Psalms 85

Hisien keke Ahi Hesa Ris Tahosien Onen

Natnali Korah keil amutisi

Iahova, kosik kovasan tahosien en atan osom.
Anatin, kosan ris amas en atan ten out Isrel.
Komumon methos onom en komai, meatin keil onom koa memum tisa minuk,
korleletei mun vatisa en sakkalkalien keil onomai.
Tinom rovepengtei mun en komai,
koviles vurohien onom va ran komai.

Ahi ten mututien onomai, kiling ris komai en vulomai,
ka tinom naattei mun komai.
?Ahi, mukave? ?Tinom heat komai lisenges?
?Kitie lat vurohien onom min titamai ka havimai keil?
Kisan ris tahosien min komai li, meatin keil onom,
keke mekilea mevamasmasuk.
O Iahova, kitie lati min komai envatien onom koa sakras vavus,
ka kutut moulien keil onomai.

Kami meatin keil mihetaengonau.
Inau, nilong kat asa koa Iahova koa vi Ahi hehiteni minau.
Kei vat kati hesan tomat min meatin keil onen.
Ka meatin votut keil onen irmumontei mun unounien one.
Anatin eli keke kei sak mese voutut koakeil avouhou mini.
Kei hekataun ir keke toralien onen koa hetetamen imok kilea val en atan oser.

10 Ahi hetie lat envatien onen min meatin keil onen
ka keil usil kati lisenges.
Keil um hemal en meten,
ka kei hesan tomat hel ven keil.
11 Meatin keil ten out netan iseipat ka usil kat Ahi,
ka kei en out nesa hetapehai en keil ka hetali lat keil en maluen onen.
12 Anatin keke Iahova houmon amas minir,
hesakin aneite hehi houlu hekistal en atan oser.
13 Maluen onen Iahova mulamu eni
ka mul sak mesen sise onen.
Copyright information for `PMA