Revelation of John 22

Oaisal ten Moulien

Evus, angelo rie lati minau Oaisal koa Oai ten Moulien mul muloh eni. Nalesi mekaikai ka vilahil suval kilas koa meteiai ritin eni, ka mul mue ran mari vulin ten keihoen onen Ahi ka onen kei koa suval sili sipsip. Oaisal enek mue luhu en mari sise ten taon. Ka en usi oaisal vasi keilu, vatiai keil amoul ien koa heite teni mul san moulien ten lisenges. Keil akur heite avong teindan elu (12) en sua tai, avong tai en avati vasi keil. Ka oute keil ten keil akilea vakulat mesaien ran meatin keil ten kantri vasi. En out enek, sesendanen hetovuol emun.

Mari vulin ten keihoen onen Ahi ka onen kei koa suval sili sipsip luhel en taon enek, ka meatin vasi keil onen koa avi eiloheh keil onen iha netan mini.
Keil iles veinan, ka isen itisi hel en veinae. Vongien hetovuol emun, ka meatin keil irmundem ramat entei mun laet vuo meneai, veni Ahi Asuv hehi meneai one. Ka keil ilosil kat out vasi hesuval asuv houlu keil lises ka lisenges.

Amairisien Onen Iesu

Evus, angelo viteni minau, “Selusien keil enek vi anatin ka akilea avandesini. Ahi Asuv koa san ninin onen ven provet keil, kei san angelo onen vatie min eiloheh keil onen asa koa hekur out hervitei tuetin.”

Evus, Iesu viteni vit, “!Mihetaengoni! !Nimai hervitei tuetin! Ka tokolkatien onen Ahi hel en koakeil along kat selusien ten hothotien usil asa koa hemai koa nara usili en tus koanik.”

Inau, Sion, nalonge ka nales vasin tounah keil ekek. Ka navong nalonge ka nalesi evus, namalingling ka numot nuva netan en alen angelo koa rie tounah keil enek minau. Ka kei viteni minau vit, “!Konoumontei namukonek! Inau mun navi eiloheh enges onen Ahi suvaluk, suval tumali keil koa avi provet keil koa akur hothotien keil, ka suval koakeil emun amusil kat selusien koa mul en tus ekek. !Kiha netan min Ahi enges!”

10 Ka kei viteni mun minau vit, “Konapil koetei selusien usil asa koa hemai koa Iesu ra usili minuk natal min siil tai, veni avong vesesal keke tounah keil ekek hekur out. 11 Sakini, koakeil amul amum tisa ka kalkali, akilea avales avahikit sakien keil tatisa ka takalkalien. Ka koakeil amul amum mal ka moulien one vi votut, akilea avales avahikiti sakien keil koa mal ka vi votut.”

12 Evus, Iesu vit, “!Mihetaengoni! !Nimai hervitei tuetin! Nikur ui umen ka mahien hetal minau, ka nisani hetetai min meatin keil housil asa koa keil en tai amumoni. 13 En tounah vasi keil koa mul, inau naro mulamu eni ka nito katau eni. Anatin, nasakini mul ka nisakini hevuol, namum rohtoh eni ka num ekor eni.”

14 Tokolkatien onen Ahi hel en koakeil moulien one mutolas suval akas motein eisin ome muto. Ahi hemaen keil imai ian heiai ten vatiai keil koa heite teni mul san moulien ten lisenges. Hemaen keil ika en meteau keil ten taon imai neim. 15 Ka hae en taon enek hehi koakeil amusil kat sakien keil ten out netan: koakeil amumon eimas, koakeil amumon sakien ten hoeasoen, koakeil amu vini meatin, koakeil uva netan min nana keil, ka koakeil avi uti liluvosien.

16 “Inau, Iesu, koa nasila angelo onak vahit mesen tounah keil ekek min kami koa mika en sios vasi keil. Inau navi kei koa provet keil ara usili vit Kilesi, kei koa avise en laeon ten vatiamal onen heka en vatiamal onen asuv houlu Deved ka hekur ris losilkatien onen.
22:16 Aesea 11:10
Inau navi Melan, hitu ten vikoson koa avit kati vit hemai.”
22:16 Num 24:17


17 Ninin onen Ahi ka ahin onen kei koa suval sili sipsip mul viso vit, “!Almai!”

Koakeil vasi ilong hothotien koanik ihiteni mun ihit “!Almai!”

!Kami keil maroro kat kami, almai! Anatin, mihemai mihemun oai koa hesan moulien ten lisenges min kami. Asa maen oai enek vi sanien tai min koakeil evati avamai avakuri.

Selusien Ekor

18 Inau, Sion, nasel kat kami vasi li mok koa milong selusien ten hothotien usil asa koa hemai koa Iesu ra usili mul en tus ekek. Munak meatin etai heling kat etai mun selusien eni, Ahi heling kat mahien koa avit usili en tus ekek hel ien. 19 Ka munak meatin etai hekulat etai selusien rani, Ahi hekulati rani vangi heiai ten vatiai keil koa heite teni san moulien ten lisenges ka hermaentei vaha neim en Taon Votut onen Ahi koa avit usili en tus ekek.

20 Kei koa vothot en selusien koanik mul viteni vit, “!Anatin! Nimai hervitei tuetin!”

!Anatin eli, Asuv Iesu kimai!

21 Navisi keke more envatien onen Asuv Iesu heto hetal min kami vasi. !Anatin!

Copyright information for `PMA