Psalms 67

Meatin Vasi Keil Ten Out Netan Ihati Lat Isen Ahi

Ahi, kitokol kat komai en enmahisien onom,
kiles komai hetal min tahosien onom.
Kumoni hetie lat rendemien onom min meatin keil ten out netan,
keke availea sise ten mututien onom.

O Ahi, meatin keil ihati latuk.
Anatin, meatin vasi keil ihati lat isom.
Meatin ten kantri vasi keil isi keil ka isau en sien,
keil isau veni keik kosan hakot min meatin keil en sakien ten maluen,
keik komulamun meatin ten kantri vasi keil en out netan.
O Ahi, meatin keil ihati latuk.
Anatin, meatin vasi keil ihati lat isom.

Ahi onomai, komul kosan tokolkatien min komai,
komul kosakin amas mul en atan osomai.
Anatin, tokolkatien onom mul en komai,
ka koakeil ten out netan ilesi ka ihouhou minuk.
Copyright information for `PMA