Revelation of John 11

Ahi Sila Meatin Onen Elu keke Luvahiten Selusien Onen

Evus, asani minau ai tai koa nakilea nakur mita eni, ka aviteni minau avit, “Kiha ka kihuli mita ten Eim Votut onen Ahi ka ten ahor ten sanien teni. Ka kihuli lat koakeil amul uva netan en Eim Votut enek. Ka vieh teni, konahulitei mita teni, veni Ahi sani tuai min koakeil arkileatei kei. Keil imai ihetan en Taon Votut avati hanumau elu ka elu mun (42). En avong taosen tai handred elu ka hanumau etel (1,260) enek,
11:3 Avati 42 ka avong 1,260, keilu vasi luvi sua 3 ka hap teni.
inau nisan keihoen min provet onak helu (2) koa luheselus usil anatinien onak. Luhesin en eisin tatangien ka nisila keilu keke luheha luheta usil selusien onak min meatin keil.”

Meatin keilu enek luvi vati olip keilu
11:4 Sakaraea 4:11-14 vit usil vati olip keilu koa luvi eiloheh keilu onen Ahi.
ka laet elu koa lumulomal en meten Ahi Asuv koa mul losil kat out vasi netan.
Ka munak meatin etai hehit vapurun keilu, ahang hekistal en ongealu ka hean lin koakeil avi vativieh ral min keilu. En sise enek, meatin etai koa hehit vapurun keilu, hemat. Luhekur keihoen luvating koe ous keke hermustei hetokol keite ten avong koa luheta usil selusien onen Ahi eni. Luhekur keihoen keke lukilea luvahiles oai vasi keil avamai avahi ara. Ka keihoen hel en keilu keke luvailea luvasan mahien savsav keil vapurun meatin keil en out netan en avong vasi koa keilu ealuvati.

Navong luhehit vasin selusien koa Ahi sani min keilu, tirendan tisa tai hemea ran avul koa keite teni tovuol. Kei helin keilu en vaeen ka hou vinvini keilu. Ka teiai onealu hematil heles en sise ten mari taon ten out Serusalem koa Iesu, Asuv onealu, amuti kati en aiveave eni. Avise mari taon enek en eis suai elu (2) mun: Sodom vuo Isip. Meatin keil ten kantri vasi, vatiamal vasi, selusien vasi ka vati meatin savsav keil ilei mamah en teiai onealu avong hetel (3) hetokol taviai ten avong sav teni. Keil irmaentei avatahin keilu. 10 Meatin vasi keil ten out netan isi keil hehi houlu ven matien onealu. Umon mari ale keil ka isa kekes en sanien min keil, veni provet keilu enek lusakin mahien houlu akikistal mai en meatin keil ten out netan.

11 Ka en taviai ten avong ehat (4), Ahi hesan sehien ten moulien min keilu ka luhelomal eris. Ka koakeil ilesi, imaleilei hehi houlu. 12 Evus, provet keilu enek luhetaengon rea tai heka en out nesa hehit, “!Luma nesa ekok!” Ka en meten meatin keil avi vativieh ral min keilu, luhehina en out nesa en mahmah tai.

13 En hati avong enesek, mari alu tai helu. Koanik hesakin hatte koa tai en eim keil ten mari taon enek hemerangle, ka hatte koa ouhat (9) eni hetahos heles. Ka meatin keil hetokol taosen oulu (7,000) imatmat. Meatin sav keil koa ilesi imaleilei houlu ka ikul anatin en hetetamenien onen Ahi ten out nesa.

14 Aue li! Koanik hehi keite ten avong tatisa koa elu (2). !Ka, aue, oh aue li, hekatau en koanik, koa etel eni hemai hekistal hervitei tuetin!

Angelo Muh Amaru Koa Oulu

15 Evus, vativar ten angelo keil koa oulu (7) en keil muh amaru onen. Navong muhi, naraengon rea keil takeih ka en out nesa aviteni avit,

“Kosa, hiasuvien onen Ahi Asuv orer
ka onen Kristo onen mita en out netan,
ka Ahi helosil kati lises ka lisenges.”
16 Evus, elda hanumau tai ka ehat (24) koa arondan en titi vule keil ten keihoen en meten Ahi, keil umot uva netan mini, nae vita rokol atan ka amul amasmasi. 17 Amusau mini avit,

“!Ahi Asuv ten Keihoen koa
komul kosa ka komul mulamu,
meviten hihuri minuk veni keik korie lat mari keihoen onom
ka kumai suk kovalosil kat vasi out netan.
18 Koakeil arkileatei keik, tine katiat,
ka avong ten vurohien onom emai.
Koanik vi avong koa kiling hakot
en meatin keil umatmat.
Koanik vi avong koa kisan ui umen
min provet keil koa avi eiloheh keil onom,
ka min meatin votut keil onom koa avouhou enuk,
koakeil avi hetetamen vita rokol meatin kuren keil emun.
!Koanik vi avong kipurun koakeil amul apurun meatin sav keil en out netan!”
19 Evus, metareh ten Eim Votut onen Ahi en out nesa seha, ka ales Bokis ten Hatkatien mul ien. Navong metareh seha, ahil vilahil, voulul mut ka muroh, alu tai mulu, ka merali laklas houlu rivtiv ran teilang.

Copyright information for `PMA