b2:11 Rev 20:14; 21:8

Revelation of John 2

Selkatien Va Min Sios ten out Efeses

Iesu viteni minau vit, “Kitis selusien koanik heha min angelo koa losil kat sios ten out Efeses kihit:

“Koanik selkatien koa ka ven kei koa vuli kat hitu oulu (7) mul en hen matu ka kei koa mual luhu en gol laet oulu (7).
Nalei kilea en umen takeih onami ka nalesi mukave mikur sakvisien keil ral min rendemien koa taveah. Nakilea keke milei sesein koakeil amusil tisaen. Koakeil avit avi eiloheh keil onak ka arvitei anatin, kami milei rahit moulien one ka mivotini keke keil avi uti luvosien. Nakilea mun keke mikur sakvisien keil ral min rendemien koa taveah. Mikur mahien houlu ven isok, ka en demkatien onami, mimulomal keih veah, avemi romahtei.

“Ka tounah ekek nakur kati va kat kami: milokovein envatien koa, mulamu, mirie lati minau ka min meatin sav keil. Mihendem kat sakien ten envatien koa mirie lati mulamu, ka mihelei kilea keke kosa mimul soutin ranau ka mirrie lattei mun sakien ten envatien. Sakini, mihiles ran tisaen enek onami ka mihoumon sakien keil koa hesuval asa mimumoni mulamu. Munak mihermumontei, nimai ven kami ka nikulat laet onami ran vulin. Ka koanik nalesi mimumoni mal: tinomi katiat kat sakien onen koakeil amusil hihiseien onen Nikolai
2:6 Nikolai mul visein meatin keil keke aven meatin ka ninin koa mul ien, luteteisav. Sakini, tisaen vasi keil koa meatin mul mumoni ral min aven sakras vahilehilu en ninin onen.
suval koa inau mun tinok kati.

“!Munak ralingomi mul, mihetaengon selusien koa Ninin mul viteni va min sios keil! En vaeen ten demkatien, koakeil avatimal keih, nimaen keil ian heite ten vatiai ten moulien ten lisenges koa moul en Ah esen Ahi.”

Selkatien Va Min Sios ten out Samerna

Evus, Iesu vit risi minau vit, “Kitis selusien koanik heha min angelo koa losil kat sios ten out Samerna kihit:

“Koanik selkatien onen tai koa sakin tounah vasi mul ka hesakini hevuol eris; kei koa mat ka moul eris ran matien.
Nakilea keke sakvisien keil onami houlu ka tounah onami tovuol en out netan veni mimusil kat inau. Ka en usite ten demkatien onami, tounah onami avi houlu. Nakilea keke vangi meatin tai avit avi Siu kati ka amul asel kutut kat kami. Ka inau nales keil suval arvitei Siu anatin. Vuo, keil avi vangi meatin tai onen Temat. 10 Minametauntei mahien keil koa vesesal mivahisu eni. !Mihetaengoni! Hervitei tuetin, Temat hesakin ison kami koa miheha en eim takeih keke mihekur sakvisien keil. Mihelonge hetisa ten avong halualim (10) ka miheles mihendem kat inau. Mihelomal hekeih ven inau, avaseini isan sakvisien keil min kami hetokol matien onami. Hemukonek, nisan uite ten demkatien min kami koa vi moulien ten lisenges.

11 “Munak ralingomi mul, mihetaengon asa koa Ninin mul viteni va min sios keil. En vaeen ten demkatien, koakeil avatimal keih, keil irmattei mun en matien koa elu b  ten lisenges.”

Selkatien Va Min Sios ten out Pergamam

12 Evus, Iesu vit risi minau vit, “Kitis selusien koanik heha min angelo koa losil kat sios ten out Pergamam kihit:

“Koanik vi selkatien onen tai koa kur naef koa kan lualu.
13 Nakilea out kave miro ien, taon koa hiasuvien onen Temat mul ien. Mukos, kami mivi anatin minau ka mirlokoveintei demkatien onami. Anatin, mivatimal keih en out koa keihoen onen Temat mul ien, avaseini miro en avong koa meatin keil ten out keisom amu vini Antipas, koa musil katnau ka vitehiten more longlongien usil nau lises.

14 Ka tounah ekek nakur kati va kat kami: mimaen tei en kami amusil vati hihiseien keil koa asuval hihiseien keil onen Balaam telamu. Kei visein asuv houlu Balak mukave valamun me-Isrel keil avamot en tisaen en sakien koa avan anien koa asani tuai va min nana keil ka avoum vatisa vatal min ahin keil.
2:14 Namba 25:1-3; 31:16
15 En vati sakien enek, tei en kami amusil hihiseien keil onen Nikolai
2:15 Rev 2:6
koa asuvali.
16 !Sakini, kosa, mihiles ran tisaen keil onami! Munak mihervilestei ran hihiseien keil enek, hervitei tuetin, inau nimai ven kami ka nivae kat kami hetal mari naef koa mul kistal ka en ongok.

17 “!Munak ralingomi mul, mihetaengon selusien koa Ninin mul viteni va min sios keil! En vaeen ten demkatien, koakeil avatimal keih, inau nisan tei manna koa mul suai.
2:17 Siu keil amundemi avit navong Ahi heling hiasuvien onen en out netan, hesan manna koa Mosis ling suaini en voite teni min meatin keil onen iani.
Ka nisani mun hetetai min keil ahat taoh koa amutis eis hau tai mul ien. Kei nges koa kuri ilea en eis koa mul ien, ka meatin sav keil iteingeingeni.”

Selkatien Va Min Sios ten out Taeatira

18 Evus, Iesu vit risi minau vit, “Kitis selusien koanik heha min angelo koa losil kat sios ten out Taeatira kihit:

“Koanik selkatien koa ka ven Natin Ahi, koa meten vihil keih imok suval ahang, ka koa alen tanetan vihil suval oai ten vane.
2:18 Rev 1:14
19 Nakilea en asa kami mimumoni. Nalei kilea en envatien onami, demkatien onami, umen onami, ka mukave mikur sakvisien keil ral min rendemien koa taveah. Nalei kilea keke kosa, mimum houlu mulin tounah koa mimumoni navong mikur rohtoh en demkatien onami.

20 “Ka tounah ekek nakur kati va kat kami, mimaen ahin koa sakien onen suval Sesebel telamu vato vatal kami. Kei mul vise sasen eni vit vi provet onen Ahi. Hihiseien keil onen mul liluvos eiloheh onak keil keke tahosis umon sakien ten hoeaso ka ian anien koa asani tuai min nana keil. 21 Inau nasani mini tuai avong keke vahiles ran tisaen onen, ka kei enrovattei vahiles ran sakien ten hoeaso onen. 22 Mihelei kat revi kami, inau nisan mesaien tai koa marite min ahin enek keke hetonges en vulin. Ka munak koakeil amum tisa ral mini irvilestei ran sakien keil one, keil emun ilonge hetisa hehi houlu mok hetal mini. 23 Inau nu vini meatin keil amusili. Hesakini, meatin keil ten sios vasi keil ilea suk keke inau enges nakilea rendemien ka envatien onen meatin vasi. Ka ilea mun keke nisani tetai min kami housil asa koa kei mumoni.

24 “Ka kami sav ten out Taeatira mirmusiltei hihiseien tatisa keisom. Kami misesein hihiseien enek koa meatin sav keil avise en 'memari ileilien keil onen Temat'. Min kami, nirling etai mun mengkatien koa meas. 25 Mihehuli kat mengkatien enges koa mikuri tuai hetokol avong nimai ris.

26 “En vaeen ten demkatien, koakeil avatimal keih ka amules amumon umen keil onak hetokol avong nimai ris eni, inau nisani min keil keihoen keke ilosil kat kantri keil:

27 Anatin, nisani min keil, keihoen ten losilkatien suval koa Tata onak sani minau, suval koa avit,

Losilkatien one hekeih imok.
U lin koakeil vasi avavae vatal min keil,
hesuval u vahas veiaoi koa kilas hehi soksokeite.(Sam 2:9)
28 Ka nisani mun min keil Melan, hitu ten visokon.
2:28 Hitu koa avise en Melan mul vihil keih navong vesesal out valan. Kei vi tatavolien usil hatkatien min Kristin keil koa ilomal hekeih en mankoli ten sakvisien keil veni laet ten amairisien onen Iesu Kristo mul mai vesesal.
29 !Munak ralingomi mul, mihetaengon selusien koa Ninin mul viteni va min sios keil!”

Copyright information for `PMA