Revelation of John 16

Angelo Keil Amutah Lin Mahien Keil ten Vurohien Onen Ahi koa Mul en Pesin One

Evus, nalong rea takeih tai mul selus en Eim Votut va ven angelo oulu (7) enek vit, “Miheha mihetah mahien koa mul en pesin oulu (7) ten vurohien onen Ahi hehita en out netan!”

Sakini angelo koa mulamu en keil va ka mutah mahien koa mul en pesin onen vita en out netan. Sakin utua tatisa keil akikistal en koakeil akur metai ten tirendan tisa ka koa uva netan min nana onen. Ka mahien teni tisa vis tisa mok.

Evus, angelo koa elu (2) en keil mutah mahien koa mul en pesin onen vita en atas ka atas mai suval hatira ten meatin koa mat. Koanek sakin tounah vasi keil amoul en atas umatmat.

Evus, angelo koa etel (3) en keil mutah mahien koa mul en pesin onen vita en oaisal keil ka vulioai keil. Sakin oai keil enek aviles umai avi ara. Ka naraengon angelo koa losil kat oai keil ten out netan vit,

“Ahi koa kovi votut,
komul kosa ka komul mulamu,
hakot keil enek komumoni mal.
Meatin keil enek asakin ran meatin votut keil onom ka provet keil amue,
sakini komul kosan ara min keil amuni.
!Mukonek, keil amul akur kes asas keil amumoni!”
Evus nalong rea tai en ahor ten sanien koa vit,

“!Ahi Asuv ten Keihoen!
!Anatin eli, hakot keil onom vi anatin ka mal emok!”
Evus, angelo koa ehat (4) en keil mutah mahien koa mul en pesin onen vita en meteiai. Sakin meteiai ritin keih vis keih ka kan purun aven meatin keil ral ahang teni. Meteai kan purun keil en titinien teni koa keih emok. Ka meatin keil arvilestei ran tisaen one ka arvou lattei Ahi ven hetetamenien onen. Vuo, keil amusisil va kat isen koa keihoen ten mahien keil mul en hen.

10 Evus, angelo koa elim (5) en keil mutah mahien koa mul en pesin onen vita en vulin ten keihoen onen tirendan tisa koa mulamu. Sakin mankoli mutaloh koe out vasi koa losil kati. Meatin keil aval lohe ven mahien keil akuri 11 ka amusisil va kat Ahi ten out nesa ven mahien ka utua tatisa keil one. Ka keil arvilestei varei ran sakkalkalien keil one.

12 Evus, angelo koa ahetai (6) en keil mutah mahien koa mul en pesin onen vita en mari Oaisal Upretis. Sakin oaisal enek mai memes keke vasan sise min asuv houlu keil ten out ist ka meatin tavaeen keil one avoual eni avaha. 13 Evus, nales ninin tatisa etel (3) koa ales keitel telsuval frog. Keitel telmul telmemea ran ongon dragon, ran ongon tirendan tisa, ka ran ongon provet taluvosien
16:13 Provet taluvosien koanik vi tirendan tisa elu koa kistal en Rev 13:11-15.
onen.
14 Frog keitel enek telvi ninin tisa keitel koa telmul telmumon memari merikel keil. Ninin tisa keitel enek telva ven asuv houlu vasi keil ten out netan keke telvalah ruain keil avamai out vatas. Imai keke avasak mesen keil ven mari vaeen koa hel en Mari Avong ten Hakot onen Ahi ten Keihoen. 15 Keil ilah ruai en out koa avise en selusien Hibru vit 'Armagedon'.

Navong namul nalesi, Asuv Iesu viteni vit, “!Mihetaengon revi! Inau nimai en avong koa miheteingeingeni hesuval tarhena tai. Ka tokolkatien onen Ahi hel en kei koa hetos helele ka hel hesak mese en avong vasi ven amairisien onak. Kei hesuval meatin koa ro lele ka musin revi keke munak heti manin en tounah, kei hermemoutei veni mul kaka hon.”

17 Evus, angelo koa oulu (7) en keil mutah mahien koa mul en pesin onen en mesaiuai. Navong mumoni, rea takeih tai selus ka en vulin ten keihoen koa mul en Eim Votut vit, “!Vus tuai!” 18 En hati avong enek, ahil vil, voulul mut ka muroh, ka mari alu mulu. Alu koanik mulin alu sav keil koa akur out en avong koa Ahi ling meatin keil en out netan rokol avong koanik. Anatin, alu koanik tisa mok mulin alu savsav vasi keil. 19 Sakini mari taon ten out Babilon sipasi heite etel (3), ka mari taon keil en kantri vasi keil amerangli. Ahi mundem kat tisaen keil onen koakeil ten mari taon koa aling eis suai eni vi Babilon, ka san mahien ten mari vurohien onen va kat keil. 20 Navong alu mulu keih mukok, aelan vasi keil ka hou vasi keil amerangli avupuol varei. 21 Ran teilang, memari laklas umotmot koa retai en keil ameas rokol kilo hanumau elu (40). Navong umotmot, abon meatin keil ka keil esuk amusili Ahi ven mahien ten laklas enek tisa vis tisa mok.

Copyright information for `PMA