Matthew 12

I ANJAU o Iejuj kotila nan mat en korn ni ran en japat, a japwelim a tounpadak kan men manadar, rap doluna jan wan korn o kankan. Parijär lau kilaner mepwukat, rap patoan on i: Majani, japwilim omui tounpadak kan kin wiada, me jota pun, en wiaui ni ran en japat. A kotin majani on irail: Komail jota doropwe, me Dawid wiadar ni a o ian akan men manadar? Duen a pedelon on nan im en Kot o kankan prot en kajanjal, me jota pun, i o ian akan en kan, pwe jamero akan eta. De komail jota wadoker nan kapun o, duen jamero akan ar kin kaupali ran en japat nan im en kaudok ni ran en japat, ap jota dip arail? A I indai on komail, i, me laude jan im en kaudok, mi waja kij et. A ma komail pan aja wewen kajoi pot et: I kin polauleki kadek a kaidin mairon ijij, komail jota pan kadeikada me makelekel akan. Pwe nain aramaj pil udan Kaun en japat. A kotila jan waja o, ap kotilon on nan ar jinakoke. 10 A kilan, aramaj amen mia, me pa a motorlar. Irail idok re a indada: Me pun, en kakelailada ni ran en japat? Pwe ren kadipa i. 11 I ari kotin majani on irail: Ij aramaj nan pun omail, me na jip amen mia, ma a pupedi on nan por ni ran en japat, a jo pan poridi on, kida jan? 12 A iaduen aramaj amen jota kajampwal kaualap jan jip amen? I me aramaj amen kak wia kida me mau ni ran en japat. 13 I ap kotin majani on aramaj o: Kapa wei pa om! I ari kapa wei, ap maular dueta pali teio. 14 Parijär ap pedoi jan o kapukapun pena, duen ar pan kamatala i. 15 Iejuj lao mani met, ap kotila jan waja o, a pokon kalaimun idauenla i; i ari kakelailadar irail karoj. 16 O majani on irail, ren der kalok jili i. 17 Pwen pwaida, me lokido ren jaukop Iejaia, me majani: 18 Kilan, i ai ladu, me I piladar, o kompokepa i, me I kin polaule kida. I pan aude kin i Ngen i, o a pan kajale on men liki kan duen kadeik o. 19 Nan a jota pan akamai de weriwer, o jota amen me pan ronnil a pon al akan, 20 A jota pan katip pajan alek luet o, o a jota pan kakundi wik inkinkon o, lao a pan kaimwijokala kadeik o. 21 O men liki kan pan kaporoporeki mar a. 22 Me tewil ti poa men, me majkun o loton ap wijike don i; i ari kakelailada i, a me majkun o loton ap lokaia o kilan waja. 23 Aramaj karoj ap malamalauak kila indada: Kaidin i japwilim en Dawid? 24 A Parijär akan lao ronadar, rap indada: Nan jota, me lap en kaujeki wei tewil akan, Peelje pup eta, jaumaj en tewil akan. 25 I ari ani ar lamelam majani on irail: Wei karoj, ma tou a kan pan u pena nan pun ar, a pan ola, o ma toun kanim de toun im eu pan u pena nan pun ar, a jota pan pwaida. 26 O ma Jatan pan kauje wei Jatan, a pan u on pein i, a iaduen a wei pan kak pwaida? 27 Ma I kin kaujeki wei Peeljepup tewil akan, a ij me noumail jeri kan kin kauje kin irail? Irail ari pan omail jaunkapun. 28 A ma I kaujaki wei Ngen en Kot tewil akan, nan wein Kot lel on komail er. 29 De iaduen, ij me pan kak kolon on nan im en me kelail amen, kulia jan a kapwa, ma a jo jaliedi maj me kelail o? A ap pan kak kulia jan a kapwa. 30 Meamen me jota ian ia, iei me palian ia; o me jota kin dolun penan ia, iei me kin kajapoka pajan. 31 I me Ngai indai on komail, dip karoj o lalaue pan kak lapwa jan aramaj, a lalaue on Ngen jota pan lapwa jan aramaj. 32 O me pan lalaue Nain aramaj, a pan lapwa jan i; a me pan lalaue Ngen jaraui, a jota pan lapwa jan i, jota nan muei met pil jota nan muei kokodo. 33 Padukedi tuka mau pot, a wa pan mau; de padukedi tuka jued apot, a wa pan jued. Pwe tuka kin diarok kida wa. 34 Wan jerpent komail, iaduen komail kak lokaia mau, pwe komail me jued? Pwe aua kin lokaia jan nan audepan monion o. 35 Aramaj mau kin kida me mau jan nan pai mau en monion i, a aramaj jued kin kida me jued jan nan pai jued en monion i. 36 A I indai on komail, lokaia mal karoj, me aramaj inda, pan puk on ir ni ran en kadeik o. 37 Pwe jan ni om kajokajoi koe pan kapun kila, o jan ni om kajokajoi koe pan pakadeikada. 38 Jaunkawewe o Parijär kai ap japen i indada: Jaunpadak, je men kilan kilel eu jan re omui 39 A i me kotin japen majani on irail: Di jued o kamal o kin rapaki kilel eu, a jota kilel eu, me pan janjal on irail, pwe kilel en jaukop Iona eta. 40 Pwe duen Iona a mimi nan kaped en mam kalaimun amen ran jilu o pon jili pon, iduen Nain aramaj pan mimi nan monion en jappa ran jilu o pon jili pon. 41 Ol en Niniwe kan pan u on di wet ni kadeik lapalap o pan kadeikada, pwe re kalula ni ar ronadar padak en Iona, a kilan, me laude jan Iona mi met. 42 Li nanmarki en pali air amen pan u on di wet ni kadeik lapalap o pan kadeikada; pwe a pwurado jan ni imwin jappa, pwen ron lolekon en Jalomo. A kilan me laude jan Jalomo mi met. 43 Ngen jaut lao kowei jan ren aramaj o, a kin tanatan jili nan jap tan akan, rapaki wajan kamol, a jota, me a diarada. 44 I ap kin inda: I pan purelon nan im ai, me i pedoi janer. A lao puredo, a diar me a tan, kokok, o kapwater. 45 I ari mi koieila, ale on inen ijimen, me jued jan pein i; irail lao pedelon on lole, rap kaukaujon ia, a aramaj pan jued jan maj. Iduen a pan wiaui on di jued wet. 46 A ni a kotin majani on pokon o mepukat, kilan, in a o ri a ol akan u liki, re men lokaia on i. 47 Amen ap potoan on i: Re kotin mani, in ar o ri ar ol akan mimi liki o men lokaia on ir. 48 A a kotin japen majani on, me kaireki on i: Ij in ai o ij ri ai ol akan? 49 Ap kotin kapawei lim a pon japwilim a tounpadak kan majani: Kilan, in ai o ri ai ol pukat! 50 Pwe meamen, me kin wia kupur en Jam ai, me kotikot nanlan, nan i me ri ai ol, o ri ai li, o in ai.

Copyright information for `PON