John 8

IEJUJ ap kotidala pon dol Oliwe. A nin joran a kotin pure don on nan im en kaudok. Aramaj karoj ap pokon don i. I ari kaipokedi kaukawewe on irail. A jaunkawewe o Parijär akan wa don i li amen, me diarokadar ni a kamal. Irail kidan i nan pun arail. Ap indan i: Jaunpadak, li men et diarokadar ni a kamal. A Mojej majani on kitail nan kapun o, jen kate jon en. A komui, da me komui majani? A mepukat re indan i, pwen kajonejon i, pwe ren kak impimpaiki i meakot. A Iejuj kotin idiokidi, intiniekidi on nani pwel jondin lim a. A ni ar poden kalekalelapok re a, a ap kotin denida majani on irail: Ari, me jota dip a nan pun omail, a pan tapiada kate i. A pil kotin idiokidi intiniedi on nan pwel. Irail lao ronadar met, rap mulikidar tentelwei, me laud maj lel me tikitik o. A Iejuj kelepela, li eta, me mi re a. 10 Iejuj lao kotin denida o jota majani meamen, li eta, ap majani on i: Ia me karaun uk edi kan? Jota me kadeik uk ada? 11 A potoan on: Jota Main. Iejuj ap kotin majani on i: I jota pil pan kadeik uk ada. Kowei, koe der pil wiada dip! 12 Iejuj ap pil kotin padaki on irail majani: Ngai marain en jappa. A me kin idauen ia, jota pan weid ni rotorot, pwe marain en maur pan mi re a. 13 Parijär oko ap indai on i: Komui kadede pein komui; ari, omui kadede jota melel. 14 Iejuj kotin japen majani on irail: Ma I kadede peinnai, ari melel ai kadede, pwe I aja, waja I kodo jan ia o waja I koko on ia, a komail jaja, waja I ko jan ia o waja I koko on ia. 15 Komail kin kadeikada duen pali uduk, a jota meamen, me I kin kadeikada. 16 Ari jo ma I kadeikada, ai kadeik pan melel, pwe I jota kin kelep, pwenai o Jam, me kadar ia dor. 17 A pil intinidier nan omail kapun, me kadede en aramaj riamen me melel. 18 Ngai me kin kadede peinnai o Jam, me kadar ia dor, kin kadede ia. 19 Irail ap indai on i: Ia Jam omui? Iejuj kotin japen: Komail jota ajanai, pil jota Jam ai. Ma komail aja ia, komail pil pan aja Jam ai. 20 Majan pukat Iejuj kotikida nan pera en moni, ni a kotin kaukawewedar nan im en kaudok o. A jota me koledi i, pwe a anjau jaikenta leler. 21 Iejuj pil kotin majani on irail: I kokola, a komail pan rapakin ia o mela ni omail dip akan, a waja, me I pan kola ia, komail jota pan kak on. 22 Juj oko ap indada: A pan kamela pein i, pweki a inda: A waja, me I pan kola ia, komail jota pan kak on? 23 A kotin majani on irail: Komail kijan men pa, anai kijan men poa. Komail kijan jappa et, anai kaidin kijan jappa et. 24 Iei me I indaki on komail, komail pan mela ni omail dip akan, pwe ma komail jota kamelele ia, komail pan mela ni omail dip akan. 25 Irail ap indai on i: Ij koe? Iejuj kotin majani on irail: Me I indawei maj o, i eta. 26 Me toto I men padaki on komail o kadeikada, ari jo, me kadar ia do me melel. A I kin kajoia on komail, me I ronadar re a. 27 Irail ari jaja, me a kotin kajoia on irail duen Jam a. 28 Iejuj ap kotin majani on irail: Komail lao kauadar Nain aramaj, komail ap pan aja, menai i, o me I jota wia meakot jan peinnai. A duen Jam, me padaki on ia er, iduen I kin kajoia wei. 29 Me kadar ia do, kin ieian ia, a jota lokit ia la, pwe I kin potin wia, me a kupura mauki. 30 Ni a kotin majani mepukat, me toto ap pojonla i. 31 Iejuj ap kotin majani on Juj oko, me pojon i: Ma komail pan podidi on ai padak, nan ai tounpadak melel komail. 32 O komail pan ajala melel, o melel pan kamaio komail da. 33 Irail japen i: Wan Apraam kit, jota me je lidui jan maj kokodo. A iaduen, komui indada: Komail pan maioda? 34 Iejuj kotin japen irail majani: Melel, melel I indai on komail, meamen; me wiawia dip, i me ladun dip. 35 A ladu o jota pan mimieta nan im o, na eta pan mimieta. 36 Ari, ma Na pan kamaio komail da, komail pan maioda melel. 37 I aja, me wan Apraam komail, a komail kin rapaki, en kame ia la, pwe ai padak jota kin podidi on komail. 38 Me I kilan ren Jam ai, iei me I inda wei, a komail kin wiawia, me komail ronada ren jam omail. 39 Irail japen indan i: Jam at Apraam. Iejuj kotin majani on irail: Ma komail nain Apraam, jeri kan, komail pan wia duen en Apraam a wiawia kan. 40 Ari, met komail kin rapaki kame ia la, aramaj amen, me kajoi on komail melel, me I ronadar ren Kot, i me Apraam jota wiadar. 41 Komail kin kapwaiada wiawia kan en jam omail. Irail ap indan i: Kaidik kit ipwin nenek. Jam at me ta men Kot. 42 Iejuj kotin majani on irail: Ma Kot Jam omail, komail pan pok on ia, pwe I kodo jan ren Kot, kaidik jan peinnai, me I kokido, pwe i me kadar ia do. 43 Da me komail jota weweki ai padak? Pweki omail jota kak ron ai padak. 44 Komail tapi jan ren jam omail tewil, o inon en jam omail, me komail men wiada. Nan i men kamela men jan ni tapi o, o a jota dadaurata melel, pwe jota man melel mi re a, ni a lalal likam, a kin kida jan pein audepa, pwe i me likam men o jam en likam o. 45 A komail jota kamelele ia, pweki I padaki on komail melel. 46 Ij re omail, me kak indan ia, me dip ai mia? A ma I kajoi melel, menda komail jo pojon? 47 Men ren Kot kin ron en Kot a majan akan. Komail ari jota ron, pwe kaidin me ren Kot komail. 48 Juj oko japen indan i: Kaidik meid melel, koe men Jamaria amen o tanwar en tewil. 49 Iejuj kotin majani: Kaidik tanwar en tewilnai, pwe I wauneki Jam ai, a komail kin kijan ia wau i. 50 I jota kin rapaki pein wau i, amen mia, me kin raparapaki o kadeikada. 51 Melel, melel I indai on komail, meamen kapwaiada ai padak, jota pan mela kokolata. 52 Juj oko ap indai on i: Je ap ajaer, me koe tanwar en tewil. Apraam melar, pil jaukop akan, a koe me inda: Meamen kapwaiada ai padak, jota pan mela kokolata, 53 Da, komui me lapa jan jam at Apraam, me matalar, pil jaukop akan, me matalar? Ij me komui pein wia kin uk? 54 Iejuj kotin japen: Ma I pein kaka kin ia, ai kaka me mal. A Jam ai, me kaka kin ia, me komail kin inda: I atail Kot. 55 Komail ari kaikenta aja i, a I aja i, a ma I inda, me I jaja i, I pan me likam amen dueta komail. A I aja i o kapwaiada a majan akan. 56 Jam omail Apraam peren kida, me a pan kilan ai ran. I ari kilaner ap peren kidar, 57 Juj oko ap indan i: Par limeijok kaik dau po ’mui, a kom kilaner Apraam? 58 Iejuj kotin majani on irail: Melel, melel I indai on komail, I mier mon Apraam. 59 Irail ap rik takai, pwen kajuk i, i ap kotin oki jan irail pein i, kotila jan nan im en kaudok o.

Copyright information for `PON