Psalms 19

Tounah keil en teilang ka mengkatien keil onen Ahi avit lat xei

Hitu keil en out nesa amul arie lat muohien onen Ahi,
ka teilang emun mul vothot en tounah koa kei mumoni.
Navong meteiai mea roha, mul eris vit usil keihoen onen Ahi va vio ... mea ris out mulan;
ka avati emun mules vitehiten ileilien onen Ahi Asuv va vio ... mea ris.
Koakeil enek arselustei, ka rea tovuol rovataengoni en keil;
ka mukos, longlongien keil one usil Ahi ka rahit out vasi;
meatin vasi keil ten out netan akuri.
Meteai en out nesa, Ahi lingi en ven.
En visokon vasi, mea ral min sien;
kei suval meatin koa tin si ka sak mese ven lohlohien tai.
Mea en usite ten teilang ka muloh va en usite sav.
Kei sakin out vasi mutin, tounah tovuol vato suai eni.

Mengkatien onen Ahi

Mengkatien onen Ahi Asuv tahos imok;
sak revi tiner.
Hatkatien onen, rokilea rovaling desien orer eni;
ka mul san meteisauen min koakeil one tovuol.
Mengkatien keil onen Iahova mal vasi,
ka koakeil along kati, isi keil.
Ren Ahi, rolonge rolong kilea,
ka san ileilien minir vasi.
Kei mal keke rorie lat houhouen orer min Ahi,
rehoumoni lisenges.
Mengkatien keil koa sani minir avi anatin;
keil amal vasi.
10 Keil atahos imok loh lin tounah vasi keil ten out netan;
kasien teni mulin tounah keil taanian.
19:10 Kasien teni mulin 'hani.'

11 Keil aviseinau, eisisil onom, en sakien keil koa tahos.
Ka koakeil amum usili, akur uite koa tahos imok.

12 Heisavos koanek anatin, komai mesakras mevalei vasin tisaen keil onomai.
Sakini, Ahi Asuv, munak namumon tounah tisa tai nareingeingeni, kilah lati li ranau.
13 Ka tisaen keil koa namundem maenis namumoni, kiting koe inau li nanamottei mun eni.
Konamaentei tisaen keil enek analamunau en sise koa romaltei.
Hesakini, moulien onak kilea vatolas,
ka nimaluv ran keihoen ten tisaen.
14 Ahi Asuv, komutut inau ka nakilea nito suai enuk.
Ekvati mok keke selusien keil onak ka rendemien vasi keil onak, hemal en rendemien onom.
Copyright information for `PMA