Revelation of John 21

Out Nesa ka Out Netan Lumai Luvi Heite Hau

Evus, nalesi keke teilang nesa ka out netan koa luvi heite hau lukikistal. Teilang nesa ka out netan telamu luvupuol, ka atas tovuol emun. Nales taon ten out Serusalem koa vi heite hau, kei mun kistal. Anatin, Taon Votut onen Ahi mul mita netan ran out nesa ven Ahi. Nalesi keke taon enek tahos imok suval ahin koa musin revi kei ven tetalihen onen keke vaha vales meatin onen. Evus, nalong rea takeih tai selus ka vesesal en mari vulin ten keihoen onen Ahi vit,

“!Kosa, teim onen Ahi mul
ral min meatin keil ten out netan!
Kei heto hetal min keil,
ka keil ihi meatin keil onen.
Ahi kei enges varei heto hetal min keil,
ka hehi Ahi one.
Kei houl siamet ran mete.
Matien ka tangien hetovuol,
isien ka mahien hevus varei.
Veni sakien keil telamu ten mahien ka matien irlestei mun.”
Evus, tai koa rondan en mari vulin ten keihoen viteni vit, “?Milesi? !Kosa, namumon tounah vasi mai vi heite hau!” Evus, kei viteni mun minau vit, “Kitis selusien koanik, veni selusien keil enek vi anatin ka meatin kilea valing desien one eni.” Ka kei viteni vit, “!Vus tuai, namum vasin asa koa ekvati moumoni! En tounah vasi keil koa mul, inau naro mulamu eni ka nito katau eni. Anatin, nasakini mul ka nisakini hevuol. Min etai koa maroro kati, inau nisa maen oai hemuni koa ka en vulioai koa san moulien ten lisenges. Koakeil ihatimal hekeih en vaeen ten demkatien, keil ikur tounah keil vasi enek ranau keke hehi one ten lisenges. Inau nihi Ahi one, ka keil ihi titak. Ka en usite onen koakeil ulie metau, koakeil aviles ran Iesu, koakeil amusil kat sakien keil ten out netan, koakeil amu vini meatin, koakeil amumon sakien ten hoeasoen, koakeil amumon eimas, koakeil uva netan min nana keil, ka koakeil taliluvosien — koakeil vasi amukonek, keil iha en vuli ahang koa suval vuli ahang ten vane, koanik vi matien koa elu ten lisenges.”

Serusalem Hau Mita Ran out Netan

Tai en angelo koa oulu (7) koa akur pesin oulu (7) vilelau en mahien ekor, kei emai venau ka vit, “Amai, ka nitie minuk ahin koa hetetalihe hetal min kei koa suval sili sipsip.” 10 Evus, Ninin onen Ahi sienau ka angelo kur nau melvina nesa en mari hou tai. Ekonek, kei rie Serusalem Hau koa vi Taon Votut minau, ka nalesi mul mita netan ran out nesa ven Ahi. 11 Kei vihil ral min muohien onen Ahi. Anatin, nalesi vilahil suval ahat koa tahos emok, suval saspa koa mekaikai suval kilas. 12 Vieh ten taon mariso ka taveah vina nesa. Meteau teni teindan elu (12) ka angelo teindan elu (12) alei kokoe en meteau keil enek. Nesa en meteau keil enek, amutis isen vatiamal teindan elu (12) onen me-Isrel keil. 13 Meteau etel amul en usite vasi keil; etel en usite koa ist, etel en usite koa saot, etel en usite koa not, ka etel en usite koa wes. 14 Vieh ten taon enek, vatte teni vi mari ahat teindan elu (12), koa amutis isen eiloheh teindan elu (12) onen kei koa suval sili sipsip mul ien.

15 Angelo koa selus minau kur ai tai koa vi gol koa akur mita eni. Nalesi navong vuli mita keil ten taon, ten meteau keil, ka ten vieh keil emun teni. 16 Taon enek, usite vasi keil teni ral min taveah teni vatte tas. Navong angelo vuli, votini keke taveah teni vi stadia
21:16 Stadia tai suval out ten futbol koa marite. Ka 12,000 stadia vinvin en 2,400 kilomita.
taosen teindan elu (12,000).
17 Evus, angelo kur hulhulien ten vieh teni, votini keke matetel teni rokol kiubit handred tai hanumau elu ka ahat emun (144).
21:17 Kiubit tai suval taveah ten urulin meatin rokol kalihen. Ka 144 kiubit vinvin en 60 mita.
Navong angelo kur hulhulien ten tounah keil enek, kei musil sakien ten hulhulien onen meatin keil ten out netan.
18 Vieh amumoni en ahat koa merentas koa avise en saspa. Ka taon enek, amumoni en gol koa mutolas ka vilahil suval navong meteiai ritin en kilas. 19 Ahat keil koa avi vatte ten vieh ten taon, keil amosan en keil en mormore ahat keil. Koanik ahat keil koa alingi ihi vatte teni: koa mulamu (1) vi saspa, koa elu (2) en keil vi safaea, ka koa etel (3) en keil vi akat. Ka nesa eni, koa ehat (4) en keil vi emeral, 20 koa elim (5) en keil vi onikis, ka koa ahetai (6) en keil vi kanilian. Evus, koa oulu (7) en keil vi krisolaet, koa outel (8) en keil vi beril, ka koa ouhat (9) en keil vi topas. Ka nesa eni, koa halualim (10) en keil vi krisopres, koa teindan tai (11) vi takois, ka koa teindan elu (12) vi ametis. 21 Meteau teindan elu (12) keil enek avi veimesau keil tetahos; tetai en meteau keil enek amumoni en mari veimesau tas. Sise keil ten taon vi gol koa mutolas emok, koa vilahil suval kilas koa mekaikai.

22 En taon enek, narlestei Eim Votut tai val ien, veni Ahi Asuv ten Keihoen ka kei koa suval sili sipsip mul en mesai ka meatin keil akilea iha netan min keilu en out vasi. 23 Taon enek, muohien onen Ahi enges ritin eni, ka kei koa suval sili sipsip vi meneai teni. Sakini meatin keil teni armundem ramat entei meteiai vuo avati. 24 Meatin keil ten out netan ual en meneai teni, ka asuv houlu keil emun ilah mormore tounah keil one iha eni keke isani min Ahi ka min kei koa suval sili sipsip. 25 Meteau keil ten taon enek itah lises. Irkoteh entei keil avong etai, veni vongien hetovuol en out enek. 26 Meatin keil ten out netan ilah mormore tounah keil one heha en taon keke isani min Ahi ka min kei koa suval sili sipsip. 27 En taon enek, meatin koa sak kalkali, vuo koa mumon tounah tatisaso, vuo koa mul luvos, vule tovuol ien. Ka koakeil enges ise amutisi en Tus ten Moulien onen kei koa suval sili sipsip, keil enges akilea iha ka ito en taon enek.

Copyright information for `PMA