2 Timothy 2

ARI nai jeri keleki mak o, me mi ren Krijtuj Iejuj. O me koe roner jan ia impan jaunkadede toto, koe en ujai on aramaj lelapok kan, me koiok on padaki me tei kan. Koe ian ia kamekam duen jaunpei en Krijtuj Iejuj mau amen. Jaunpei amen jota kin kadoki pein kan a mana, pwen kon on me ale i. O ma amen pan weir, a jota pan ale katin, ma a jota weir mau. A jaumat amen, me kin japajap en tunole maj wa kan. Madamadaue duen me i inda, pwe Kaun o pan kotin kalolekon kin uk ni meakaroj. Tamataman Iejuj Krijtuj, me aijada jan ren me melar akan, kadaudok en Dawid duen ai ronamau, Me i kamekameki o jalikidi dueta me jued amen, a majan en Kot me jo jalidier. 10 Mepukat karoj i kin kamekameki me piladar akan, pwe ren pil konodi maur joutuk ren Krijtuj Iejuj ianaki a linan joutuk. 11 Meid melel, ma kitail ian matala, kitail pil pan ian ieiajata; 12 Ma kitail dadaurata, kitail pan ian kaunda; ma kitail ponjaja, a pil pan ponjaja kitail; 13 Ma kitail jota pan dadaurata, a pn kotin melel weita, pwe a jo kak kalikame pein i. 14 Kataman kin irail mepukat, kadede on irail mon Kaun o, ren der akamai ki jip en lokaia kan, me jota pan katepai on meakot, pwe a pan kajapune ir ala, me karon akan. 15 Nantion konekonela ren Kot dueta toun dodok amen, me jo karepen namenokala mia, me kin padak weita pun majan melel. 16 A koe en kan poupou mal akan, pwe ar japun pan lapalapala. 17 Arail padak me pan paraparada due kinj. Kijan irail Imenauj o Piletuj, 18 Me pirok jan melel ni a inda me dene mauredan aramaj wiauier, rap kawela pojon en akai. 19 A pajon en Kot pan duedueta, a iet kilel: Kaun o kotin mani japwilim a kan, o: Karoj, me aja mar en Kaun o, en muei jan me japun. 20 Nan im lapalap kaidin dal kold o jilper eta me mia, pwe pil dal tuka o dal pwel, akai men kalinan, o akai kaidin men kalinan. 21 A ma amen pan muei jan jon en aramaj due met, a pan rajon dal men kalinan me kajarauiala, o katepa on Kaun o mau on jon en wiawia mau karoj. 22 Tan wei jan inon jued en manakap, ap tan won pun, o pojon o limpok, o popol ianaki karoj, me kin kapakapaki on Kaun o jan nan monion ar makelekel; 23 A padak mal o likam kan kan, pwe koe aja, me re pan naitikada akamai. 24 Ladu en Kaun men endor akamai, a en kadek on karoj, o koiok on padak o kanonama on me jued akan. 25 O opampap ni a kapun on me katiwo kan, pwe ele Kot pan kotin jauaja ir, pwe ren wukilan lolekon en melel. 26 O ren pil piti jan ni injar en tewil, me a injara kin ir di on injen a.

Copyright information for `PON