Psalms 71

Hisien onen Meatin koa Matu

O Iahova, numai mato suai enuk,
konamaentei vativieh keil onak anali nau ka anasakin nau nenamemou.
Kimai kikataunau ka kiting koe nau ran tounah koa vasut nau,
veni keik komal revi.
Kitaengon isien onak eli ka kutut inau.
Keik kihi out tatosuaien onak,
koa nakilea mato suai ien.
Kisan mengkatien keke mututien onak hemai hekistal
veni enuk naling desien onak suval naling desien onak en eim tai koa keih imok.

O Ahi onak, kikulat nau ran hen koakeil amum kalkali,
ran keihoen onen koakeil armunanatei ka amum romaltei.
O Ahi Asuv, naling desien onak enuk.
O Iahova, nakul anatin enuk navong navi havivi rokol kosa.
Navareingein moulien onak enuk.
Keik koro ral minau en avong avasi nau rokol kosa.
Lisenges, nimasmasuk.

Kosakin moulien onak suval metai tai koa meatin sav keil alesi ka aleisungeni,
veni keik koring koe nau keih.
En avong vasi, namasmasuk.
Navitehiten hetetamenien onom lises.
Konaso seseintei nau navong nihi ulmatu,
konalokoveintei nau navong keihoen onak hetovuol emun.
10 Vativieh keil onak avit avou vini nau,
keil avit usil inau ka amumon hatkatien va kat inau.
11 Aviteni avit, “Ahi lokoveini ka tovuol vakatauni,
sakini rovakatau usili ka rovahuli kati.”

12 O Ahi onak, konaltei soutin ranau,
kikalah kimai kikataunau.
13 Kisakin koakeil avit avapurun nau,
imemou ka ise hetisa.
Koakeil uvae kat nau,
kisakin keil imemou ka kuvinvini keil.
14 Ka inau, niling desien onak enuk,
ka nil nimasmasuk hehi houlu vis hehi houlu mok.
15 Inau, nil nihit usil umen keil onom koa mal,
niselus usil sakien keil ten mututien onom lises,
avaseini nasakras mahuli vasi.
16 Nimai hetal masmasien ven tounah koa keik, Iahova koa kovi Ahi onomai, komumoni ral min keihoen onom.
Nihit usil umen keil koa mal koa keik enges, komumoni.

17 Koviseinau navong navi ehon rokol kosa,
ka namules navitehiten momore tounah koa komumoni.
18 Sakini, navong nihi ulmatu ka hiluk hoh,
konalokoveintei nau li, Ahi.
Kitos hetal minau navong nihitehiten usil keihoen ka hetetamenien onom
min titiali keil koa amul, ka min koakeil koa il imai veah ikatau.

19 Ahi, sakien keil ten maluen onom marite vis marite mok.
Komumon marmari tounah keil ka tovuol vasuvaluk.
20 Avaseini komaenau navisu en avong takeih ka sakvisien keil,
katau eni, kisan ris keihoen minau.
Munak nimesai vesesal mamat,
ka kitali lat ris nau ran matien.
21 Kisan ris hetetamenien minau heli koa nakuri mulamu.
Kisuv lat ris rendemien onak.

22 Nisau masmasuk hetal min kitar onak.
O Ahi onak, nimasmasuk veni komusil kat hatkatien keil onom lises.
Anatin, hetal min iukelele onak, nisau en souen keil heha minuk,
Ahi onen me-Isrel keil koa kovi votut imok.
23 Nimakul en sien,
nisau hetal min moulien vasi onak
veni keik komutut nau.
24 Nihit usil sakien ten maluen onom lises,
veni koakeil avit avapurunau, keik kolikat rasilin keil ka kosakin keil alohosai en memouen.
Copyright information for `PMA