Ruth 3

Noume Mumon Sise Keke Rut Vakur Ris Meatin Eni

Rut 3:1-18

En avong tai, Noume viteni min Rut vit, “Havukahin, hetahos imok keke inau nihotin etai meatin vatetalihe vataluk ka helei kat revi keik. ?Kindem kat Boas, meatin koa komum ral min ahin toumien keil onen? Kei ka en vatiamal onen meatin keilu oralu. Sakini, kitaengon revi inau. En mendilah kosa, kei heha hou rangrang uit bale ran veite keil teni. Sakini, keik kiha kikul, kisin hetahos ka kikasuk en senta. Hevus, kiha en out toumien onen, ka konoumontei keke kei nailea komul en out enek. Kitosin avong koa kei heanian ka hemun hati uaen hevus ka kilei revi out koa kei va matil ien. Navong matil ravobong, kiha vesesal veni, kikulat pulangit ran alen tanetan ka kimatil kat vase alen keilu vatie lati keke kovisi helei katuk ka usite keil onom. Hevus, kei hehiteni suk minuk asa kovoumoni.”

Rut vit kesi mini vit, “Inau num vasi tounah koa koviteni minau moumoni.”

Sakini, Rut va en out toumien onen Boas ka mumoni suval koa avu tisa viteni mini. Navong Boas kanian ka mun hati uaen evus, kei longe tahos. Evus, va vesesal en usite tai ten mari vangi bale koa arivini out tas ka va matil ien. Navong meten mulong houlu, Rut mul ka lelau mai, kulat pulangit ran vase alen tanetan onen ka matil kat keilu.

En metavinavong, Boas muti manin ven tounah tai. Ka navong viles, lesi keke ahin tai mul matil kat vase alen tanetan. Sakini visi vit, “?Ei, keik sei?”

Ka Rut vit kesi vit, “Inau etin, Rut, ahin toumien onom. Asuv, keik kovi tai en vatiamal onen meatin onak koa mat tuai. Sakini, musil sakien keil onami, keik kilei kat usite onak ka kokilea kovakur nau nimai nihi ahin onom.”

10 Ka Boas vit kesi mini vit, “Rut, Iahova hetokol katuk. Komul korie lat sakien tetahos keil min vatiamal keil onomai koa marite mok mulin asa koa korie lati tuai min avu tisa onom koa vi vatina tai onomai. Keik, kokilea kovaha kovahotin etai meatin hau koa tounah onen houlu vuo koa tounah onen tovuol, ka kormumontei. 11 Sakini, konandemtei nahi houlu usil asa koa hekistal. Inau num vasi tounah koa kovis inau eni keke nilei katuk ka usite keil onom veni kovi ahin tai koa meatin keil vasi alei kilea en tahosien onom. 12 Anatin keke inau navi kei koa helei kat usite onom veni navi vatiamal kati onen meatin onom koa mat. Ka meatin sav tamun mul en vatiamal onomai koa vesesal imok min meatin onom, ka kei kilea valamu enau keke vakuruk ka valei kat usite onom. Ka munak kei enrovattei, inau numoni suk. 13 Ka en vongien enek, hetahos kitos. Hevus, out mulan, lehehotini keke envati valei katuk vuo enrovattei. Munak envati, tahosis, ka munak enrovattei, naviteni anatin en meten Iahova keke inau suk, nikuruk ka nilei kat revi usite keil onom. Ka vongien enek, kitos kimatil en out enek hetokol visokon.”

14 Sakini, Rut matil kat vase alen tanetan rokol visokon. Ka en visokon semau veah, kei muli mea keke vaha veni Boas enrovattei meatin etai vailea keke ahin tai mul matil en out toumien onen. 15 Ka mulamu en avong vaha, Boas viteni mini vit, “Kulat kot omom ka kihoeini en out enek.” Navong Rut voeini, Boas mutah uit bale keil koa kilo teni rokol hanumau tai ka halualim emun (30 kg) va ien. Evus, katauni lingi en eisilin ka Rut vousi va ris teim. Ka Boas va en meteimal.

16 Navong Rut rokol teim sen, avu tisa onen visi vit, “?Ahineli, mukave?”

Sakini Rut vit vasin tounah koa Boas viteni mini.
17 Ka Rut viteni mun vit, “Ka enrovattei keke hek vahi heite hon navong mamai ris malesuk en out teim, sakini san uit bale keil koa kilo teni rokol hanumau tai ka halualim emun (30 kg) enek minau.”

18 Noume vit risi mini vit, “Konandemkotei. Kitosini keke kiles tounah keil enek hekistal hemukave, veni Boas sakras vaseh kosa vatokol avong koa hetali mal en usite keil onom.”

Copyright information for `PMA