Acts 16

PAULUJ ari kotilan Derpe o Lijtra. A kilan tounpadak amen mi waja o, me ad a Timoteuj, nain li en Juj me pojon amen, a jam a men Krik. Nan i kalok mau jili ren jaulan en Lijtra o Ikonien akan. Pauluj kotin men, i en waroki on i. I ari uk i o jirkomjaij i, pweki Juj oko, me mi waja o, pwe irail ajaer, me jam a men Krik amen. A ni arail kotikot jili nan kanim akan, re padaki on irail me ren kapwaiada kujoned oko, me wiauier ren wanporon o jaunkoa kan nan Ierujalem. Momodijou kan ari kelailada ni pojon o re totolar ni ran karoj. A Ngen jaraui kotin inapwiedi, me ren der padak duen majan nan Ajien, re ap kakan jili Prikien o Kalatien. Irail lao pwara don Mijien, re jon daulul wei on Pitinien, a Ngen en Iejuj jota kotin mueid on. Irail lao daulul lar Mijien, ap kodilan Troaj. A kajanjal eu pwara don Pauluj ni pon: Ol en Majetonien amen me uda, poekipoeki i indada: Kom koti don Majetonien, jauaja kit! 10 A lao udialer kajanjal o, kit madan kolan Majetonien, pwe je ajaer, me Kaun o kotin molipe kit, en kolan padaki on irail ronamau. 11 Kit ari majel wei jan Troaj o inen won Jamotrajien, a manda lel on Neapolij, 12 O jan waja o lel Pilipi, kanim lapalap ni apali en Majetonien, me kijan jap en men Rom. Kit ari mimieta nan kanim o ran akai. 13 Ni ran en japat je koiei jan kanim o, kolan pon pilap pot, waja re kin kapakap ia. Kit ari mondi o kawewe on li akai, me kin pokopokon waja o. 14 A li amen ad a Lidia, men jaunet en likau waitata, men Tiatira amen, me kin kaudok on Kot. Nan i me roneron kit. A Kaun o kotin ritinada monion i, pwen apapwali meakan, me Pauluj majanier. 15 I o a penainai lao paptaijelar, ap poeki re at indada: Ma komail kajau ia da, me i pojonlar Kaun o, komail pan pedelon on nan im ai o kotikot ia; i arinidinide kin kit. 16 Kadekadeo ni at kolan kapakap lidu amen, me kin wun ani, ap tu on kit, me kin kare on moni toto ren a jaumaj kan ki a wun ani. 17 I me idauen Pauluj o kit weriwer indada: Aramaj pukat me japwilim en Kot lapalap ladu ko, me kin padaki on komail duen al en maur. 18 A mepukat a wiadar ran toto. A Pauluj kupurola kaualap ap kotin jaupeila majani onnen o: Ni mar en Iejuj Krijtuj me i indai on uk, keredi jan i! I ap keredi jan ni auer ota. 19 A jaumaj akan lao diarada, me jolar kaporopor en ar men wiaki moni, ap jaikidi Pauluj o Jilaj, wai ira lon don wajan net ren jaumaj akan. 20 O kalua ira wei ren jaunkapun kan katitiki: Aramaj pukat kijan men Juj kin kaokaoe atail kanim, 21 O padapadaki tiak me jota pun je en ale de wiada, pwe kitail men Rom. 22 Aramaj karoj ap uda por on ira, o jaunkapun ko dere jan ara likau kan o kapi, ren woki ira. 23 Irail wokiwoki ira pan pak toto, rap kaje ira di nan imaten o kapiedi jilepa o, en kateneten ira di. 24 A lao aleer kujoned wet ap kaje ira di on nan waron, en imaten o jaliedi aluwilu ’ra nin tuka kai. 25 A lao ni ailep en pon Pauluj o Jilaj kapakap o melkaka on Kot, o me jalidi ko roneron ira, 26 A jap o madan rerereda, kajukajuk en imaten mokidedar, wanim ko ap madan ritida o ar jal akan karoj lapwadar. 27 A jilepan imaten lao pirida jan a mair o kilan wanim ko ar ritidar, apnapekida a kodlaj o, a pan kamela pein i, pwe a kiki on, me jalidi ko me pitila. 28 A Pauluj kapitie laudeda majani: Kom der kame uk ala, pwe kit karoj mia. 29 A ap idok lamp eu o tan rerer o dairukedi jan Pauluj o Jilaj. 30 O wa ira wei jan indada: Main ko, da me i en wiada, pwen kamaurela? 31 Ira ap majani: Pojon Kaun Iejuj, a koe o toun im om pan maurela. 32 Ira ari kawewe on i o toun im a karoj majan en Kaun o. 33 I ari uk ira ni auer ota ni pon o, widen ara pwal oko. I o na kan karoj ap madan paptaijelar. 34 I ap kalua won ira nan im a, ap kida mo ’ra kijin mana, o peren kidar a pojonla Kot, i o ian a kan. 35 A lao ran pajan, jaupeidi ko poronela papa ko indada: Lapwada aramaj pukat! 36 Jilepan imaten o ap kaireki Pauluj majan pukat indada: Jaupeidi ko me ilakido, koma en lapwada. Koma ari kotila popol 37 A Pauluj kotin majani on irail: Irail janjal kadeike kit adar o woki kit men Rom, ap kaje kit ale nan imaten, a met re men kadar kit ala jo janjal. A jo, irail en pein kodo, wa kit wei. 38 A papa ko kaireki jaupeidi kan majan pukat. Irail ap majakadar ni ar ronadar, me ira men Rom. 39 Irail ari kodo, poeki re ’ra o wa ira la jan, onidinideki ira, en japal wei jan nan kanim o. 40 Ira ari pedoido jan nan imaten o, ap kotila ren Lidia. Ira lao tu on jaulan kan, ap panaui irail o jipale wei.

Copyright information for `PON