen lesi, viteni mini vit, '!Tahos imok! Keik kovi eiloheh koa tahos koa nakilea nindesinuk. Ka veni kolei kat revi tounah keil havivis koa nalingi en hem, nisakinuk kilei kat tounah keil houlu onak. Kimai ka kiles tahosien hetal min asuv onom.'

22 “Evus, eiloheh onen koa kur gol mane taosen elu (2,000) mai veni ka vit, 'Asuv, keik koling gol mane taosen elu (2,000) en hek. Ka kilesi, namum susur eni ka navotin taosen elu (2,000) emun ka naling kati ral mini.'

23 “Navong asuv onen lesi, viteni mini vit, '!Tahos imok! Keik kovi eiloheh tai koa tahos koa nakilea nindesinuk. Ka veni kolei kat revi tounah keil havivis koa nalingi en hem, nisakinuk kilei kat tounah keil houlu onak. Kimai ka kiles tahosien hetal min asuv onom.'

24 “Evus, eiloheh onen koa kur gol mane taosen tas (1,000) mai veni ka vit, 'Asuv, nakilea keke kovi meatin takeih tai koa mul kur heiai en vatiai keil koa keik korluhtei, ka komul kolah anien koa meatin sav keil aluhi en ah keil osom. 25 Sakini nametaunuk ka nuva narahin suain mane onom en avul tai. Kilesi ke, mane keil vasi onom keiek.'

26 “Navong asuv onen lesi, viteni mini vit, '!Keik kovi taripeng vareis ka eiloheh tai koa tisaso. Keik kokilea keke navi meatin takeih tai koa namul nakur heiai en vatiai keil koa narluhtei, ka namul nalah anien koa meatin sav keil aluhi en ah keil osak. 27 Mukonek, tahos imok munak kovaling mane onak enges en bangk tai keke navong numai ris nakilea makur ris mane onak vatal titan.'

28 “Evus, hetetamen enek viles ka les eiloheh sav onen ka viteni mini vit, 'Kulat gol mane ran hen eiloheh enek ka kilingi en hen koa kur kat gol mane taosen halualim (10,000) tuai. 29 Veni koakeil amum ral min tounah koa mul en he, isan tamun mini keke vasakin tounah keil koa mul en he hehi houlu mok. Ka koakeil armumtei vatal min asa koa mul en he tuai, avaseini tounah keil havivis, ikulati ran he. 30 Ka eiloheh tatisa ekek, kilisi heha hae en out koa mankoli heto hetal min koakeil il is ka il ihal lohe ven mahien one.'”

Avong koa Ilei Revi Usite Vasi Onen Meatin Keil

31 Iesu mules selus min meatin keil onen vit, “Navong inau, Natin Meatin, nimai ris eni, nimai en mari muohien ka hetal min angelo vasi keil. Hevus, nitondan en vulin ten keihoen onak hetal min hetetamenien keke nilei revi usite onen meatin keil. 32 En avong enek, meatin vasi keil ten kantri vasi keil iso ruai out hetas. Keil ilomal en metok, ka nititi vas keil iha en vangite helu. Numoni hesuval meatin koa lei kat sipsip keil mul riti vas nani keil vaha ran sipsip keil osen. 33 Sipsip keil, ling seheni en usite matu ka nani keil, en usite meil. En sakien enek, inau mun niling meatin keil amal en usivek matu, ka koakeil akalkali, nilingi en usivek meil.

34 “Hevus, inau koa narondan en vulin ten keihoen enek, nihiteni min koakeil amul en usivek matu nihit, 'Kami koa tokolkatien onen Tata onak mul en kami, almai! Almai ka mihekur asa koa kei sak meseni ven kami navong mumon out netan. 35 Veni navong amai kat nau, misan anien minau nakani; navong maroro kat nau, misan oai minau namuni; ka navong navi heou, mikur revi nau en teim onami. 36 Anatin, navong eisin omak tovuol, mimusin enau; navong namesai, milei kat revi nau; ka navong namul en eim takeih, kami misau enau.'

37 “Evus, meatin keil amal ihit kesi minau ihit, “?Asuv, avong sa varei melesuk amai katuk ka mesan anien kokani; vuo maroro katuk ka mesan oai minuk komuni? 38 ?Avong sa melesuk kovi heou ka mekur revi keik en teim somai, vuo eisin omom tovuol ka memusin enuk? 39 ?Ka avong sa varei melesuk komesai vuo komul en eim takeih ka mesau enuk?'

40 “Ka en vuluk ten keihoen nihiteni min keil nihit, 'Anatin eli naviteni min kami, tounah vasi koa mimumoni min meatin tai koa musil kat nau, avaseini kei vi meatin kuren enges, en metok koanek suval koa kami mimumoni minau varei.'

41 “Hevus, nihiteni min koakeil amul en usivek meil nihit, '!Kami koa Ahi sesendan kami, miheha ranau! !Miheha en ahang koa sakras vavus, koa Ahi sak meseni tuai ven Temat ka angelo keil onen! 42 Veni navong amai kat nau, mirsantei anien minau maani; navong maroro kat nau, mirsantei oai minau mamuni; 43 ka navong navi heou, mirkur revitei nau en teim onami. Ka navong eisin omak tovuol, mirmusinentei nau; navong namesai, mirlei kat revitei nau; ka navong namul en eim takeih, kami mirsau entei nau.'

44 “Hevus keil ihis nau ihit, '?Asuv, avong sa varei melesuk amai vuo maroro katuk, vuo kovi heou, vuo eisin omom tovuol, vuo komesai, vuo komul en eim takeih ka merkatauntei keik?'

45 “Ka inau nihit kesi min keil nihit, 'Anatin eli naviteni min kami, tounah vasi koa mirmumontei min meatin tai koa musil kat nau, avaseini kei vi meatin kuren enges, en metok koanek suval koa mirmumontei minau.'

46 “Ka koakeil akalkali, inau nisa lat keil iha en out koa mahien one sakras vavus. Ka koakeil amal iha ikur moulien ten lisenges.”

Copyright information for `PMA