Luke 4

A IEJUJ, me dir en Ngen jaraui, puredo jan Iordan, o Ngen kotin kalualan i nan jap tan. O wia jonejon pan tewil ran panaul. A jota kotin konot ni ran oko. Ran akan lao imwijokela ap men konot. Tewil ap indai on i: Ma komui japwilim en Kot, en majani on takai wet, a en wiala prot. A Iejuj kotin japen i majani: A intinidier: Kaidin prot eta, me aramaj en memaureki, pwe majan en Kot akan. Tewil ap kaluadalan i pon nana ileile eu o kajala on i wein jappa karoj ni marep taieu. Tewil indan i: I pan ki on komui manaman pukat karoj o a linan, pwe a muei on ia er, a i pan ki on, me i mauki. Ari, ma komui pan poni ia, karoj ap pan japwilim omui la. Iejuj kotin japen i majani: A intinidier: Koe en poni on Kaun om Kot; i eta, koe en papa. I ap kalualan i Ierujalem o kauada i pon konkon en im en kaudok o indai on i: Ma komui japwilim en Kot, kajedi pein komui, 10 Pwe a intinidier: A pan kajilaki japwilim a tounlan kai komui, pwen apapwali komui. 11 O wa komui nan lim ar akan, pwe aluwilu omui der dipikelekel ni takai eu. 12 Iejuj kotin japen majani on i: A lolokido, koe ender kajonejon Kaun om Kot! 13 Tewil lao kanikiela jonejon karoj, ap muei jan i anjau kij. 14 Iejuj ap kotin pure don Kaliläa ni rojon en Ngen, ap indand jili nan jap karoj me mi imp a. 15 A kotin kaukawewe nan ar jinakoke kan, o karoj kapina i. 16 A kotin lel Najaret, waja a kotin kakairida ia, ap kotilon jon nan jinakoke duen a kin wiada ni ran en japat o kotida, pwen wadok. 17 Puk en jaukop Iejaia ap wijike don i a lao lim pajan puk o ap diarada waja o me intinidier: 18 Ngen en Kaun kotikot re i, i me a keie kin ia da, pwen padaki on me jamama kan ronamau. A kadar ia do, pwen kaloki on me jalidi kan, me ren jaladokela, o me majkun akan pan kilan waja, o me patau kan pan maioda, 19 O kaloki jaunpar mau en Kaun o. 20 A kotin lim pena puk o ap kupure on me papa men o kotidi. Maj en karoj nan jinakoke kankakil i. 21 I ari tapiada majani on irail: Kijin likau wet pwaidar mo ’mail ran wet. 22 Ir karoj ap kadede o puriamuiki majan kompok kan, me pwili jan jilan i, ap indada: Kaidin i nain Iojep? 23 A ap kotin majani on irail: Nan melel, komail pan indan ia karajeraj wet: Jaunwini, jauaja pein uk! Pwe je ronadar duen jon kapuriamui, me wiauier nan Kapernaum; ari kom pil wiada dueta waja et nan jap omui. 24 A kotin majani: Melel I indai on komail, jota jaukop amen me konekon nan jap we. 25 A melel I indai on komail, li odi toto mi nan Ijrael ni muein Eliaj, ni anjau nanlan matata par jilu o jaunipon wonu, ni lek lapalap kipadi jap karoj; 26 A jota amen, me Eliaj pakadar won, pwe ren li odi men nan Jarepta nan jap Jidon. 27 O me tuketuk kan me toto nan Ijrael ni muein jaukop Eliaj, a jota amen re ’rail, me kelailadar, pwe Naeman eta men Jirien. 28 Karoj, me mi nan jinakoke ni ar ronadar mepukat, ap makar kida kaualap, 29 Re udar jikonlar i jan kanim o, o kalualan i pon kailan dol o, waja ar kanim kakaudar ia, pwen kajedi jan ia, 30 A i kotin weid nan pun ar, kotila jan irail. 31 I ari kotilan Kapernaum kanim en Kaliläa, o kotin kawewe on irail ni ran en japat akan. 32 Irail ari puriamuiki a padak, pwe a majan me manaman. 33 A aramaj amen mi nan jinakoke, menen en tewil jaut amen ti po a, me weriwer laud, 34 Inda: Ko jan kit, menda re omui kit Iejuj en Najaret! Kom kotido, en kawe kit ala. I aja, me komui nain Kot jaraui. 35 Iejuj ap kidaue i majani: Nenenla o ko jan re a. Tewil lao kajedi i nan pun arail, ap koiei jan re a, jota me jued kot a wiai on i. 36 Irail karoj ap puriamui kila, kajokajoi nan pun arail indada: Dakot majan pot et? Pwe a majan manaman o rojon onnen jaut akan, irail ap kin ko wei jan. 37 I ari indand jili nin jap karoj waja o. 38 I ap kotida jan nan jinakoke, ap kotilon on nan im en Jimon. A jaulap en Jimon me jomau karakar. Irail ari poekipoeki i re a. 39 I ari koti don i majani on jomau o, ap madan ko jan, i ari madan paurida papa irail. 40 Katipin lao kirilar, rap wa don i ar luet akan karoj. I ari kotikidan amen amen lim a kan, kakelail ir ada. 41 O tewil akan pil kowei jan ren me toto, me weriwer indada: Komui japwilim en Kot. I ari kotin kidau ir ada, o jota mueid on irail, en lokaia, pwe re aja, me i Krijtuj. 42 A lao waja ran a kotilan waja rir, a pokon o raparapaki i, re pokon don i o kolekol i pwen der koti wei jan irail. 43 A i kotin majani on ir: I pil pan padaki ronamau en wein Kot nan kanim tei ko, pwe i me I pakadar kidor. 44 A i kotin padapadak nan jinakoke en Kaliläa kan.

Copyright information for `PON