Mark 2

MURIN ran akai a ap pil kotilon on Kapernaum, ap loki jili me a kotikot nan im o. Me toto ap madana pena, im o lao koidala o pil likin im o. A ap kotin kawewe on ir majan o. Irail ari poto don re a, wa kodo me jomau rerer men, roan pa men. Irail jota kak kai don impa pweki pokon o. Re ap palan pajan pon im o, waja a kotikot ia; irail lao palan pajan ap kakiredi ro o, me jomau o mi poa. Iejuj lao mani ar pojon, ap majani on me jomau rerer o: Nai, dip om akan lapwa jan uk er! Ari, jaunkawewe kai momod waja o, monemonloleki: Da me men et lokelokaia? A lalaue. Ij me kak lapwada dip akan, pwe amen ta, Kot? Iejuj ari madan aniada nan kupur a duen ar monemonlole, ap kotin majani on irail: Da me komail monemonloleki? Ia me manai ren indai on me jomau rerer: Dip om akan lapwa jan uk er, de inda: Uda, ale ki om, kowei? 10 A pwe komail en aja, me Nain aramaj me manaman on lapwada dip akan nin jappa, iei me a kotin majanieki on me jomau rerer: 11 I indai on uk: Uda! Al eki om! U ko on ni im om! 12 I ari madan uda, ale ki, aluwei mo ’rail karoj. Irail karoj ari malamalaua kila, kapina Kot inda: Je jaikenta man kilan meakot et! 13 I ari pil kotila liman jed o. Irail karoj ap pokon don i, i ari kotin kawewe on irail. 14 A lao kotin daulul waja o, ap majani Lewi, nain Alpäuj, a momod ni wajan nopwei, ap majani on i: Idauen ia do! I ari uda idauenla i. 15 Kadekadeo a lao kaipokedi konot nan im a, jaunopwei o me dipan akan me toto ian Iejuj o japwilim a tounpadak kan konokonot; pwe irail me toto, me idauen i. 16 Ari, ni en jaunkawewe o Parijär akan ar kilan a kotin ian me dipan o jaunopwei kan konokonot, irail ap indai on japwilim a tounpadak kan: Da me a ianki jaunopwei o me dipan akan konot o kaker eki? 17 Ni en Iejuj aniada, ap kotin majani on irail: Me kelail akan jota mau on jaunwini pwe me jomau ta. I jota kodon ekeredo me pun kan, a me dipan akan. 18 En Ioanej a tounpadak kan o Parijär akan kin kaijejol. Irail ari kodo potoan on i: Da me en Ioanej a tounpadak kan kin kaijejol, o en Parijär ar tounpadak kan, a japwilim omui tounpadak kan jota kin kaijejol? 19 Iejuj ap kotin majani on irail: Da, toun kamadip en kapapaud pan kak kaijejol ni en ol kamod a ian irail? Ni en ol kamod a ian irail, re jota pan kak kaijejol. 20 A anjau kokodo, me ol kamod pan wijike jan irail, iei ran o, me re pan kaijejol. 21 Jota amen me pan deik on likau kap ni likau marin, pwe likau kap pan dei jan likau marin, por o ap pan laudela. 22 Pil jota amen me kin deuke kida ed marin wain kap, pwe wain o de ter pajan ed o, wain o ari wudokila, ed o ola. A wain kap mau on nan ed kap. 23 Kadekadeo a kotin weid nan mat en korn ni ran en japat. Japwilim a tounpadak kan ap dondolun kowei wan korn. 24 Parijär oko ap indai on i: Kilan, da me irail wia ni japat me jota pun, en wiaui? 25 A kotin majani on irail: Komail jota wadoker, me Dawid wiadar, ni a men kaualap, o a men mana, i o me ian i? 26 Duen a pedelon on nan tanpaj en Kot ni muein Apiatar jamero lapalap, o kanala prot mairon o nek on irail, me ian i, me jota pun aramaj en tunole, jamero kan eta? 27 A ap kotin majani on irail: Japat me wiaui on aramaj a kaidik aramaj on japat. 28 I me Nain aramaj pil udan kaun en japat.

Copyright information for `PON