Mat 5
a5:3 Luk 6:20-23
 
Mat 5
b5:12 Mak 9:50; Luk 14:34-35
 
Mat 5
d5:31 Mat 19:9; Mak 10:11-12; Luk 16:18
 
Mat 5
h5:38Luk 6:29-30
 
Mat 5
i5:43 Luk 6:27-28,32-36
 

Matthew 5

En Hou Tai, Iesu Visein Meatin Keil en Sakien Keil koa Mal en Meten Ahi

Navong Iesu les mamari vangi meatin keil enek, kei vina nesa en hou tai ka rondan keke vahisein keil. Ka koakeil avi meatin keil onen umai veni ka mul visein keil.

Hihiseien Usil Vati Meatin koa Ahi Hetokol Kati a 

Iesu viteni min keil vit,

“Tokolkatien hel en koakeil alei kilea arvinvintei en meten Ahi,
veni hemukonek, kei hehi asuv houlu one ka helosil kat revi keil.
Tokolkatien hel en koakeil amurang veni alonge tisa,
veni hemukonek, Ahi hehati lat rendemien one.
Tokolkatien hel en koakeil amerau ka rendemien one mul netan,
veni hemukonek, Ahi hesan out vasi netan min keil avalosil kati.
Tokolkatien hel en koakeil evati mok keke moulien one hemal vasi en meten Ahi,
veni hemukonek, houmoni hehi anatin en moulien one.
Tokolkatien hel en koakeil emahis meatin sav keil,
veni hemukonek, Ahi hetie lat sakien ten enmahisien min keil.
Tokolkatien hel en koakeil amusil kat Ahi ral min rendemien koa mutolas,
veni hemukonek, keil iles Ahi en mete.
Tokolkatien hel en koakeil aling tomat en meatin keil,
veni hemukonek, ihise keil en titan Ahi.
10 Tokolkatien hel en koakeil akur mahien veni amum mal,
veni hemukonek, Ahi hehi asuv houlu one ka helosil kat revi keil.
11 “Tokolkatien hel en kami navong meatin keil aselus karen kami, asan mahien min kami, ka aviten liluvosien tatisaso houlu vakat kami veni mimusil kat inau. 12 Anatin, en vati sakien koanik, asan mahien min provet keil koa amul amulamu en kami. Ka mihesi kami veni mihekur ui umen onami koa hemariso mok en out nesa.”

Hihiseien Usil Mukave Meatin Keil Onen Ahi Asuval Sol ka Laet en out Netan b 

13 Iesu selus eris vit, “Kami misuval sol koa arivini en meatin keil en out netan. ?Ka munak kasien ten sol vuol rani, umon kasien teni hemai ris eni hemukave?
5:13 Sol telamu rosuvaltei sol ten kosa, romutotei. Sakini navong mermer neli, kasien teni mul vuol rani.
!Asakras avoumoni! Sol koa kasien tovuol ien sakras voumon etai tounah. Tahos avasonis vaha keke meatin keil avahetan eni.

14 “Kami misuval laet koa ritin va min meatin keil en out netan. Ka suval taon koa mul en hoi hou nesa sakras vato suai veni laet koa mul ien, kami mun, meatin keil ilei kilea laet koa mul en kami. 15 Meatin tovuol vanit laet tai ka, evus, mul kav koe en pesin tai. !Vuo! Keil alingi nesa en out arekein laet ien keke kilea vatitin revi out vasi neim ven meatin keil koa aro ien. 16 En vati sakien enek, laet ten demkatien onami hetitin revi ven meatin keil. Hemukonek, navong keil iles more sakien keil onami, keil ihat lat isen Tata onami koa ro en out nesa.”

Hihiseien Usil Hetetamenien ten Mengkatien Keil Onen Ahi

17 Iesu visein meatin keil vit, “Minandemtei minahit inau numai keke maso lat Mengkatien onen Mosis ka hihiseien onen provet keil vaha. !Vuo! Narmaitei maso lat keil. Numai masakin asa koa mengkatien keil aselus usili hemai hehi anatin. 18 Anatin eli naviteni min kami keke tounah vasi koa mul en mengkatien keil onen Ahi ka titi selusien vasi keil koa provet keil onen amutisi mul asakras avavupuol hetokol avong varei koa um vasi umen one ka out nesa ka out netan luhevupuol. 19 Sakini, koakeil arali koteh mengkatien tai onen Ahi koa havivi mok ka avisein meatin sav keil keke umoni hesuvali, en out nesa, keil imai ihi meatin heisav keil enges. Ka koakeil along kat mengkatien onen Ahi ka avisein meatin sav keil keke umoni hesuvali, en out nesa, keil imai ihi hetetamen keil. 20 Veni naviteni min kami keke maluen onami helin maluen onen tiser keil ten Mengkatien onen Mosis ka Farasi keil, munak mihermumontei, miherlestei hiasuvien onen Ahi.”

Hihiseien Usil Vurohien

21 Iesu viteni mun min meatin keil vit, “Kami milonge keke Mosis meng kat avu keil onami telamu vit,'Minouastei meatin namat'(Eks 20:13) ka meatin koa mumoni heha en kot ka isan mahien mini. 22 Ka inau naviteni min kami keke meatin vasi koa avuroh kat tue keil, iha en kot ka Ahi hesan mahien min keil. Anatin, munak meatin tai viteni min tunali vit, 'vatom tovuol', ikur meatin enek heha en mari kot onen Siu keil ka iling mahien eni. Ka munak meatin tai viteni min tunali vit, 'kovi vau', kei mul en sise koa heha en Ahang koa sakras vamat.

23 “Sakini munak keik kovaha keke kovasan sanien onom vaha min Ahi en ahor ten sanien, ka en out enek komundem kat tounah tai koa meatin sav vit komumoni mini koa romaltei, 24 keik kilokovein sanien onom en out enek vesesal en ahor ten sanien. Hevus, kiha mau ka kumon methos hetal min meatin enek. Ka navong komumoni tuai, kimai ris kisan sanien onom esuk min Ahi.

25 “Ka munak komumon tounah tai koa romaltei va kat meatin tai, ka kei vit vakur keik kovaha en kot, kikalah kisak revi tounah enek hetal mini navong kamil milmul veah milmusil sise keke milvaha en kot. Veni munak kormumontei, navong milhetokol kot, kei helinguk kiha en hen meatin koa mul lei revi usite onen meatin keil. Ka vahesa kei hemae latuk kiha en hen polis, ka polis heson keik kiha suk en eim takeih. 26 Anatin eli naviteni minuk, keik kito en out enek ka kosakras kovamaluv heha vio ... kihul vasi faen koa alingi enuk.”

Hihiseien Usil Sakien koa Akur Ahin vuo Meatin onen Meatin Sav Eni

27 Ka Iesu mules visein keil vit, “Kami milonge keke Mosis meng kat avu keil onami telamu vit,'Minakurtei ahin vuo meatin onen hanu sav.'(Eks 20:14) 28 Ka inau naviteni min kami keke navong meatin tai koa retalihe tuai les ahin tai ka envati voum vatisa vatal mini, en meten Ahi suval kei kuri tuai veni mum tisa ral mini tuai en rendemien onen.

29 Munak usi metom koa matu sakinuk kumot en tisaen, kikis lati ka kisoni heha. Tahos imok hati vem tai hevoul, lohlin munak ason avem vasi hevuol en Ahang koa sakras vamat. 30 Ka munak hem koa matu sakinuk kumot en tisaen, kitei kotehei ka kisoni heha. Tahos imok hati vem tai hevoul, lohlin munak kiha en Ahang koa sakras va mat hetal min avem vasi.”

Hihiseien Usil Sakien koa Meatin koa Retalihe Mul Lohkovein Ahin Onen d 

31 Iesu mules visein meatin keil vit, “Kami milonge keke Mosis meng kat avu keil onami telamu vit,'Meatin koa vit valokovein ahin onen, hesan Setifiket ten Tasilien mini, evus, kilea valokoveini.'(Dut 24:1) 32 Ka inau naviteni min kami keke navong meatin tai ka ahin tai luretalihe, lusakras luvatasil en meten Ahi. Ka munak meatin tai lokovein ahin onen, koa romatiltei ral min meatin sav tai, kei mumon tisaen en meten Ahi. Veni asa koa meatin enek mumoni mul sakin ahin onen va keke vakur meatin sav, ka en meten Ahi, ahin enek mul mum tisa ral mini. Ka meatin hau koa kuri, kei mun mul mum tisa en meten Ahi veni kur ahin onen meatin sav.”

Hihiseien Usil Sakien koa Meatin Mul Mumon Hatkatien Tai

33 Iesu mules visein meatin keil vit, “Kami milonge keke Mosis meng kat avu keil onami telamu vit,'Minatali kotehtei hatkatien keil onami koa misuv kati en isen tounah tai, ka mihoum vasi asa koa mivat kati min Ahi Asuv keke mihoumoni.' e  34 Ka inau naviteni min kami keke minasuv kattei hatkatien keil onami en etai tounah en out nesa veni vi vulin ten keihoen onen Ahi.
5:34 Aes 66:1; Tiemes 5:12
35 Ka minoumontei en etai tounah en out netan veni vi out koa Ahi mul ling alen museh ien. Ka minoumontei en isen Serusalem, veni vi taon onen Ahi koa vi Asuv Houlu.
5:35 Sam 48:2
36 Ka minasuv kattei selusien onami en vatumi emun veni kami misakras mivahiles ahil vatas vamai voh vuo vavopoli. 37 Sakini, navong miviten tounah tai, mihehitenis keke 'anatin numoni', vuo 'nirmumontei'. Ka hevus, mihoumoni suk. Veni navong misak visi keke mivasuv kat selusien onami en etai tounah, sakien koanek ka ven Temat.”

Hihiseien Usil Sakien ten Sa Kes Mahien Keil h 

38 Iesu mules visein meatin keil vit, “Kami milonge keke Mosis meng kat avu keil onami telamu vit,'Munak mipurun meten meatin sav, akilea avapurun metomi. Ka munak mimuti lat lohon meatin tai, akilea avati lat lohomi tai.'(Eks 21:24) 39 Ka inau naviteni min kami keke minasa kestei tounah koa meatin tai mumoni tisa min kami. Munak meatin tai kovas veasom en usite matu, kimaeni heovas usite meil emun. 40 Ka munak meatin kur keik milvaha en kot ka keih katuk keke kovasan eisin omom mini, kimaeni hekur kot omon ten anni emun. 41 Munak meatin tavaeen tai keih katuk kovahus ateli onen vahi kilomita tai, kihousi kilomita helu. 42 Ka munak meatin tai visuk en tounah tai, kisani mini. Munak meatin tai vit vakur tounah tai onom ten avong havivis, konaseseintei, kimaeni mini.”

Hihiseien Usil Sakien koa Avatie Lat Envatien min Koakeil avi Vativieh i 

43 Iesu mules visein meatin keil vit, “Kami milonge keke Moses meng kat avu keil onami telamu vit,'Emihehat tuemi keil.'(Lev 19:18) Ka,'Mihetisa min koakeil avi vativieh onami.'
5:43 Areingeingen out kave akur selusien enek eni.
44 Ka inau naviteni min kami keke emihehat koakeil avi vativieh ral min kami ka mihehis ven koakeil asan mahien min kami. 45 En sakien koanek, mihetie lati keke mivi titan Tata onami koa ro en out nesa. Veni kei sakin meteiai ritin en koakeil atisa ka en koakeil emun atahos. Kei sakin ous mus vakas atan osen koakeil amal ka koakeil akalkali emun. 46 ?Veni munak emvat koakeil enges evatuk, komundemi keke Ahi hesan masmasien hehat minuk veni? !Vuo! !Meatin koa alah takis ran meatin sav ral min meatin vasi keil emun amumon vati sakien koanek! 47 ?Ka munak miselus tahos min tuami keil enges, sakien enek tahos mukave? Veni koakeil areingeingen Ahi, ral min meatin vasi keil emun, amumon vati sakien enek.

48 “En sakien vasi keil onami ka en rendemien vasi keil emun, mihemal revi hesuval Tata onami en out nesa mal revi mok.”

Copyright information for `PMA