Acts 13

NAN momodijou en Antiokien jaukop o jaunpadak kai mia. Iet akan: Parnapaj, o Jimeon me pil ad a Niker, o Lujiuj men Kirene, o Manaen, me ian monjap Erodej apwalidar, o Jauluj. A ni arail papa on Kaun o, o kaijejol, Ngen jaraui ap kotin majani: Katorore jan on ia Parnapaj o Jauluj, pwen wia dok eu, me I ki on ira er! Irail ap kaijejol o kapakap o kidan po ’ra pa ar, re ap kadar ira wei. Ira ari me pakadara kila Ngen jaraui ap kotila Jeloijia, waja ira kereda pon jop pot tanalan Jipern. Ira lao mi Jalamij, ap padaki duen majan en Kot nan jinakoke en Juj akan. A Ioanej papa men pil ian ira. Irail lao kakan jili nan dake lel kanim Papoj, rap diaradar ol amen, me kin kati ani, jaukop likam amen, kijan men Juj, ad a Par Iejuj, Me kin mi ren Jerkiuj Pauluj ol lelapok amen. I me ekere don i Parnapaj o Jauluj, pwe a men roneron majan en Kot. A Elimaj widinak (pwe i wewe en ad a) palian ira, pwen kapure jan jaumaj ni pojon o. Jauluj, me pil adaneki Pauluj, dir en Ngen jaraui, kankakil i, 10 Indada: Koe meid dir en widin o mejued, o nain tewil o me kailonki me pun karoj. Koe jota pan dukedi jan palian al inen en Kaun akan. 11 A kilan met, lim en Kaun o mi po om. A koe pan majkun, ap jolar kilan katipin anjau kij. Ari, a madan ediedelar o rotalar; i ap raparapaki jili men ale pa a, en kaweid i. 12 Jaumaj lao majani me wiauier, ap pojonlar, pwe a puriamuiki padak en Kaun o. 13 Pauluj o a warok kai ap kotila jan Papoj tanatan ko don Perke nan wein Pampilia. A Ioanej muei jan ira, purelan Ierujalem. 14 A ira majalewei jan Perke o kotilan Antiokien en Pijidien o kotilon on nan jinakoke ni ran en japat kaipokedi. 15 A lao nikier ar dondoropwe kapun o jaukop akan jaumaj en jinakoke kai ap ilakilan ira majani: Ri (at) oko ma majan en panau pot on aramaj pukat mi re oma, koma ari kida! 16 Pauluj ap kotida ololeki lim a majani: Ol en Ijrael komail o me kin majak Kot, komail en ron! 17 Kot en men Ijrael pukat, me kotin piladar jam atail akan o kapakapaiada aramaj oko ni ar kakairu jili Äkipten, o lim a manaman, me a kotin kalua kin irail jan waja o. 18 A impan jaunpar paeijok a kotin apapwali irail nan jap tan. 19 Kadekadeo a lao kotin koko jan wei iju nan Kanaan, ap kotin nek on irail jap arail. 20 O murin met a kotiki on irail jaunkapun kan irerokedo par papuki limeijok lel on jaukop Jamuel. 21 A jan ni anjau o re inon ion nanmarki amen. Kot ap kotiki on ir Jaul nain Kij, ol en kadaudok en Peniamin amen, jaunpar paeijok. 22 A lao kajapokelar, ap kotiki on irail Dawid, pwen nanmarki, me a pil kotin kileledier majani: I diaradar Dawid nain Ieje, ol amen duen inon en monion i, me pan wiada injen ai karoj. 23 Jan nan kadaudok a Kot kotikido Iejuj, pwen Jaunkamaur pan men Ijrael, duen japwilim a inau. 24 Murin Ioanej a kotin padaki on men Ijrael karoj duen paptaij en kalula mon a kotido. 25 A Ioanej lao kapwaiada japwilim a dodok, ap kotin majani: Ij me komail lamelame menai? Kaidinnai i. A kilan amen kotido, kijin jal en japwilim a jut i jowar en lapwada. 26 Komail ol o ri ai kan, komail kadaudok en Apraam, o meamen me majak Kot re omail, padak en kamaur pot et pakadara don komail. 27 Pwe me kaukaujon Ierujalem o ar jaumaj akan kapwaiada kokop en jaukop akan, me kin wadawad ni japat akan karoj ni ar kadeikada i, pweki re jaja i. 28 A jota me re diaradar, me a kak kamata kila. Ari jo, re poeki ren Pilatuj, me a en kamatala i. 29 Irail lao kapwaiada karoj, me intinkidi i, re ap kidi jan i nin tuka o kidi i nan joujou o. 30 A Kot me kotin kaiajada i jan ren me melar akan. 31 O ran toto me a kotin pwara don me ian i kotilan Ierujalem jan Kaliläa, me japwilim a jaunkadede on aramaj akan. 32 A kit padaki on komail ronamau duen inau on jam atail akan, 33 Me Kot kotin kapwai on kitail nairail jeri kan, ni a kotin kaiajadar Iejuj duen a intinidier nan pjalm kariau: Koe nai Ol, I kanaitik uk adar ran wet. 34 A duen a kotin kaiajada i jan ren me melar akan, pwen der mor pajan, i me a kotin majanieki met: I pan ki on komail pai melel en Dawid akan. 35 I me a pil majanieki ekij waja: Re jota pan kotin mueid on, japwilim ar Jaraui o pan mor pajan. 36 Pwe Dawid lao kapwaiada a papa on kupur en Kot ni a anjau, ap jaimokelar, a jaredier impan jam a ko, ap mor pajan. 37 A i me Kot kotin kaiajadar, nan a jota kotin mor pajan. 38 Ari ri ai kan, komail aja, me lapwa pan dip akan ren men et kin kaloki on komail. 39 A me pan pojon i, nan i me punalar jan meakaroj, me komail jota kak pun kila kapun en Mojej. 40 Ari, komail kalaka, pwe a depa pwai on komail, me jaukop akan majanier: 41 Kilan, komail me kin lalaue, puriamuiki o joredi, pwe I pan wia dodok eu ni omail anjau, me komail jota pan kamelele, ma amen pan kajokajoi on komail due. 42 Irail lao pedoi jan ap poekipoeki, kajoi pukat en kalok on irail ni ran en japat kokodo. 43 A jaraui lao nikier, men Juj o Projelit lelapok toto idauenla Pauluj o Parnapaj, me mamajani on irail o panaui irail, ren podidi on mak en Kot. 44 A ni japat kokodo karoj toun kanim o pokon pena, pwen ron majan en Kot. 45 A Juj akan lao kilaner pokon o, ap pepeirinki o lidere meakan, me Pauluj kaweweda; re palian o lalaue. 46 A Pauluj o Parnapaj ap jo majak katitiki: Majan en Kot en loki don komail maj, a pweki omail kaje jan, o wia kin komail jowar on maur joutuk, kilan, je jope wei on men liki kan. 47 Pwe iet duen me Kaun o kotin majani on kit: Ngai me kajapwil uk adar, pwen marain pan men liki kan, pwe koe en kamaur jili lel jap karoj. 48 Men liki kan lao ronadar met, ap peren kidar, o kapina majan en Kot o karoj, me kileledi on maur joutuk, pojonlar. 49 A majan en Kaun o lolok jili nan wei kan karoj. 50 A Juj oko kamakarada li jaupeidi lelapok o jaumaj en kanim kan, o kapei on Pauluj o Parnapaj aramaj o kajapoke ir jan nan jap arail, 51 A ira jipede jan ni aluwilu ar pwel, pwen kadede on irail, ap kotilan Ikonien. 52 A tounpadak kan me dir kila peren o Ngen jaraui.

Copyright information for `PON