Matthew 2

A IEJUJ lao ipwidier Petleem nan Iudäa ni muein nanmarki Erodej, kilan ol lolekon kai ap pwarado jan ni maj en Ian ko don Ierujalem, kalelapok: Ia Nanmarki en Juj akan, me apton ipwidier, kotikot ia? Pwe je kilaner a uju ni jap en maj en lan ap pwarado, pwen poni i. A nanmarki Erodej lao ronadar mepukat, ap landar o toun Ierujalem karoj, Ap kupokon pena jamero lapalap karoj o jounkawewe en aramaj akan kainoma re ’rail, wasa Krijtuj pan ipwidi ia. Irail ari potoan on i: Nan Petleem en Iudäa; pwe iduen a intinidi ren jaukop o: A koe Petleem, jap en Iuda, kaidin me tikitik nan pun en jaupeidi en Iuda kan; pwe Kaun amen pan tapi jan uk, me pan kaunda nai aramaj en Ijrael akan. Erodej ap kawai pena ol lolekon kan, kalelapok mau re ’rail anjau o, me uju o pwarado. I ari porone ir alan Petleem majani: Komail kowei raparapaki mau jeri o; a komail lao diaradar, en kaireki don ia, pwe i en pil kola poni i. Irail lao roner nanmarki o ap koieila. A kilan uju o, me irail kilaner nan jap en maj en lan, ti on mo ’rail, a lao udi on waja o, me jeri pwelel kotikot ia. 10 Irail lao kilaner uju o, re ap peren kida kaualapia. 11 Irail lao pedelon on nan im o, re ap majanier jeri pwelel o in a Maria, re ap kaipokedi o poni i, o kapwaredar arail kapwa kan, ap maironki on i kold, o men pomau, o mire. 12 Kot ap kotin panoki on irail ni arail auramen, en der purelan Erodej, re ap weidwei ni apot al purelan jap arail. 13 Irail lao jamalar, kilan tounlan en Kaun amen ap pwara don ren Iojep ni a aliman majani: Paurida, ale jeri pwelel en o in a tanwei lan Äkipten o kaukaujon waja o, I lao kaire kin uk, pwe Erodej pan rapaki jeri pwelel o pwen kamatala. 14 I ari kipada, aleer jeri pwelel o in a ni pon, kotilan Äkipten; 15 O kaukaujon ia, lao en Erodej a matala, pwen pwaida, me lokido jan Kaun o, ren jaukop o me majani: Jan nan Äkipten me I ekeredo nai ol o. 16 Erodej lao manier, me a jarokidier ol lolekon kan, ap onion kidar kaualap o poronelan, kamela jeri ol karoj, me mi Petleem o nan jap jalon karoj, me jaunpar riau o tikitik jan, duen anjau me a kalelapok mau ren me lolekon kan. 17 I dokan a pwaidar me lokido ren jaukop Ieremia me majani: 18 Ngil eu wiauier nan Rama, janejan o maiei laud; Rael janejanki na jeri kan, a kan injenemaula, pwe irail joer mia. 19 A Erodej lao matalar, kilan tounlan en Kaun amen ap pwara don ren Iojep nan Äkipten ni a aliman, 20 Majani: Paurida ale jeri pwelel en o in a, ko won nan jap en Ijrael, pwe irail melar, me rapaki, pwen kamela jeri pwelel o. 21 I ari kipadar, ale jeri pwelel o in a, pure don jap en Ijrael. 22 A lao mani, me Arkelauj kaunda Iudäa wiliandi jam a Erodej, ap lan kotilan waja o. Kot ap kotin panoki on i ni a aliman, ap kotilan jap en Kaliläa kai. 23 O kotido kotikot nan kanim eu me adaneki Najaret, pwen pwaida, me lokido ren jaukop akan: A pan maraneki men Najaret.

Copyright information for `PON