Revelation of John 13

Tirendan Tisa Elu Lumea

Evus, nales tirendan tisa tai mea ran atas. Vatin oulu (7) ka hon keil onen halualim (10), ka vatluvoluv mul retai en hon vasi keil. Ka tetai en vatin keil akur kat eis ten hetetamenien koa avenani ran Ahi vahi one. Tirendan tisa enek nales aven suval aven lepard, alen keil suval alen bear ka ongon suval ongon laeon. Min tirendan tisa enek, dragon san keihoen onen, vulin ten keihoen onen, ka hiasuvien onen keke valosil kat tounah houlu. Tai en vatin tirendan enek, tounah tai kula koa alesi avit hemat veni. Ka navong mai ris moul tahos, meatin keil ten out vasi netan amuti manin eni ka amusil kati. Koakeil vasi enek uva netan min dragon veni kei san hiasuvien onen min tirendan enek. Ka uva netan emun min tirendan tisa avit, “?Isei kur keihoen suvali? ?Isei kilea vavae vatal mini? !Meatin tovuol!”

Ahi maen tirendan enek val vahasi kei vahiteni keke hetetamenienen onen vinvin en hetetamenien onen Ahi. Ahi maeni mun keke vakur hiasuvien valosil kat out vasi netan avati hanumau elu ka elu mun (42).
13:5 Avati 42 vi sua 3 ka hap teni.
Kei mul musili Ahi, selus karen isen ka out ro ien, ka selus karen koakeil emun aro en out nesa. Kei, Ahi maeni vahu vatal meatin votut keil onen va vio ... u rasil lin keil. Tirendan enek, Ahi maeni vakur keihoen valin vatiamal vasi keil, valin meatin keil ten kantri vasi keil ka selusien vasi keil, ka valin vati meatin savsav keil emun. Meatin vasi keil aro en out netan iha netan mini. Ka koakeil enges varei ise amutisi en Tus ten Moulien koa onen kei koa amuasi emat suval sili sipsip, keil irvatei netan mini. Ise, amutis kati mul en Tus ten Moulien enek mulamu en avong amumon out netan.

!Munak ralingomi mul, mihetaengoni! 10 Isei koa Ahi vat kati keke avahuli kati, kei ihuli kati. Isei koa Ahi vat kati keke avatili vini en naef tavaeen, kei itili vini eni. Sakini, Ahi mul vis meatin votut keil onen ilomal hekeih en demkatien one.

11 Evus, nales tirendan tisa tamun kistal ran atan. Hon onen elu (2) suval hon sipsip, ka selusien onen keih suval dragon. 12 Tirendan tisa koa mulamu maeni valosil kat tounah keil en usite onen. Kei keih kat meatin keil koa amul en out netan keke iha netan min tirendan tisa koa mulamu, koa tounah tai kula ka moul eris tahos. 13 Tirendan enek koa mai katau, kei mumon memari merikel keil suval mumon ahang ka en teilang nesa mita netan keke meatin vasi keil alesi. 14 Ahi maen tirendan enek koa mai katau, va luvos meatin vasi keil ten out netan en merikel keil koa mumoni en usite onen tirendan koa mulamu. Kei luvos meatin keil ka sakin keil amumon nana tai ven tirendan koa asal vini en naef tavaeen tai ka moul eris tahos keke avahouhou mini. 15 Ahi maen tirendan tisa koa katau voumon nana onen tirendan koa mulamu valeh eang ka vamoul. Sakini, nana enek kilea vaselus ka vasan matien min koakeil arvatei netan mini. 16 Tirendan koa katau keih kat meatin vasi keil avakur metai en he matu vuo en veinae: koakeil avi hetetamen vita rokol koakeil avi meatin kuren enges, koakeil tounah one houlu vita rokol koakeil avi livere, koakeil amaluv vita rokol koakeil avi slev. 17 Meatin koa metai enek tovuol eni, kei sakras vahulhul vuo voumon tounah tahulien. Metai enek vi isen tirendan tisa koa mulamu vuo hulhulien ten isen. 18 Aneite ten koanek hekistal en koakeil avi metaluv, veni koakeil ileilien one mul akilea avoum lat aneite ten hulhulien teni. Hulhulien ten isen vi ahetai ahetai ahetai (666).

Copyright information for `PMA