Ruth 2

Rut Va Voum en Ah Sen Boas

Rut 2:1-23

En out Betlehem, hetetamen tai ro ien koa tounah onen houlu, isen Boas. Kei kistal en vatiamal kati onen Elimelek, meatin onen Noume. En avong tai, Rut vis Noume vit, “Kimaenau maha en ah etai keke malah ruain bale keil koa meatin toumien keil alokoveini merangli avahi anien ar. Vahesa nihotin meatin etai koa hemaenau moumoni en ah osen.”
2:2 Dut 24:19 viteni vit tahos me-Isrel keil imaen heou keil ral min vatina keil imai ilah ruain tei bale ka uit koa alokoveini mules en ah ose keil.


Sakini, Noume maeni vit, “Ahineli, tahosis, kiha kumoni.”

Sakini Rut va en ah tai ka mul mum katau sil meatin toumien keil koa alah ruain bale. Ka kei lah hati bale koa keil alokoveini mules netan. Ka Rut, kei reingeingeni keke ah koa mul mum ien osen Boas koa kistal en vatiamal kati onen Elimelek, meatin onen Naomi. Rovitei tuetin, Boas ka en meteimal ten out Betlehem ka mai kistal min meatin toumien keil onen ka viso min keil vit, “!Iahova heto ven kami!”

Ka avit kesi mini avit, “!Iahova hetokol katuk emun!”

Evus, Boas vis avat toumien onen vit, “?Ahin hau eke onen sei?”

Sakini avat enek vit kesi mini vit, “Ahin enek ten out Moab ka mai ral min Noume. Kei vis nau mamaeni vakatau sil meatin toumien keil koa amul alah ruain bale keil keke valah hati bale koa alokoveini mules. Kei mai en visokon semau ka mul mum rokol avong enek, museh avong havivis en votevav keie.”

Evus, Boas va selus min Rut vit, “Ei atouli. Kitaengonau, ekvati keke kum en ah sak vesesal ven ahin toumien keil onak. Konahatei en ah sav etai keke kovalah ruain bale ien. Out kave keil amum ien, keik emun kitos vesesal ven keil. Naselus koe min meatin keil onak anoumtei natisa enuk. Ka munak maroro katuk, kiha kimun hati oai koa mul en vei oai koa asehei tuai mul.”

10 Navong Rut longe, mutengeiril netan ka veinan rokol atan. Kei vit kesi mini vit, “?Vensa komul komundemvo inau? ?Vensa komul komumoni tahos minau koa navi heou tai enges?”

11 Boas vit risi mini vit, “Inau nakur longlongien usil sakien tetahos keil koa korie lati min avu tisa onom navong meatin onom mat. Nakilea keke keik kolokovein tata ka mama onom ka kantri kati onom keke kumai kovato vatal min meatin keil koa koreingeingen keil mulamu. 12 Navis min Iahova hesa kesi minuk tahosien koa keik komul korie lati mini. Anatin, Iahova, Ahi onen me-Isrel keil, hesan sanien tai koa hetahos imok minuk veni keik koling desien onom eni valei kat revi keik ka vating koe moulien onom.”

13 Evus, Rut vit kesi mini vit, “Hetamen, keik komumoni tahos imok minau li. Avaseini inau narvinvintei keke mamai mahi ahin toumien tai onom, keik koselus revi minau ka kovati lat rendemien onak.”

14 En taviai, navong meatin keil amul akanian, Boas viteni min Rut vit, “Amai vesesal, an vis etai veret ka kikasi en hati sup koanek.”
2:14 uaen koa kun
Sakini, rondan ral min meatin toumien keil, ka Boas san hati bale koa alengasi mini. Rut kanian vinvin ka ling revi anien koa mules.
15 Navong Rut mu ris va voum, Boas sel kat meatin toumien keil onen vit, “Mihemaeni valah ruain bale en out vasi keil koa envati. Avaseini munak lah ruaini ran vangite keil koa kami mipar kati tuai, minasak ventei. 16 Ka tamun, tahos mihelah lat tei bale ran vangite keil ka mihesoni heha netan keke ahin enek hemai helah ruaini.”

17 Sakini, Rut lah ruain bale en ah enek va rokol mendilah. Ka navong mu rangrangi, votini keke uti bale keil koa lahi, kilo teni vi teindan elu (12 kg). 18 Vous uti bale keil enek va ris teim ka rie lati min avu tisa onen. Evus, anien koa kei ling revi mules, kei mun, Rut sani mini.

19 Navong Noume lesi, muti manin eni ka visi vit, “?Kosa, kolah ruain uti bale keil enek en out kave? ?Ah sen sei varei keke komum ien? Tokolkatien onen Ahi hel en meatin koa lesuk ka mumoni tahos minuk.”

Sakini, Rut viteni min Noume vit, “Namum en ah sen meatin tai koa isen Boas.”

20 Noume viso keih vit, “!Tokolkatien onen Iahova hel en kei! Iahova rie lat tahosien onen min ialu koa lomoul loro veah ka min meatin keilu onealu koa lumat tuei. Meatin koanek vi tai en vatiamal kati onen meatin onak. Musil sakien onen me-Isrel keil, kei varei helei kat usite onealu.”

21 Ka Rut vit, “Ka koa tahos imok, kei viteni minau vit niles nilah ruain bale hetal min meatin toumien keil onen heha hetokol avong koa alah vasi ran ah sen keil.”

22 Noume viteni min Rut vit, “O ahineli, hetahos imok kiles kum hetal min ahin keil koa amul amum en ah sen Boas. Veni munak kiha kum en ah sen meatin sav, vahesa meatin etai houm hetisa enuk.”

23 Sakini, Rut mum ral min ahin toumien keil onen Boas va vio ... rokol avong koa alah ruain bale keil, ka katau, alah ruai uit emun ran ah sen vasi keil. Ka Rut ronges ral min avu tisa onen enek.

Copyright information for `PMA