John 6

MURIN mepukat Iejuj kotin kotela le en Tiperiaj nan Kaliläa. A pokon kalaimun me idedauen i pweki ar kilaner kilel akan, me a kotin wiai on me jomau kan. Iejuj ap kotidala pon dol o, kaipokedi waja o ren japwilim a tounpadak kan. A paja o, ran lapalap en Juj oko me korendor. Iejuj lao kotin majanda majani pokon kalaimun koko don i, ap kotin majani on Pilipuj: Ia waja, jen neti jan ia kijin mana, pwe mepukat en mana? A kotin majani mepukat, pwen kajonejon i. Pwe pein i mani, me a pan wiada. Pilipuj potoan on i: Prot me denar riepuki jota pan itar on irail, pwe amen amen en tunole ekij. Andreaj, japwilim a tounpadak amen, ri en Jimon Petruj potoan on i: Kijin putak amen mia, me a lopon en prot limau o mam riamen, a jota katepa ren me toto. 10 Iejuj kotin majani: Kamod on irail edi! Ari, waja o me reen. Impan ol limekid ap mondi. 11 Iejuj ap kotikida lopon ko, a lao laolaoki, ap kotin nek on irail me mondier, pil dueta mam oko, irail lao metilar. 12 Irail lao metier, a kotin majani on japwilim a tounpadak kan: Ki pena me lua, pwe ekij der lokidokila! 13 Irail ap ki pena kopou eijokriau kijan lopon ko, me luadi murin arail mana. 14 Aramaj akan lao kilaner kilel o, me Iejuj kotin wiadar, re ap indada: Melel i Jaukop o, me pan pwara don jappa. 15 Iejuj lao kotin mani, me re pan poto don i, pwen kajapwiladan i Nanmarki, ap pil kotidalan nin dol o, kotin kelepala. 16 A lao jautik pena, japwilim a tounpadak kan ap kotilan ni oror, 17 Kereda pon jop pot, kotela kokolan Kapernaum. A lao waja ponier, Iejuj jaikenta ian irail. 18 A jed me iluken, pwe an me ma. 19 Irail jeijei kila mail eijoklimau de rieijok, rap kilanada Iejuj a kotikotido pon jed koren ion jop, irail ap majapwekadar. 20 A kotin majani on irail: Ngai i komail der majak! 21 lrail ap men kajamo i pon jop o, a jop o madan milar ni jap o, me re ko on ia. 22 A mandan ran o pokon o, me mi palilan le, lao kilaner, me jota apot jop mi waja o, pwe i eta, me japwilim a tounpadak kan keredan poa, o me Iejuj jota ian japwilim a tounpadak kan kotidan pon jop o, pwe a tounpadak kan kola kelep. 23 A pil akai kijin jop me pwarado jan Tiperiaj, tana don waja o, me re manamana ia, murin Kaun o kotin laolao. 24 Aramaj akan lao kilaner, me Iejuj jolar kotikot ia, o japwilim a tounpadak kan pil jo, rap dake jop pot kolan Kapernaum, raparapaki Iejuj. 25 Irail lao diaradar i palilan le, ap potoan on: Rapi iad me re kotido? 26 Iejuj kotin japen irail majani: Melel, melel I indai on komail, komail kin rapakin ia kaidin pweki kilel akan, me komail kilan, a pweki komail kanala kijin prot ap metier. 27 Komail der dokki mana, me kin ola, a dokki mana me kin mimieta on maur joutuk, me Nain aramaj pan ki on komail, pwe i me Kot Jam kileledier. 28 Irail ap potoan on i: Da me jen wiada, pwen kapwaiada en Kot a dodok kan? 29 Iejuj kotin japen majani on irail: Iet en Kot a dodok: Komail en pojon i, me a kadarado. 30 Irail ari potoan on i: Kilel da, me re kotikida, pwe jen kilan o pojon ir? Da me re kotin wiada? 31 Jam at akan me kanala mana nan jap tan o, duen a intinidier: A kotiki on irail prot jan nanlan, en kanala. 32 Iejuj ap kotin majani on irail: Melel, melel I indai on komail, kaidin Mojej, me ki on komail prot jan nanlan, a Jam ai kin ki on komail prot melel jan nanlan. 33 Pwe me kodido jan nanlan, o ki on jappa maur, iei prot en Kot. 34 Irail ap indan i: Main, kotiki don kit prot wet kaukaule! 35 Iejuj kotin majani on irail: Prot en kamaurnai, me ko don ia jolar pan men manadar, o me pojon ia, jolar men nim piladar. 36 A I indai on komail er, komail kilan ia er, ap jo pojon la. 37 Karoj me Jam ki on ia, pan ko don ia, a me ko don ia, I jota pan kajela. 38 Pwenai kodido jan nanlan, kaidin pwen wiada injen ai, pwe kupur en i, me kadar ia do. 39 Pwe iet kupur en me kadar ia do, karoj me a ki on ia er, I ender kajela amen, pwe I en kamaureda ni ran nik o. 40 A iet kupur en Jam ai, amen amen, me kin kilan Na o pojon i, en aneki maur joutuk, a I pan kamaureda i ni ran nik o. 41 Juj oko ap lipanedeki i, pweki a kotin majani: Ngai prot, me kodi jan nanlan. 42 Irail indada: Kaidin i Iejuj nain Iojep? A jam a o in a je aja. Ari, daduen a indada: I kodido jan nanlan? 43 Iejuj kotin japen majani on irail: Komail der lipaned nan pun omail! 44 Jota me pan kak ko don ia, ma Jam, me kadar ia dor, jota kainonido i. A I pan kamaureda i ni ran nik o. 45 A intinidier nan jaukop akan: Irail karoj pan ale padak jan ren Kot. Amen amen me ronadar o padakki ren Jam, kin ko don ia. 46 Ari, kaidin pweki meamen kilan Jam; i eta, me kodo jan ren Kot, i me kilaner Jam. 47 Melel, melel I indai on komail, me pojon ia, iei me aneki maur joutuk. 48 Prot en maurnai. 49 Jam omail oko, me kanala mana nan jap tan o, ir ari melar. 50 Met prot, me kodido jan nanlan, meamen kin kan jan i, jota pan mela. 51 Ngai prot maur, me kodido jan nanlan, meamen kan jan prot wet, pan memaur kokolata. Prot, me I pan kida, iei uduk ai, me i pan kida en kamaur kida jappa. 52 Juj oko ari akamaiki pena indada: Iaduen men et pan kak ki on kit uduk a jen kan? 53 Iejuj ap kotin majani on irail: Melel, melel I indai on komail, ma komail jota pan kan uduk en Nain aramaj o nim nta, jota maur omail. 54 Me kin kan uduk ai o nim nt’ ai, iei me aneki maur joutuk, a I pan kamaureda i ni ran nik o. 55 Pwe mana melel uduk ai, o pil melel nt’ ai. 56 Me kin kan uduk ai o nim nt’ ai, iei me podidi on ia onai podidi on i. 57 Duen Jam ieiaj kadar ia do, onai memaureki Jam, iduen me kan uduk o nt’ ai, pan meaurekinai. 58 Iet prot, me kodido jan nanlan, kaidin duen jam omail akan, me kanala mana ap mela, a meamen kin kan prot wet, pan memaur kokolata. 59 Mepukat a kotin majani wei nan jinakoke, ni a kotin kawewe nan Kapernaum. 60 Ari, me toto ren japwilim a tounpadak kan, me ronadar mepukat indada: Padak pot et meid apwal! Ij me kak ron? 61 Iejuj lao kotin ani nan kupur a, me japwilim a tounpadak kan lipanedeki mepukat, ap kotin majani on irail: Komail makaraki mepukat? 62 A ma komail pan kilan Nain aramaj kodala waja, me a kaujon ia maj o? 63 Ngen me kin kamaureda, a uduk jota katepa. Padak kan, me I kin padapadaki on komail, iei Ngen o maur. 64 A akai mi re omail, me jo pojon. Pwe Iejuj kotin mani, me jo pojon o me pan panala i. 65 A kotin majani: I me I indaki on komail, jota me kak ko don ia, ma Jam jota kainonido. 66 Jan ni anjau o japwilim a tounpadak kan toto mueiwei jan o jolar idauen i. 67 Iejuj ap kotin kainoma ren ekriamen oko: Komail pil pan kola? 68 A Jimon Petruj ap japen i: Main, ij me je en ko on? Pwe ar majan akan iei maur joutuk. 69 A kit pojonlar o ajaer, me ir me Jaraui en Kot. 70 Iejuj kotin japen irail: Kaidek komail ekriamen, me I piladar, a amen komail me tewil amen. 71 A kotin majaniada duen Iudaj Ijkariot nain Jimon, pwe i amen ren ekriamen oko, me pan panala i.

Copyright information for `PON