b20:6 Rev 20:14; 21:8
c20:8 Esekiel 38-39
d20:13 Rev 1:18

Revelation of John 20

Koakeil Demkatien One Keih Alosil Kat out Netan Sua Heite Taosen Tai

Evus, nales angelo tai mita ran out nesa, en hen vuli kat ki ten Vulvul koa keite teni tovuol ral min sen tai koa meas ka mariso. Kei vuli kat mari dragon, amot telamu
20:2Senesis 3:1
koa avise en Temat vuo Setan, ka par kati en sen koanik ten sua taosen tai (1000).
Anatin, angelo soni vita en Vulvul, koteh kat metareh teni, ka sak kati keih. Kei sakini keke Temat sakras valuvos ris kantri keil emun hetokol navong sua taosen tai (1000) heli. Ka hekatau en sua keil enek, Ahi hemaeni hemaluv eris ten avong havivi.

Evus, nales meatin keil arondan en vulin keil ten keihoen ka Ahi maen keil asan hakot min meatin vasi. Nalesi emun koakeil koa, mulamu, ara koteh vatie veni avitehiten anatinien usil Iesu ka selusien onen Ahi. Anatin, keil enek arvatei netan min tirendan tisa vuo nana onen, ka arkurtei metai onen en veinae vuo en he. Nales koakeil enek amoul eris ran matien ka amul alosil kat out netan ral min Iesu Kristo ten sua taosen tai (1000). Koanik vi mearisien koa mulamu. Meatin savsav keil koa umat imea ris esuk navong sua taosen tai (1000) heli. Tokolkatien onen Ahi hel en koakeil koa Ahi rali lat keil keke imea ris ran matien en avong koa mulamu, ka keil irmattei mun en matien koa elu ten lisenges. b  Keil ihi votut ka imai ihi pris onen Ahi ka onen Iesu Kristo, ka ilosil kat out vasi hetal min Iesu sua taosen tai (1000).

Ahi Son Temat Vita en Vuli Ahang

Navong sua taosen tai (1000) heli, Ahi hemaen Temat hemaluv ran eim takeih onen. Ka kei heha heluvos meatin ten kantri keil en out vasi netan, houmoni en kantri ten out Gog ka Magog. c  Temat helah keil imai out hetas ven rea, ka keil imai ihi houlu vis ihi houlu mok hesuval veien koa mul en sisi atas keil. Keil imai ihilelau en out vasi ka il rahit out koa meatin keil onen Ahi umon votevav ome ien ka ika rahit mari taon koa envatien onen mul ien. Ka Ahi hesakin ahang heka ran teilang nesa, hehita hean lin koakeil avi vativieh ral min keil. 10 Evus, Temat koa mul luvos keil, Ahi hesoni hehita en mari ahang koa suval ahang ten vane, out koa ason tirendan ka provet taluvosien onen luva ien. Ekonek, ahang hean keil meneai ka vongien, ka ilong mahien teni lises ka lisenges.

Avong ten Hakot Emai

11 Evus, nales mari vulin ten keihoen koa muoh ka nales kei koa rondan ien. Out netan ka teilang nesa luva rani, luvuol ka arlestei mun keilu. 12 Ka nales meatin vasi keil koa umatmat amulomal vesesal en mari vulin ten keihoen, hetetamen keil vita rokol meatin kuren keil, koakeil amarite vita rokol koakeil avi havipi. Evus, nalesi avue tus keil koa amutis kat sakien vasi keil onen meatin retai mul ien. Ka avue tus tamun, Tus ten Moulien, koa amutis kat isen meatin keil koa ikur moulien ten lisenges. Evus, Ahi san hakot min meatin vasi keil enek musil sakien keil one koa amutis kati mul ien. 13 Atas sa lat koakeil umat ien. Ka Matien ka Hedis, d  keilu mun lusa lat koakeil umat koa luvuli kat keil. Anatin, en meatin keil vasi, Ahi san hakot min keil musil asa koa keil amumoni. 14 Evus, Matien ka Hedis, Ahi son keilu luva en vuli ahang koa vi matien koa elu ten lisenges. 15 Navong avuli Tus ten Moulien koa amutis kat isen meatin keil koa ikur moulien ten lisenges, koakeil arvotintei isei mul ien, ason keil uva en vuli ahang enek.

Copyright information for `PMA