Ruth 1

Sakvisien Takeih Keil Mai en Moulien onen Ahin Isrel Tai

Rut 1:1-5

En avong mulamu, avong koa Iahova mul san metai keil avakataun me-Isrel keil veni arkurtei veah asuv houlu tai valosil kat keil, an tisa mai en out koa me-Isrel keil aro ien. Anatin, ous romustei avong houlu ka sakin anien tovuol ka amai kat meatin keil. Sakini, meatin tai ten out Betlehem en atan onen me-Sudah, kei va en kantri ten out Moab, isen Elimelek,
1:1 Elimelek, aneite teni vi 'Ahi vi asuv houlu'.
ka kei kistal en mari vatiamal onen Efrat. Kei va ral min ahin onen, koa isen Noume, ka ral min natnali keilu, isealu Malon ka Kilion. Telva telro sua vahis en out enek.
Ka navong telro en out enek, Elimelek mat, sakini Noume ronges ral min natnali keilu. Evus, natnali keilu enek luretalihe ral min ahin Moab elu, isealu Oripa ka Rut. Navong telro en out enek sua halualim (10), Malon keilu Kilion emun lumat. Sakini, Noume kei sesuk ro, meatin onen ka natnali keilu emun teltovuol.

Noume Keilu Ahineli Rut Luva Ris en Meteimal ten out Betlehem

Rut 1:6-22

Avati vahis muli, ka Noume kur longlongien keke Ahi rokol kat meatin keil onen ka sakin anien ose moul tahos eris. Sakini, Noume sak mesen kei valokovein kantri ten out Moab ral min havinahin keilu enek. Keitel vasi enek telva ruai telva ris en atan onen me-Sudah. Ka navong telmul telvaha, Noume viteni min keilu vit, “Kamil milheha ris milheles mama kati onamil ka milheto ris hetal min keilu. Inau navis min Ahi keke hetie lat tahosien min kamil hesuval koa milrie lati minau ka min natkuli keilu koa lumat tuai. Navisi mun keke Ahi hesakin kamil milhetetalihe eris ka milhehotin tahosien hetal min meatin hau keilu onamil.”

Evus, Noume kav kat keilu ka vit valokovein keilu luvaha. Ka keilu lurangis Noume
10 ka luviteni mini luvit, “!Melsakras melvalokoveinuk eli! Melhousiluk, tovaha tovato vatal min meatin keil onom.”

11 Ka Noume vit kesi min keilu vit, “Ahineli keilu, tahos imok milheha ris. ?Vensa varei milvit milvousil nau? ?Milmundemi keke nilea nikur ris ehon elu mun keke milhetetalihe hetal min keilu? 12 !Vuo! !Milheha ris! Inau navi tovuli ramat keke matetalihe eris. ?Avaseini munak navit matetalihe ris kosa, ka nikur ris ehon elu mun, 13 kamil milkilea milvatosil keilu vaha vio ... luvamatu vinvin luvatetalihe? Vuo, koanek sakras vakur out. Ahineli keilu, kamil milkilea veah milvales tahosien, ka inau nasakras. Milnahousiltei nau. En moulien onak, nalonge mah houlu veni hen Iahova keih kat nau.”

14 Keilu lumuai eris. Evus, Oripa kav kat avu tisa onen, selus kor ral mini, ka lokoveini va ris en vatiamal onen. Ka Rut, kei vuli kati keih, enrovattei vaha rani. 15 Sakini, Noume viteni mini vit, “?Rut, kolesi? Tumahin va ris ven meatin keil onen ral min ahi onen keil. Keik emun kusili kiha en vatiamal onom.

16 Ka Rut vit kesi mini vit, “!Konasilatei nau nanaha ranuk! Kimaenau mousiluk. !Out kave kiha ien, inau mun niha ien! !Out kito ien, inau mun nito ien! Meatin onom keil ihi meatin keil onak emun. Ka Ahi onom hehi Ahi onak emun. 17 Out koa kimat ien, inau mun nimat ien, ka itahin nau en out enek. Inau nirmaen etai tounah hekulat nau niha ranuk heha vio ... ialu tai hemat esuk. !Koanek vi hatkatien onak ka Iahova hesan mahien koa hekeih ramat hemai kat inau munak nitali kotehei!”

18 Navong Noume lei kilea keke Rut, rendemien onen keih vousili, kei rosakvistei mun vasila vaha.

19 Sakini, keilu lumual va vio ... lurokol meteimal ten out Betlehem. Ka navong lukistal en out enek, meatin keil ten out enek amuti manin en keilu. Ka ahin keil amusil avit, “?Noume ekek?”

20 Ka Noume vit kesi min keil vit, “Minahisetei nau li mun en 'Noume' ka mihise nau en 'Mara' veni Iahova sakin moulien onak vilelau en mahien.
1:20 'Noume', aneite teni vi 'tahosien' ka 'Mara', aneite teni vi 'mahien'.
21 Navong namea ran out ekek, hek keilu vilelau en tounah keil koa tahos. Ka kosa, Iahova kur ris nau numai hek hon enges. ?Vensa varei kami mivise nau en Noume veni Ahi ten Keihoen mumoni keih ramat minau ka san mahien keil minau?”

22 En sakien enek, Noume mea ran kantri ten out Moab ka va ris Isrel ral min ahineli Rut koa vi ahin Moab. Ka avong lurokol meteimal ten out Betlehem, bale
1:22 Bale vi anien tai koa alesi suval kovi, ka anien teni mul en utite koa suval raes.
men tuai en ah osen me-Isrel keil.

Copyright information for `PMA