Psalms 69

MAING Kot, kotin jauaja ia, pwe pil itida lel on maur i.
I pan kirila nan waja lujujur lol, waja me jota kakaluak; i mi nan pil lol, o ad pan kamop ia la.
I pana kila ai janejan, kapin wor ai kirkilar, maj ai juedalar, pwe a warailar ai auiaui Kot.
Me kin tata kin ia nin joka repa me toto jan pit en mon ai. Me imwintiti on ia, o me kin kawe ia la, ap jota karepa, kin kelail. I en pwain, me i jota kulia jan.
Main Kot, kom kotin mani ai pweipwei, o ai japun kan me jota rir jan komui.
Kom der mueid on irail, me auiaui komui, en jarodi pwekinai, Main Ieowa Jepaot; kom der mueid on irail, me rapaki komui, en namenokala pwekinai, Kot en Ijrael.
Pwe i kin kankaururla pweki komui, maj ai me dir en namenok.
I wialar men wai amen ren ri ai kan, o nain in ai jaja ia lar.
Pwe limpok on tanpaj omui kajor ia dier, o lalaue en ir, me kin lalaue komui id ko don ia.
10 I kin janejan melel o kaijejol, ari jo, re kin lalaue ia.
11 I likau kidar ed eu, a re kin lalaue ia.
12 O me mondi pan wanim, kin kajekajenda ia, o wajan kan jakau, re kin kakaul kin ia.
13 A i kin kapakap on komui Main Ieowa ni anjau me kon on; Main Kot, kom kotin mani ia pweki omui kalanan lapalap o kotin jauaja ia.
14 Kotin dore ia la jan nan pwel, pwe i ender kirila; pwe i en piti jan, me kailon kin ia o jan nan pil lol;
15 Pwe lapake ender kamop ia la, o waja lol ender kadala ia la, o au en por o ender pur pena on po i.
16 Mani ia, Main Ieowa, pwe omui kalanan meid mau, kom kotin majan don ia, pweki omui kalanan lapalap.
17 O kom der karirela jan japwilim omui ladu jilan omui, pwe i majak; kom kotin madan mani ia!
18 Kom kotido rennen i o dorela i, kotin dore ia la pweki ai imwintiti kan.
19 Komui manier duen ai jarodier, o ai lijela, o ai namenok, me palian ia, kin janjal on komui.
20 Ai jarodier kin kawela nan monion i, o i luetalar melel. i auiaui, ma jota me pan injenjuedeki mepukat, a jota man amen; o ma jota, me pan kamait ia la, a jota me i kak diar.
21 Irail kin kamana kin ia ede, o kanim pil kin ia pinika ni ai men nim piladar kaualap
22 Arail tepel en wiala injar arail, o lidip arail, o kapup arail.
23 Maj arail en rotorotala, pwe ren der kilan waja, o irail en koj pena kokolata.
24 Wudokidi on po ’rail omui onion, o omui onion melel en lel on irail.
25 Deu ’rail en lijelipinda, o jota me pan kaujon nan im arail.
26 Pwe re kin pakipaki, me kom kotin kaloker, o re kin indinda, me dene komui kin kaloke mal japwilim omui kan.
27 Kom kotin kaloedi on ir ni japun toto, pwe ren der konodi omui pun.
28 Irij jan ir nan puk en kamaur, pwe ren der ian me pun kan kileledi.
29 Anai me luet, o i kin waiwairok. Main Kot, omui jauaja ia en jinjila ia.
30 I pan kapina mar en Kot ki kaul pot, o i pan wauneki i melel ki danke.
31 I me Ieowa kotin kupura jan kau ol, me oje o pat en na pualapual mia.
32 Me luet akan kin kilan, o peren kida, o me kin rapaki Kot, monion arail pan maurada.
33 Pwe Ieowa kotin mani me jamama kan, o a jota kotin mamaleki japwilim a jalidi kan.
34 Nanlan en kapina i, pil jappa, o madau, o karoj me kin mokimokid lole.
35 Pwe Kot pan kotin jauaja Jion, o a pan kauada kanim en Iuda kan, pwe aramaj en kaujon waja o, o aneki.
36 O wan a ladu kan pan jojoki irail, o me kin pok on mar a, pan kaujon waja o.
Copyright information for `PON