Psalms 40

Masmasien min Ahi ven Kataunien Keil Onen

Navis Ahi Asuv ven kataunien onen ka narosini.
Ka kei san ralingen ka raengon tangien onak.
Kei kulat nau navong numot en mari avul tai,
navong namarindo en tanmelmel koa matetel, kei leh lat nau.
Kei ling nau en out tahos,
koa nakilea mato revi ien.
Ahi Asuv viseinau en souen hau tai,
souen koa nakilea mamasmas Ahi orer eni.
Koan keil araengon longlongien enek ihouhou min Ahi Asuv,
ka keil iling desien one eni.

Sien hel en koakeil aling desien one en Ahi Asuv.
Keil armusiltei ninin taluvosien sav keil,
ka arkapiltei vatal min koakeil akur keihoen ran nana keil.
Ahi Asuv onomai, tounah houlu komumoni min komai.
!Tounah tovuol vasuvaluk!
Keik koling more hatkatien houlu ven komai.
Meatin tovuol vahuli lat keil vasi,
avi houlu ramat, nasakras mahit lelat keil vasi.

Sanien keil emrovattei.
Koseseini varei navong amunit vuseri en out ten sanien,
vuo uas tirendan keil vasakin methos onom hel en keil.
!Vuo! Keik komumon ralingomai mevalong katuk.
Sakini, mahiteni minuk mahit, “Kolesi, numai ke.
Mengkatien keil koa mul en Tus Votut, komumoni venau.
!Ahi Asuv, ekvati mok mousil hatkatien keil onom!
Lises, nihuli kat hihiseien keil onom en moulien onak.”

Sakini, en vangi meatin keil ten out Isrel,
navit meseni keke kutut komai.
Nirmusehtei, niles nihitehiten asa koa komumoni en komai.
10 Nirvuli kattei longlongien usil mututien onom.
!Vuo! Lisenges, naselus usil leikatien ka kataunien onom min meatin keil.
Navong meatin keil onom alah ruai,
lises navitehiteni keke rendemien onom mul en komai ka korie lat envatien onom min komai.

11 Ahi Asuv, konakulattei enmahisien onom ranau.
Lisenges kiting koe nau ven envatien onom ka leikatien tahos onom enau.
12 Tounah tatisa houlu aka rahit inau,
nasakras mahuli vasi.
Tisaen onak keil mea en mesai,
ka narlei kileatei mun sise mousili.
Nalesi keke tisaen keil onak, navuli keil loh lin hiluk,
sakini desien onak mot.
13 !Ahi Asuv, kiting koe nau!
!Kikataunau li!
14 Koakeil avit avouas nau,
kilikat rasilin keil hesakini keil imemou.
Koakeil asi keil ven mahien keil onak,
ilohosai ka ulie hetisa.
15 Koakeil amul arohtoh enau,
iti manin navong huhuen keil one ral minau hemai hehi heisavos.

16 Ka koakeil umai venuk,
ilonge hetahos ka sien hel en keil.
Ka koakeil kosak koe keil isi keil,
keil ihitehiteni lises ka lisenges ihit,
“!Isen Ahi Asuv vina nesa!”

17 Ahi Asuv, avek merau ka navi livere enges.
Emnavobongentei nau li.
Keik kovi Ahi onak koa mul kataunau ka kosakinau namaluv ran mahien keil onak.
!Kimai li lah venau!
Copyright information for `PMA