Mat 6
a6:5 Luk 11:2-4
 
Mat 6
c6:19 Luk 12:33-34; 16:13; 12:22-31
 

Matthew 6

Hihiseien Usil Sakien koa Asan Kataunien min Livere Keil

Iesu visein meatin keil vit, “Navong mimumon sakien keil koa tahos min meatin sav keil, mihelei kat revi keke minoumontei en meten meatin keil keke avahouhou ven kami. Veni munak mimumoni mukonek, Tata onami en out nesa hersantei mun uite teni min kami.

“Sakini navong misan kataunien min meatin koa tounah onen tovuol, minoumontei nasuval sakien onen koakeil amumonis en hilive. Veni navong asak mese keke avasan tounah, uva en eim ten hihiseien keil ka en mari sise keil, ka asakin meatin toumien one amuh tounah koa suval amaru keke meatin keil imai vituai avales asa koa avoumoni ka avahouhou min keil. Anatin eli naviteni min kami, keil akur ui umen one tuai ka irkurtei mun uite teni en out nesa. Ka navong mikataun meatin koa tounah onen tovuol, mihoum raeng eni en sise koa time tahos keil emun onami iteingeingeni. Hesakini meatin keil iteingeingen sakien tetahos keil onami, ka Tata onami, koa les asa koa meatin keil amum suai eni, kei hesan uite teni min kami.”

Hihiseien Usil Sakien ten Hisien a 

Iesu mules visein meatin keil vit, “Navong mivis, minoumontei nasuval koakeil amumonis en hilive. Veni keil evati avahatimal ka avahis en eim ten hihiseien keil ka en vali sise keil keke meatin keil avales keil eni. Anatin eli naviteni min kami, keil akur vasin uite one tuai. Ka navong mivis min Ahi, tahos imok keke miheha neim, miheoteh en voiteh, ka mihehis heha min Tata onami koa meatin keil asakras avalesi. Ka Tata onami, koa les asa koa meatin keil amum suaini, kei hesan uite teni min kami.

“Ka navong mivis, minaselustei nahi houlu nasuval koakeil areingeingen Ahi. Veni koakeil enek amundemi avit ahi keil one itaegon hisien keil one munak amang vas onge houlu ral min selusien houlu. Anatin, minoumontei nasuval keil, veni navong mirvistei veah mini, Ahi Tata onami kilea tuai asa koa kotamurei eni.

“Sakini navong mivis mihehiteni hemukok,

'Ahi Tamemai koa koro en out nesa,
mal keke mevouhou minuk veni isom vi votut.
10 Mevis keke hiasuvien onom hemai hel ven komai
ka tounah vasi koa emivati vakistal
hekistal hehi anatin en out netan hesuval mul tuai en out nesa.
11 Kisan anien eli min komai
hevinvin ten avong kosa.
12 Konaleletei mun natisa min komai ven tisaen keil onomai,
veni komai mun merleletei mun vatisa min koakeil amumoni romaltei en komai.
13 Konamaentei li sakvisien takeih keil anamai anasakin komai menamot en tisaen,
ka kiting koe komai ran hen Temat.
6:13 Mulamu, navong meatin keil amutis ris leta koanik onen Matiu, keil koa aling selusien koanik mul ien koa vit, 'Veni hiasuvien, keihoen ka hetetamenien mul enuk lises ka lisenges. Anatin.'

14 “Munak methos onami mul en meatin sav koa amumoni romaltei min kami ka minaleletei mun natisa en keil, Tata onami koa mul en out nesa, kei, methos onen hel en kami emun. 15 Ka munak mirmumontei methos vatal min koakeil enek, Tata onami emun sakras voumon methos vatal min kami ven tisaen keil onami.”

Hihiseien Usil Mukave Uval ven Anien

16 Iesu mules visein meatin keil vit, “Navong mival ven anien keke mivahis, minoumontei nasuval koakeil amumonis en hilive. Veni navong uval ven anien amumon veinae tisa keke meatin keil avalei kilea keke amai kat keil. Anatin eli naviteni min kami, keil akur vasin uite teni tuai. 17 Ka navong kami mival ven anien keke mivahis, tahos imok munak mihekas veinami ka mihesak vilei en hilumi hesuval koa mimumoni en avong vasi. 18 Hesakini, meatin sav keil asakras avalei kilea keke kami mimul mival ven anien, ka Tata onami koa meatin keil asakras avalesi, kei enges helei kilea eni. Anatin, Ahi Tata onami, koa les asa koa meatin keil amum suaini, kei hesan uite teni min kami.”

Hihiseien Usil Demvoen ten Tounah Keil ten out Netan c 

19 Iesu mules visein meatin keil vit, “Kami minalah kattei tounah onami nahi houlu en out netan. Veni tounah keil onami en out netan, kakoros ka rosta lukilea luvapuruni, ka tarhena keil akilea avaha neim ka avahenani. 20 Ka tahos imok keke mihelah kat tounah keil onami hehilelau en out nesa. Veni en out enek, kakoros ka rosta lusakras luvapuruni, ka tarhena keil asakras avaha neim ka avahenani. 21 Veni moulien onami hel en out koa milah kat tounah tetahos keil onami mul ien.

22 “Metomi suval laet ten avemi. Munak metomi tahos, mimul en meneai ka avemi kilea voumon sakien keil koa atahos. 23 Ka munak metomi tisa, mimul en mankoli ka mihoumon sakien keil koa atisaso. Ka munak laet onami vi mankoli, mankoli ten tisaen hehi marite mok en moulien onami.
6:23 Meneai ka mankoli vi tatavolien usil sakien keil orer, ka Iesu mul selus usil sakien orer ral tounah vasi ten out netan. Navong romumon tounah koa tahos eni, romul en meneai, ka navong romumon tounah koa tisa eni, romul en mankoli.


24 Ka Iesu vit, “Meatin tai sakras voum min masta elu (2). Veni munak kei hesak visi voumoni, tin heat tai, ka enhehat tai en keilu; vuo rendemien onen hel en tai ka helei sesein tai en keilu. Misakras mivaha netan min Ahi vatal min tounah keil ten out netan.

25 “Sakini, veni koanek vi anatin, tahos minandemkotei en usite ten asa koa miheani vuo asa koa mihemuni, vuo asa koa miheav koe avemi eni. ?Mukave, romoul keke rovanian enges? !Vuo! ?Ka aver mul keke rovav koe en eisin enges? !Vuo! Moulien koa mul en kami tahos imok mulin asa koa mimul mikani. Ka avemi tahos imok mulin eisin koa mikav koe eni. 26 Miheles vis aman keil koa amul amuka. Keil arluhluh tei, ka armusuhuttei en anien ae keke avalingi vaha en votevav ome. Avaseini armumontei vamukonek, ka Ahi Tata onami en out nesa mul vengan keil. Ka en meten Tata onami, kami mitahos mulin aman keil enek. Sakini miheilea mihehit Ahi helosil kat revi kami. 27 Demkoen ven tounah keil sakras voumon moulien onami vataveah tamun.

28 “?Ka mimundemko en usite ten eisin vensa? Mihendem usil vis hungevai keil koa amul amoul. Keil armumtei vuo arrilitei eisin ome. 29 Ka naviteni min kami keke asuv houlu Solomon telamu, eisin omon tahos vis tahos imok, ka hungevai keil enek amusin tahos imok muli kei. 30 Ahi mul musin en hungevai keil tahos imok, avaseini amoul en eivorohus avong tanges, ka visuvong teni, amaleles ka umotmot. Ka evus, amuteas ruaini ka asoni va en ahang. ?Ka munak Ahi musin en keil mukok, mimundemi keke kei sakras vasin koe kami? !Ei, demkatien onami havivi ramat!

31 Sakini, minandemkotei usil asa koa miheani, asa koa mihemuni, vuo asa koa mihesin eni. 32 Veni vati demkoen koanek vi onen koakeil arkileatei Ahi. Veni Ahi Tata onami kilea revi en tounah vasi koa mitamurei eni en moulien onami. 33 Ka koa hetetamen imok keke mihemaen Ahi hemai hehi asuv houlu en moulien onami ka mihekur maluen onen hehi onami. Navong mimumoni mukonek, tounah vasi emun ten moulien, Ahi hesani min kami. 34 Sakini minandemkotei mun usil tounah keil koa mihekuri visuvong, veni miheilea mihendem usili visuvong esuk. Veni sakvisien keil koa mihehisu eni kosa, avinvin ten kosa etin. Minalahtei demkoen keil ten visuvong namai nahi ten avong kosa.

Copyright information for `PMA