Psalms 47

Ahi Losil Kat Out Netan

Vatiamal onen Korah mutis souen enek

!Meatin vasi keil, miheovasvas hemi en sien!
Mihemakul en isen Iahova hetal min masmasien.
Mihemasmasi ven Iahova, koa vi houlu mok, keih emok,
kei vi mari asuv houlu koa mul losil kat out vasi netan.
Kei sakinir roloh lin meatin sav keil,
kei ling kantri sav keil amul en her.
Atan koa romul ien, kei rie lati hehi orer,
ka me-Isrel keil koa kei envat keil, asi keil veni.

Ahi vina nesa en vulin ten keihoen onen,
Iahova vina nesa ral min makulien ten sien ka verien ten hon keil.
!Mihesau masmas Ahi!
!Mihehati lat isen asuv houlu orer!
Ahi vi asuv houlu ten out vasi netan,
tahos rehou lati hetal min souen keil.

Ahi mul rondan en vulin ten keihoen onen koa votut,
kantri keil ten out netan mul en hen.
Hetetamen keil ten kantri vasi keil umai en out tas
ral min meatin keil onen Ahi koa Ebraham va netan mini.
Keihoen onen Ahi loh lin keihoen onen meatin tavaeen keil onen kantri vasi keil,
kei mul losil kat out vasi.
Copyright information for `PMA