b104.4 Ipru 1.7.
c104.26 Sohp 41.1; Mel. 74.14; Ais. 27.1.

Psalms 104

Kaping ong Sounwiepen Mehkoaros

Ngeni, kapinga KAUN-O!
Maing KAUN, ei Koht, ia uwen omwi lapalap!
Komw kin ketin kapwatkihda roson oh lingan;
marain kin dakedaker komwi.
Komw ketin pahkpeseng nanleng duwehte impwal ehu,
oh ketin kauwada tehnpasomwi powe pohn pihl kan.
 POHN PIHL KAN: Pihl kan me mi pohnangin depwek (tehk Sen 1.6-7.)

Tehnwaromwi, iei depwek kan,
oh komw kin ketiketseli pohn kisinieng.
Komw kin ketin wiahki kisinieng sapwellimomwi meninkeder,
oh lioal sapwellimomwi ladu. b 

Komw ketin koasoanehdi teng sampah pohn poahsoane,
oh e sohte mwahn pahn mwekid kohkohlahte.
Komw ketin koaduhpwalkidier sampah pilen madau, duwehte likou puhp ehu,
pihl akan koaduhpwaldier kumwen nahna kan.
Ni omwi kin angiangih pihl akan, re kin pwilpeseng,
re pil kin pwilpeseng, ni ar kin rong ngilen omwi ruwes.
Re pwilisang pohn nahna kan ong nan wahu kan,
ong nan wasa kan me komw ketin kilelehdiong irail.
Komw ahpw ketikihong irail irair ehu, me re sohte pahn daulih,
pwe re en dehr pwurehng koaduhpwalehdi sampah.

10 Komw kin ketin kakusada utuhnpihl en nan wahu kan,
oh pillap akan kin tangatang nanpwungen dohl akan.
11 Pihl pwukat me kin kanimpile mahn lawalo kan,
oh ahs lawalo kan kin niminim.
12 Menpihr kan kin wiahda pasarail
nan tuhke kan me karanih wasao, oh kin kokoul ie.

13 Komw kin ketin kamwerehdi keteu pohn nahna kan sang nanleng,
oh kin ketin kadirehkihla sampah sapwellimomwi kapai kan.
14 Komw kin ketin kawosadahng kou dihpw,
oh ong aramas wahntuhke oh werentuhke,
pwe aramas en kin kakairada wahnsahpw,
15 oh kapwarehda wain mehn kaparanda nan kapehde,
lehn olip mehn kansenamwahwihada,
oh pilawa mehn kakehlahda paliwere.

16 Sidar en Lepanon kan kin ale kelemwir mwahu—
sapwellimen KAUN-O tuhke, me pein ih ketin padokedi,
17 Menpihr kan kin wiahda pasarail nan rah kan,
oh kowelik kan kin kousoanla pohn kadoke.
18 Kuht lawalo kan kin kousoan pohn nahna ile kan,
oh rak padser kan kin wiahki dewehr nan peden paip akan.

19 Komw ketin wiahda maram pwe en kilelehdi sounpwong kan;
ketipin ahpw kin ese ahnsoun eh pahn kin kihrla.
20 Komw ketin wiahda pwohng, oh ni ahnsou en rotorot
mahn lawalo kan koaros kin pwarada.
21 Laion pwulopwul kan kin weriwerseli ni ahnsou me re kin sasaikseli kanarail kisin mwenge,
raparapahki kanarail kisin mwenge me Koht ketin kaunopadahng irail.
22 Ketipin lao kin dakada, re kin pwurala
oh wendi nan dewehr akan.
23 Aramas ahpw kin kohieiong nan sapwarail kan pwe re en doadoahk,
oh wia sapwasapw lel nin soutik.

24 Maing KAUN, ia uwen tohtohn wiepen nin limomwi kan!
Ia uwen omwi kupwurokong ni omwi ketin wieirailda!
Sampah inenen direkihla wiepen nin limomwi kan.
25 Pwe sapwellimomwi madau kan me inenen tehlap oh reirei,
wasa soangen mahn oh mwahmw koaros kin kousoan ie,
mwahmw laud oh pil mwahmw tikitik.
26 Sohp kan kin seiseiloak pohn madau, wasa me Lepaiadan kin mwadomwadong ie,
mahn kamasepwehko me komwi ketin wiahda. c 

27 Koaruhsie kin koapworopworki komwi,
re kin koapworopworki me komw pahn ketin katungoale irail ni ahnsou me re kin anahne.
28 Komw kin ketikihong irail, oh re kin tungoale,
komw kin ketin kammedkinirailla arail tungoal kisin mwenge kan.
29 Ni omwi kin ketin sohpeisang irail, re kin masepwehkada;
ni omwi kin ketin katokihedi angin silangmwi rehrail, re kin mehla,
oh pwurehng wiepwella.
30 A ni omwi kin ketikihong irail angin silangmwi, re kin mourda;
komwi me kin ketikihong sampah mour kapw.

31 Lingan en KAUN-O en poatopoatete kohkohlahte!
En kin kupwurperenki wiepen nin lime kan!
32 Ni eh kin ketin mahsanihki sampah silangi, sampah kin rerada;
oh ni eh kin ketin sair nahna kan, re kin ediedida.

33 I pahn kokouliong KAUN-O erein ei mour;
I pahn kin koul kapikapinga ei Koht erein ei mour.
34 En ketin kupwurperenki ei koulet,
pwe e kin ketin kakansenamwahwih ie.
35 Me dipan akan en sohrasang sampah;
me suwed kan en sohla mie.

Ngeni, kapinga KAUN-O!
Kapinga KAUN-O!
Copyright information for `PON2006