Psalms 138

Kapakap en Kapingkalahngan
 TITLE NI MAHSEN EN IPRU: En Depit.

Maing KAUN, I kin patohwan kasapahlkalahngan ong komwi sang nan mohngiongi unsek;
I pahn koulkihong komwi koulen kaping mwohn koht akan.
I kin sohpeiong Tehnpasomwi Sarawio,
poaridi oh kapinga mwaromwi
pwehki sapwellimomwi limpoak poatopoat oh loalopwoat,
pwehki omwi ketin kasaledahr duwen mwaromwi oh sapwellimomwi kosonned akan ar lapalahpie.
Komw ketin sapeng ie ni ei patohwan likweriong komwi;
komw ketin kakehlakiniedahr sapwellimomwi roson.

Maing KAUN, nanmwarki koaros en sampah pahn kapinga komwi,
pwehki ar rongehr sapwellimomwi inou kan.
Re pahn koulki dahme komw ketin wiadahr
oh duwen sapwellimomwi roson lapalahpie.
Mehnda ma komw kin ketiket wasa ileilehie,
ahpw komw kin ketin kupwure me tikitik kan,
oh me aklapalap akan sohte kak ruksang komwi.

Ni ei kin mihla nan apwal akan,
komw kin ketin apwahpwalih ie.
Komw kin ketin pelianda lingeringer en ei imwintihti kan
oh kin ketin kapitkiniehla sapwellimomwi manaman.
Komw pahn ketin kapwaiada sapwellimomwi inou kan koaros;
Maing KAUN, sapwellimomwi limpoak me poatopoat.
Komw ketin kaunsekala doadoahk me komw ketin tapihadahr.
Copyright information for `PON2006