Mat 4
a4:1 Mak 1:12-13; Luk 4:1-13
 
Mat 4
b4:12 Mak 1:14-15; Luk 4:14-15
 
Mat 4
c4:18 Mak 1:16-20; Luk 5:1-11
 
Mat 4
d4:23 Luk 6:17-19
 

Matthew 4

Temat Sak Vis Iesu a 

Evus Ninin Votut mulamun Iesu va en out volvol keke vakur sakvisien en hen Temat. Kei ro en out enek avong hanu mau elu (40) ka mul val ven anien, sakini amai kati. Ka Temat koa mul sak vis meatin, kei mai vesesal veni viteni vit, “Munak anatin keke kovi Natin Ahi, kimeng kat ahat keil ekek ihiles imai ihi veret am.”

Ka Iesu vit kesi mini vit, “!Vuo! Nirmumontei veni Tus Votut viteni vit,

'Meatin romoultei en anien enges.
!Vuo! Kei moul en selusien keil vasi koa kistal en ongon Ahi.'”(Dut 8:3)
Evus, Temat kur Iesu va en out Serusalem, taon votut onen Ahi. Kei lingi mulomal en out tai nesa mok en hoi Eim Votut. Evus, Temat viteni mini vit, “Munak anatin keke kovi Natin Ahi, kihut kihita netan, veni Tus Votut viteni vit,

'Ahi hemeng kat angelo onen keil
ilekat revi keik.
Keil ihati latuk hehina nesa en he,
hesakini kirmusavoitei en alom en ahat keil.'”(Sam 91:11-12)

Ka Iesu vit kesi mini vit, “!Vuo! Nirmumontei, veni Tus Votut viteni mun vit,

'Minasak vistei Iahova koa vi Ahi onami
keke mivahotini kei mul ral min kami.'”(Dut 6:16)

Evus, Temat kur Iesu va en mari hou tai nesa ka rie lati mini kantri vasi keil en out netan ka momore tounah keil koa amul en keil ka viteni mini vit, “Tounah vasi keil enek, inau nisani minuk, munak kitetengeiril enges ka kiha netan minau.”

10 Ka Iesu vit kesi vit, “!Temat, keik kiha soutin ranau! Inau nirmumontei veni Tus Votut viteni vit,

'!Miheha netan min Iahova koa vi Ahi onami
ka mihelong kat kei enges!'”(Dut 6:13)

11 Evus, Temat lokoveini, ka angelo keil umai akatauni.

Iesu Mum Rohtoh en Umen Onen en Provins ten out Kaleli b 

12 Navong Iesu mul en provins ten out Sudea, raengoni keke asuv houlu Herod Antipas son Sion Baptis va en eim takeih onen. Sakini, Iesu va en meteimal ten out Nasaret en provins ten out Kaleli. 13 Evus, lokovein meteimal ten out Nasaret, ka va ro en taon ten out Kapaniam koa mul vesesal en mari oai ten out Kaleli. Taon koanek mul en atan onen vatiamal onen Sebulon ka Navtali telamu. 14 Koanek kur out vasakin asa Ahi viteni ka en provet Aesea hemai hehi anatin koa vit,

15 “Nakur longlongien tai vaha min meatin keil
koa aro en atan onen mari vatiamal onen Sebulon ka atan onen mari vatiamal onen Navtali.
Longlongien koanek heha min koakeil aro vesesal en mari oai ten out Kaleli, en usite va en Oaisal Sodan,
min koakeil aro en out Kaleli, out koa vilelau en meatin keil koa arvitei Siu.
16 Meatin keil koa aro en mankoli ten tisaen,
keil iles mari meneai onen Ahi.
Anatin, meatin keil koa aro en out koa mankoli ten metauen ven matien,
kosa ales out mulan.”(Aes 9:1-2)

17 Ka avong enek eva, Iesu mul vitehiten selusien onen Ahi min meatin keil vit, “!Mihehiles ran tisaen keil onami, veni hiasuvien onen Ahi mul mai vesesal!”

Iesu Vise Lat Meatin Ehat Taleh Mesauien Telvousili c 

18 En avong tai, Iesu mul mual musil valite ten mari oai ten out Kaleli. Ka navong mual, kei les lumali time, isealu Saemon (koa aling isen tamun vi Pita) ka Andiru (koa vi tunali). Keilu lumul luson net onealu en mari oai veni luvi meatin taleh mesauien. 19 Ka Iesu viteni min keilu vit, “Lumai milhousil kat inau. Kosa milleh mesau enges, ka inau nihisein kamil hemukave milheleh meatin keil.” 20 Ka hatetas, lulokovein net keil onealu ka luva lumusili.

21 Evus, keitel telmual telva ka Iesu les lumali time sav, isealu Tiemes ka Sion, koa luvi natin Sepeti. Keilu lumul en vot ral min tamealu ka telsak revi net keil oneatel. Ka navong Iesu vise keilu luvamai veni, 22 hatetas, lulokovein vot ka tamealu, ka luva lumusil Iesu.

Iesu Mumon Umen onen Ahi en Provins ten out Kaleli d 

23 Navong Iesu vise keitel telvousili evus, kei va ka vasi out Kaleli. En out vasi, kei mul visein meatin keil en eim ten hihiseien keil onen Siu keil, mul vitehiten more longlongien usil hiasuvien onen Ahi, ka mul sak revi meatin keil koa akur mesaien savsav keil. 24 Ka longlongien usili ka vasi out en provins ten out Siria emun. Sakini meatin keil ten out enek alah koakeil amesai en mesaien savsav keil: koakeil ave litu ramat, koakeil ninin tisa mul en keil, koakeil avi leimatmat, ka koakeil hati usive mat. Keil alah keil vasi umai ven Iesu ka kei sak revi keil. 25 Ka navong Iesu mual, marmari vangi meatin keil amusili. Keil aka en provins ten out Kaleli ka provins ten out Sudea. Aka en taon ten out Serusalem ka taon halualim (10) koa avise keil en 'Dekapolis'. Ka aka emun en out sav keil en usite ten Oaisal Sodan.

Copyright information for `PMA