Titus 2

Ualien koa Musil Hihiseien ten Anatinien

Ka keik, kihisein tounah koa musil hihiseien ten anatinien. Kihisein ulmatu keil keke ihi meatin merau, sakien one housil rendemien koa tetahos, ka akilea avalei kat revi sakien keil one. Demkatien one en Ahi hekeih, envatien one hel en meatin sav, ka avaseini avong takeih hemai, keil usil kat Iesu lises. En sakien enek, kihisein tovuli keil usil sakien koa Ahi envati. Anahit karentei meatin sav ka anahitei uti munmunien. !Vuo! Keil ihisein meatin sav keil en sakien koa tahos. Mukonek, akilea avihisein ahin hau keil en sakien koa avatie envatien one min meatin one ka titiali one keil. Avahisein keil ilei kat revi sakien keil one ka itahos min meatin one keil, anamaentei keil min meatin sav. Keil ilei kat revi teim se ka iling rendemien one hel netan keke um housil rendemien onen meatin one keil. Sakien one koa tahos hesakin meatin sav keil asakras avaselus karen hihiseien keil koa Ahi sani minir.

En vati sakien enek, kihiteni min meatin hau keil ilei kat revi keil. Keik emun, Timoti, kihi metai tetahos tai en tounah koa komumoni, meatin sav keil akilea avousili. Navong kovisein meatin sav keil, kumoni en sakien ten tinahos koa meatin sav keil ilea ihouhou minuk veni. En selusien onom, kihit usil tounah koa anatin enges koa meatin sav keil asakras avaselus kareni. Hesakini, koakeil mete tisa enuk imemou, ka asakras avahiten etai selusien vaha katir.

Koakeil avi eisisil, iling rendemien one hel netan keke um housil rendemien onen hetetamen one keil en tounah vasi ka um hetahos hesakini hetetamen one keil isi keil. Eisisil keil anahit karentei hetamen one keil, 10 ka anahenan etai tounah ran keil. !Vuo! Umoni keke hetetamen one keil ilea avaling desien one en keil. Sakien tahos one hesakin meatin vasi keil indemi keke hihiseien usil Ahi koa mututir tahos imok.

11 Tahos kihisein keil usil sakien keil ekek veni more envatien onen Ahi mai kistal en mesai voumon meatin keil avakur moulien hau eni. 12 Ka more envatien enek viseinir rovalokovein sakien tatisa keil ka ronousiltei mun envatien keil ten out netan. !Vuo! More envatien onen Ahi hesakinir rehelei kat revi sakien orer, ualien orer hetahos, ka moulien orer hetolas en avong roro en out netan. 13 Romumoni mukonek ven koa rorosin more avong koa hemai. En avong enek, romundesini keke Iesu Kristo, koa vi Ahi ka mututir, hekistal hetal min muohien ka keihoen onen. 14 Kei sasen maen kei mat vinat ir vakulatir ran keihoen ten tisaen ka mutut ir rovahi onen. Anatin, kei mumonir romutolas ka sakin ir rovi vangi meatin tai koa atateisav ran meatin savsav keil. Anatin, sakin ir rovi onen ka envati rovasi ir rovoumon tounah koa tahos en meten.

15 Ahi linguk en vulum ten keihoen. Sakini kilomal en keihoen enek navong kihisein keil en sise koa mal avousili, ka navong kisel kat keil anousiltei mun sise ten tisaen. En sakien enek, konamaentei keil analei heisav enuk.

Copyright information for `PMA