Mat 7
a7:1 Luk 6:37-42
 
Mat 7
b7:7 Luk 11:9-13
 
Mat 7
c7:13 Luk 13:24
 
Mat 7
d7:15 Luk 6:43-44; 13:25-27
 
e7:22 Rev 20:11-15
Mat 7
f7:24 Luk 6:47-49
 

Matthew 7

Hihiseien Usil Sakien Koa Rolei Revi Usite onen Meatin Sav Keil a 

Iesu mules visein meatin keil vit, “Minalei revitei usite onen meatin sav keil keke mivahotin tisaen keil one, veni munak mimumoni, Ahi emun helei revi usite keil onom ka hehotin tisaen keil onami. Veni Ahi helei revi usite onami housil vati sakien koa kami mimul mimumoni en meatin sav keil. Munak mimumoni en sakien koa merau, Ahi houmoni min kami hemukonek. Ka munak mimumoni en sakien koa keih, Ahi houmoni suk hekeih min kami.

“?Vensa mimul mirie sukeai koa havivi mok koa mul en meten tuomi, ka emirovatei mivailea en mari mavuliai koa mules en metomi? ?Vensa mimul miviteni min tuomi mivit, 'Tuo li, kimaenau makulat sukeai ran metom,' navong mari mavuliai mules en metomi? !Kami mimumon sakien koa tahos en hilivemi enges! Tahos imok keke helamu mihekulat mari mavuliai ran metomi, ka hevus, kami mikilea suk mihelele revi keke mivakulat sukeai ran meten tuami.

“Tounah keil koa avi votut onen Ahi, minasantei min huli keil koa ihiles ka iat purun kami eris. Anatin, minasontei tounah koa tahos imok min vuas keil veni keil ihetan eni enges. En sakien enek, minasak vistei minahisein meatin keil koa alei sesein anatinien onen Ahi, veni indem maeni ka ihiles ipurun kami eris.”

Hihisien Usil Sakien koa Rokilea Rovahis Ahi ven Tounah b 

Iesu mules visein meatin keil vit, “Naviteni min kami, tahos keke kami miheles mihehis Ahi en tounah, ka kei hesani min kami. Anatin, asa koa emivati mivakuri, munak mihelekati, mihehotini. Hisien onami hesuval koa mimul mimutiti voiteh onen Ahi, ka hesakini kei heseh voiteh onen min kami. Ven meatin vasi koa avisi ven tounah, keil ikuri suk; koakeil amul alekat tounah, keil ihotini; ka voiteh heseha min koakeil amul amutiti.

“?Isei en kami tata keil hesan meralihat min natnali navong kei visuk en anien? 10 ?Vuo hesan amot tatisa tai mini navong kei visuk en mesau? 11 Sakini, avaseini keke kami mivi meatin tisa keil, mikilea en sakien koa mivasan tounah keil tetahos min titiali onami keil. ?Ka mukave en sakien onen Ahi Tata onami en out nesa koa tahos imok? Sakien onen heli onami ka hesan tounah keil tetahos min koakeil amul avisi veni.”

12 Ka Iesu viteni vit, “En tounah vasi koa mimumoni, mihoumoni min meatin sav keil hesuval koa emivati keke keil emun umoni min kami. Veni rendemien koanik vi vatte ten Mengkatien keil onen Mosis ka Tisien onen provet keil telamu.”

Hihiseien Usil Hemukave Rovaha en Out Nesa c 

13 Iesu viteni vit, “Kami, sakien koa mikilea mivaha en out nesa romaetei. Tahos keke miheha neim eni ka en meteau koa havivi. Veni meteau sav mul koa marite, ka meatin houlu uva neim ien ka amual en sise koa mae. Ka en keite teni, ihotin mahien koa hemariso mok. 14 Ka meteau koa ten sise takeih ten moulien vi havivis, ka teis en meatin keil ihotini.”

Hihiseien Usil Hemukave Avalei Kilea Provet Taliluvosien Keil d 

15 Iesu sel kat meatin keil vit, “Kami mihelei kat revi kami keke provet taliluvosien keil analuvostei kami. Veni en hilive, ales keil asuval sipsip koa atahos ka amerau, ka en tine, keil asuval huli rendan keil koa atisa ka akat purun meatin keil. 16 Mihelei kilea keil heka en heite ten moulien one. Meatin keil asakras avalah hei tavoi ran aikatiat, vuo hei manggo ran vati ueas. 17 En vati sise enek, vatiai vasi koa atahos amul ason heite koa tahos, ka vatiai keil koa atisa amul ason heite koa tisa. 18 Vatiai koa tahos sakras vason heite koa tisa, ka vatiai koa tisa sakras vason heite koa tahos. 19 Ka vatiai vasi koa hersontei heite koa tahos, itei lati ka isoni heha en ahang. 20 En vati sakien enek, mihelei kilea provet taliluvosien keil heka en heite koa mul en moulien one.

21 “Meatin houlu koa amul avise nau en 'asuv' kosa, irvatei en out nesa koa Ahi vi asuv houlu ien. Koakeil enges amumon asa koa Tata onak en out nesa envat keil avoumoni iha ito hetal mini. 22 En avong koa ilei revi usite onen meatin keil, e  houlu imai venau ka ihiteni minau usil usite one ihit, '!Asuv, Asuv! ?Mukave? En isom mevit lein selusien koa Ahi sani min komai. En isom mevile lat ninin tisa keil ka memumon merikel keil houlu.' 23 Hevus, nihit retai en selusien koanek min keil nihit, '!Kiha ranau, keik koa komumon tisaen keil! !Inau narkileatei keik varei!'”

Hihiseien Usil Hemukave Moulien Orer Housil Selusien onen Ahi f 

24 Evus, Iesu selus ekor min meatin keil ral min tatavolien tai vit, “Munak kami milong selusien keil ekek onak ka mimum usili, misuval meteisau tai koa mumon eim onen mul en atan koa keih. 25 Ous mus, mari oai mue, ka eang muhuh keih kat eim enek. Ka romerangtei, veni mumoni mul en atan koa keih. 26 Ka munak kami koa milong selusien keil ekek onak ka mirmumtei usili, kami misuval unu tai koa mumon eim onen en veien enges. 27 Ous mus, mari oai mue, ka eang muhuh keih kat eim enek. !Ka eim onen merang vita ka rasil li varei!”

28 Navong Iesu visein meatin keil evus, marmari vangi meatin keil amuti manin en hihiseien keil onen, 29 veni kei visein keil suval koa kur hehiseien keil ran Ahi varei. Hihiseien keil onen rosuvaltei onen tiser keil ten Mengkatien onen Mosis koa avit ris selusien onen tiser sav keil enges.

Copyright information for `PMA