Psalms 9

Masmasien Va min Ahi Veni Mul San Mahien min Meatin Tisa Keil

Ahi Asuv, nimasmasuk eli en moulien onak;
Nihitehiten mormore tounah keil koa komumoni.
Nisau hetal min sien venuk;
nisau masmasuk, Ahi ten keihoen.

Navong kokistal, koakeil amumon rea ral minau alohosai;
aretavel, umot, ka umat.
Navong kolei revi usite onak,
rendemien onom mal ka vi anatin.
Kolonge usite onak mal
ka komumoni tahos minau.

Kosan mahien min koakeil amusil ahi sav,
komu rasilin meatin tatisa keil.
Meatin etai hermundem kattei mun keil.
Koakeil amumon rea ral minau, ivupuol,
komuas meteimal keil one vi atan.
Ka meatin keil ehevongbongen moulien one.

Ka Ahi, kei vi Asuv Houlu ten lises;
kei rondan en avet ral keihoen onen voumon kot en meatin keil.
Kei losil kat out netan ral min maluen;
lei revi usite onen meatin keil ten kantri vasi keil ral min rendemien koa mal.

Ahi Asuv sak ven koakeil meatin sav amumoni keih en keil,
kei lei kat revi keil en avong takeih.
10 Ahi Asuv, koakeil akileak, indesinuk,
kosakras kovalokovein keil navong umai venuk.

11 Rehesau masmas Ahi koa rondan en Hou Saeon.
9:11 Saeon vi hou koa taon ten out Serusalem ka Eim Votut onen Ahi lumul ien.

Rehehitehiteni en out vasi en out netan asa kei mumoni.
12 Ahi mundem kat koakeil akur mahien,
enrovobongentei tangien one.
Koakeil amum tisa en onen keil, Ahi sak kesi min keil.

13 !Ahi Asuv, emhemahis li nau!
Kilei kilea mahien onak
koa meatin keil mete tisa enau amumoni minau.
Kikulatnau ran matien, Asuv onak,
14 hesakini nakilea malomal en meten meatin keil ten out Serusalem,
ka nihiteni min keil tounah vasi koa sakini namasmasuk.
Nasinau houlu veni kokur koe moulien onak.

15 Meatin keil koa areingeinguk umot en avul koa akili onen meatin sav vamot vaha ien;
ka ai tetapolis koa alingi, rapus lat keil eris.
16 Ahi Asuv, vothot en kei sasen ka mul lei revi usite onen meatin keil.
Ka asa koa meatin tatisa amumoni mai kat ris keil.

17 Matien vi keite onen meatin keil amum tisa,
ka onen koakeil asesein Ahi.
18 Kosa, alei sesein livere keil,
ka hermuktei nek en avong vasi;
keitinesek, koakeil tounah tovuol desien one mai vi heisavos,
ka irtotei hemukonek lises.

19 !Ahi Asuv, amai! !Konamaentei meatin etai nandem heisav enuk!
Kilah ruain koakeil amusil ahi sav imai venuk ka kisan mahien min keil.
20 Ahi, kumon keil imetaunuk,
kisakin keil ilea keke avi meatin enges ten out netan,
asakras aval vataveah.
Copyright information for `PMA