Titus 3

Sakien Onen Meatin Keil koa Amusil Ahi

Kihit risi min meatin onom keil iling rendemien one hel netan keke um housil rendemien onen koakeil ten kavmen ka hetetamen sav keil one ka ilong kat keil. Tounah koa tahos, keil isi keil avoumoni. Kihiteni mun min keil anaselustei natisa en etai meatin ka anaseltei natal min keil. !Vuo! Keil umoni hetahos min keil ka umon sakien merau min meatin vasi keil lises. Ir ernavobongentei keke mulamu, ir emun rovi vati meatin koa mukonek: rovi vau, rorlong kattei Ahi, ka romusil sise vasi keil ten liluvosien. Mulamu, sakien tatisa keil ka envatien keil ten out netan vuli katir ka mulamunir. Rovi elu en meatin sav, ka rosi ir navong rolesi mot en tisaen. Tine katir, ka ir emun, tiner kat keil. Ka heisavos ir romukonesek, tahosien ka envatien onen Ahi koa mututir mai kistal enir. Kei kur koe ir ran tisaen orer, rovitei ven etai tounah koa tahos romumoni. Mumoni minir veni enmahis ir. Kei san Ninin Votut minir koa kas moteinir ran tisaen, ka san moulien hau ka sakien hau minir. Ka veni tahosien onen mariso, kei sakin Ninin Votut mai vilelau en moulien orer veni matien onen Iesu Kristo koa mututir mumon sise maluv keke Ninin Votut enek hemai minir. More envatien onen sakin kei mumonir romal en meten, heisavos rovi meatin tisa keil. Sakini, kosa, rokilea rovamai rovahi titiali keil onen ka rovato vatal mini en out nesa lises. Selusien keil naviteni minuk vi anatin.

Sakini, en avong vasi, ekvati mok keke keik kiles kihisein meatin keil en tounah ekek. Hesakini, koakeil amusil kat Ahi, rendemien one hekeih avoumon tounah koa tahos. Vati hihiseien enek tahos ka kataun ir vasi.
Kiha seh ran koakeil aselus retavoai en tounah koa vi heisav enges. Koakeil enek aselus houlu usil avu keil one, ka evati mok avoumon rea ka avatit en selusien usil mengkatien keil onen Siu keil. Vati sakien enek rokatauntei meatin, vi heisav enges. 10 Munak meatin tai koa mukonek mumon meatin keil arasil, hatte tas, kiselus hekeih mini keke hehati. Munak hervatitei en sakien enek, kiselus eris mini hatte helu. Navong heles houmon sakien enek, minalah ruaitei mun natal mini. 11 Veni sakien keih onen rie lati keke vati meatin enek viles eisilin ran anatinien, ka sakien tisa onen rie lati keke kei mul leh mahien onen Ahi va kat kei sasen enges.

Selusien Ekor Onen Pol

12 Taetas, navong nisila Artemeas vuo Taetikas, keilu etai hehat vakur vulum, kisak visi kihit kovamai venau en out Nikapolis, veni namundemi navit nito en out enek hetokol keite ten avati keil ten an tisa koa hemai. 13 Kisak visi kovakataun Apolos ka Sinas koa luvi meatin ten mengkatien.
3:13 Lawyer
Luvit luvaha en sise onealu, ka kiles keilu keke lukur vasi tounah semok koa ealuvati.
14 Meatin vasi keil orer ilea avasan keil ven mormore umen keil. Hesakini, ikataun meatin sav en asa keil one tovuol. Anato heisavteis namukok.

15 Koakeil aro ral minau aviten 'more' minuk. Kihiten 'more' onomai min koakeil amusil Ahi ka amundem kat komai.

Navisi keke more envatien onen Ahi heto ven kami vasi.

Copyright information for `PMA