b22.1 Mad. 27.46; Mk. 15.34.
c22.7 Mad. 27.39; Mk. 15.29; Luk 23.35.
d22.8 Mad. 27.43.
e22.18 Mad. 27.35; Mk. 15.24; Luk 23.34; Sohn 19.24.
f22.22 Ipru 2.12.

Psalms 22

Kapakap en Pahtou oh Koulen Kaping
 TITLE NI MAHSEN EN IPRU: En Depit melkahka.

Ei Koht, ei Koht, dahme komw ketin likidmeliekiniehla?
I likilikwerwohng sawasepei,
ahpw sawasepei saikinte pwarodo. b 
Maing ei Koht, I kin likweriong komwi ni rahn,
komwi ahpw sohte kin ketin sapeng ie;
I pil kin likilikwer nipwong,
I ahpw sohte kin diar ei kommoal.
A komwi ketiket nan mwoalomwi nin duwen Me Sarawio,
komwi me Israel kin kapikapinga.
At pahpa kahlap ako kin likih komwi;
re likihkomwihla, oh komw ahpw ketin doareirailla.
Re likweriong komwi, re ahpw pitla sang apwal;
re likihkomwihla oh ar likilik ahpw kin pweida.

I solahr mwomwen aramas; I wialahr kamwetel men,
me aramas koaros kin mwamwahliki oh wia kauwe!
Koaros me kin kilang ie kin kepitkin ie;
re kin kapwadehi lowarail oh itihtik moangarail. c 
Re kin nda, “Ke likiher KAUN-O;
a dahme e sohte ketin doarehkinuhkala?
Ma KAUN-O kupwurkinuhk,
a dahme e sohte ketin sewesehkinuhk?” d 

Komwi me ketin apwahpwalih ie ni ei ipwidi,
oh komwi me pil ketin sinsile ie ni ei seri pwelel.
10 I likih komwi sang ni ei ipwidi,
oh komwi kin wia ei Koht ahnsou koaros.
11 Komw dehr ketin dohweisang ie!
Apwal laud kerendohr,
oh sohte me pahn sewese ie.

12 Imwintihti ngeder, rasehng kouwol kei, kin kapikapil ie;
irail koaros kapikapil ie,
rasehng kouwol kommwad en Pasan.
13 Re sarapeseng duwehte laion kei,
me kin weriwerki ar men dapengiepeseng.

14 Solahr angi,
I rasehngehr pihl me wudeklahr nanpwel.
Tih kat koaros piselpesengehr;
mohngiongiet rasehng kirihs me peipesengehr nan mesenedi.
15 Nan kepinwereiet ngalangaladahr duwelahr pwelpar,
oh loweiet pasdangehr pahn ngatangatei.
Komw ketin likidmelieielahr nan pwelpar pwe I en mehla.

16 Pwihn en aramas suwed ehu kapiliepenehr
rasehng pelin kidi ehu me kohkodohng ie;
re ngalispeseng pehi kat oh nehi kat.
17 Tih kat koaros sansaladahr.
Ei imwintihti kan kin kilikilang ie oh kangkakil ie.
18 Re usuhski ei likou kan,
oh nehkpeseng nanpwungarail. e 

19 Maing KAUN, komw dehr ketin dohweisang ie!
Komw ketin mwadangodo oh kapitiehla!
20 Komw ketin doareiehla sang kedlahs;
doarehla ei mour sang kidi pwukat.
21 Komw ketin kapitiehla sang laion pwukat;
pwe sohte ei kehl rehn kouwol lawalo pwukat.

22 I pahn koasoiaiong nei aramas akan duwen wiepen nin limomwi kan;
I pahn kapinga komwi nan pokon en aramas akan: f 
23 “Kumwail ladu en KAUN-O kan, kumwail kapinga!
Kumwail kadaudok en Seikop kan, kumwail wauneki!
Kumwail mehn Israel kan, kumwail kaudokiong!
24 E sohte ketin likidmeliehla me semwehmwe kan de mwamwahliki arail lokolok kan;
e sohte kin ketin sohpeisang irail,
ahpw kin ketin kupwure irail ni ar kin likweriong.”

25 I pahn kapinga wiepen nin limomwi kan nan pokon laud akan;
I pahn kapwaiada meirong kan me I inoukidahr
mwohn irail koaros me kin kaudokiong komwi.
26 Me semwehmwe kan pahn tungoale uwen me re anahne;
irail kan me patohdohng rehn KAUN-O pahn kapinga ih.
Re en paiamwahu kohkohlahte!

27 Tohn wehi kan koaros pahn tamanda KAUN-O.
Sang ni irepen sampah koaros re pahn sohpeiong;
keinek en sampah kan koaros pahn kaudokiong.
28 KAUN-O iei nanmwarki,
oh e kin kakaun wehi kan.

29 Me aklapalap koaros pahn poaridi mwowe;
me pahn mehla koaros pahn poaridi mwohn silangi.
30 Dih kan me pahn kohdo pahn papah;
aramas akan pahn padahkihong dih en mwuhr duwen KAUN-O.

31 Aramas akan me saikinte ipwidi pahn rong:
“Kaun-o ketin kamouralahr sapwellime aramas akan!”
Copyright information for `PON2006