Psalms 8

Ahi Ling Tounah Vasi ten Out Netan en Hen Meatin Keil

!Ahi Asuv onomai,
hetetamenien onom ka vasi out netan!
Keihoen onom en out nesa,
titiali keil ka tivava emun keil amusau usili.
Keik koro en out tetahos ran koakeil ouvae ral minuk;
Koring koe koakeil avit avapurunuk.

Navong nales teilang koa komumoni,
naseipat nales more avati ka hitu keil koa kolingi en vule,
narendem usil meatin enges ten out netan.
?Vensa komundem keil?
?Komul kolei kat keil vensa?

Keik komumon meatin keil amulin tounah sav keil,
kosan keihoen, muohien ka houhouen min keil.
Keikos Ahi, kovi hetamen en keil.
Koling tounah vasi keil koa komumoni en hen meatin keil;
korie lat keil avi hetetamen mulin tounah vasi ten out netan:
sipsip ka buluk ka tirendan vasi keil koa amual;
aman keil koa amuka en teilang,
ka mesau keil ka tounah vasi keil emun ten atas.

!Ahi Asuv onomai,
hetetamenien onom ka vasi out netan!
Copyright information for `PMA