Acts 3

A PETRUJ o Ioanej wiaki eu kotidalan nan im en kaudok ni auer en kapakap, auer kaduau. A ol amen me tikida nä a danidan, me kin wijikedo pwiledi liman wanim en im en kaudok, me ad a linan, ni ran karoj, pwen wia poekipoeki ren me kin kolon on nan im en kaudok. A lao kilaner Petruj i Ioanej, ni ara pan kotilon on nan im en kaudok, ap poeki, pwen ale meakot. A Petruj i Ioanej majani i, ap majani on: Jaradan kit! I ari jaradan ira, kajikajiki, me a pan tunole meakot re ’ra. Petruj ap kotin majani: Jota ai jilper de kold, a meakot mi re i, me i pan ki on uk: Ukida mar en Iejuj Krijtuj en Najaret o alu! I ari koledi pa a maun o kauada i, a nä a o tikil en nä ap madan kelailadar. Ap lujada o alu ian ira lan nan im en kaudok, majimajiok jili, kapikapina Kot. O aramaj karoj kilan a alialu jili o kapikapina Kot. 10 A irail aja, me i, me kin poekipoeki liman wanim linan en im en kaudok, irail pinkidar o poneponeki duen me wiaui on i er. 11 A ni a ian Petruj, o Ioanej, aramaj karoj puriamuiki, ap tan penan irail nan palank, me ad a palank en Jalomo. 12 Petruj lao majani mepukat, ap kotin majani on pokon o: Ol en Ijrael, da me komail puriamui kila met? De da me komail kilekilan kin kit, likamata kit me kakelada i ni pein at kel de lelapok? 13 Kot en Apraam, o Ijaak, o Iakop, Kot en jam atail akan kalinanada japwilim a ladu Iejuj, me komail panala o likidmaliela ren Pilatuj ni a kileledier, me a pan lapwada i. 14 A komail likidmaliela me Jaraui o, o me Pun, ap poeki lolap amen, en lapwa don komail. 15 A komail kamatalar tapin maur, me Kot kotin kaiajadar jan ren me melar akan, kit kin jaunkadede en mepukat. 16 Aki pojon mar a, mar a ap kakelada men et, me komail kin kilan o aja, o a pojon kare on i kelail melel wet mo omail karoj. 17 Ari ri ai kan, i ajaer, me omail jaja, me komail wiaki met, pil dueta omail jaumaj akan. 18 A ni mepukat Kot kotin kapwaiadar, me a kotin majanier ren jaukop akan karoj, me Krijtuj pan kalokolok. 19 Komail ari kalula o wukila, pwe dip omail akan en joredi jan, pwe muein kamaur en pwaida jan wajailen Kaun o. 20 A lao kotin poronedo, me loki on komail er: Iejuj Krijtuj, 21 Me pan kotikot nanlan lao lel anjau, me meakaroj pan punala, duen me Kot kotin majanier ren japwilim a jaukop jaraui kan jan maj kokodo. 22 Pwe pil Mojej kotin majanier: Kaun omail Kot pan kaipwi on komail Jaukop amen, ipwin ri omail akan duetanai, i me komail en rona jan meakaroj, me a pan kotin majani on komail. 23 A iet me pan wiaui: Aramaj karoj, me kan peiki on jaukop o, pan kajapokela jan ren aramaj. 24 A jaukop karoj irerokedo jan Jamuel, karoj me padapadak pil kokoper duen ran pukat. 25 Komail japwilim en jaukop akan o en inau, me Kot kotin wiai on jam atail akan ni a kotin majani on Apraam: Kainok karoj nan jappa pan paieki amen kadaudok om. 26 Kot kotin porone don komail japwilim a ladu maj ni a kotin molipe i; pwen kapaia kida komail, en kawuki jan komail kuroj dip omail akan.

Copyright information for `PON