Mat 3
a3:1 Mak 1:1-8; Luk 3:1-18; Sion 1:19-28
 
Mat 3
b3:13 Mak 1:9-11; Luk 3:21-22
 

Matthew 3

Sion Baptis Sak Mesen Sise Onen Iesu a 

Sua houlu muli va, ka Sion Baptis va en out volvol en provins ten out Sudea. Kei mul vitehiteni min meatin keil vit, “!Mihehiles ran tisaen keil onami, veni hiasuvien onen Ahi mul mai vesesal!” Kei vi meatin kati koa Ahi selus usili ka en provet Aesea vit,

“Along rea tai mul visohiso en out volvol vit,
'!Mihesak mesen sise onen Asuv!
!Mihoumon sise onen hemal!'”(Aes 40:3)

Sion, eisin omon amumoni en hilin kamel, ka kei mutoh kati en stirap koa amumoni en hiliven buluk. Anien an vi kal ka hani koa suka bak keil amumoni en out volvol. Ka meatin keil houlu umai veni. Keil aka en taon ten out Serusalem, aka en out vasi en provins ten out Sudea, ka aka en out vasi keil emun vesesal en Oaisal Sodan. Ka navong keil alesi, avit lat tisaen keil one, ka Sion vi baptaes en keil en Oaisal Sodan.

Farasi ka Sadusi keil houlu mun umai ven Sion keke vahi baptaes en keil. Ka navong Sion les keil selus keih kat keil vit, “!Ei, kami mivi vangi amot tisa keil koa mimul mirili meatin keil en ongomi! ?Isei sel kat kami keke mivalohosai ran mahien koa Ahi hesani min kami? Tahos imok keke helamu, mihoumon sakien koa hetie lati keke kami miviles tuai ran tisaen onami. Ka minandemtei minahit mihelohosai ran mahien enek ven Ebraham vi vati avu onami. !Vuo! Veni naviteni anatin min kami keke Ahi kilea vasakin ahat keil ekek imai ihi havinali Ebraham keil. 10 Keitinek, teai asak meseni tuai en vatte ten vatiai keil vasi. Ka koakeil arsontei heite ten tahosien, itei lat keil ka ison keil ihaha en ahang.

11 “Inau navi baptaes en kami en oai enges vatie lati keke kami miviles ran tisaen onami, ka koa hemai hekatau enau hehi baptaes kami en Ninin Votut ka ahang. Keihoen onen mulin onak, ka inau narvinvintei keke mamai mahi slev keke makur sandal onen. 12 Kei sak mese tuai keke vatiti vas meatin keil vasi, suval meatin koa kur savel onen vaso lelat uti uit ran ingeite. Uti uit koa tahos, helah ruaini heha en eim teni, ka ingeite koa tisa, heniti en mari ahang tai koa sakras vamat.”

Avong koa Sion vi Baptaes en Iesu b 

13 En avong enek, Iesu ka en out Kaleli ka kei mun mai en Oaisal Sodan keke Sion vahi baptaes eni. 14 Ka navong mai veni, Sion sak visi vahiles rendemien onen Iesu vit, “!Vuo! ?Keik kumai venau vensa? Mal keke keik kihi baptaes enau veni komarite mok komuli nau.”

15 Ka Iesu vit kesi mini vit, “Lehoumoni hemukonek kosa, veni en sise koanik lehoumon tounah vasi koa mal en meten Ahi.” Sakini Sion maeni ka vi baptaes en Iesu.

16 Ka navong Sion vi baptaes eni evus, Iesu mea ran oai. Hatte tas, teilang mutah, ka kei les Ninin onen Ahi muka mita merau ka rondan eni suval ame. 17 Ka rea tai selus ka en out nesa viteni vit, “Koanik vi natkuli kati, koa envatien onak mul ien. Ka nasinau mok veni.”

Copyright information for `PMA