b86.9 Kaud. 15.4.

Psalms 86

Kapakap en Peki Sawas
 TITLE NI MAHSEN EN IPRU: En Depit kapakap.

Maing KAUN, komw ketin karonge ie oh sapeng ie,
pwe I me luwet oh sohte sawasepei.
Komw ketin doareiehla sang mehla, pwe I kin loalopwoat ong komwi;
komw ketin doareiehla, pwe ngehi sapwellimomwi ladu men oh I kin likih komwi.

Komwi me ei Koht, eri komw ketin kupwurkalahngan ong ie;
I kin wie kapakapohng komwi sang nimenseng lel nipwong.
Maing ei Kaun, komw ketin kansenamwahwihala sapwellimomwi ladu menet,
pwehki ei kin patohwandahng komwi ei kapakap akan.
Komwi me kupwur mwahu oh diren mahk ong kiht,
diren limpoak poatopoat ong koaros me kin patohwan kapakapohng komwi.

Maing KAUN, komw ketin karonge ei kapakap;
komw ketin karonge ei likwer en pek sawas.
I patohwan likweriong komwi ni ahnsou apwal,
pwehki omwi kin ketin sapeng ei kapakap akan.

Maing ei Kaun, sohte emen koht mie duwehte komwi,
sohte emen me wiadahr dahme komw ketin wiadahr.
Wehi kan koaros me komw ketin wiahda
pahn patohdo oh poaridi mwohn silangmwi;
re pahn kapikapinga sapwellimomwi roson lapalap. b 
10 Komwi me manaman oh kin ketin wiahda soahng kapwuriamwei kan;
komwihte me Koht.

11 Maing KAUN, komw ketin padahkihong ie audepen kupwuromwien,
I ahpw pahn kin loalopwoat peikiong komwi;
komw ketin padahkihong ie pwe I en kin papah komwi ni kapehdi unsek.
12 Maing ei Kaun oh ei Koht, I pahn patohwan kapinga komwi sang nan kapehdiet;
I pahn kin kalohki sapwellimomwi roson lapalap kohkohlahte.
13 Ia uwen lapalap en sapwellimomwi limpoak poatopoat ong ie!
Komwi me ketin kapitiehla sang nan sousou.
14 Maing Koht, aramas aklapalap suwed kei uhwong ie;
pwihn en aramas suwed ehu songosong en kemeiehla—
aramas me sohte kin waunekin komwi.
15 Ahpw komwi, Maing ei Kaun, komwi me kalahngan oh komwi Koht limpoak emen,
komw kin kanengamah, kadek oh loalopwoat ahnsou koaros.
16 Komw ketin sohpeidohng ie oh kupwurkalahngan ong ie;
komw ketin kakehleiehda oh komouriehla,
pwehki ei kin papah komwi duwehte ei nohno eh kin papah komwi.
17 Maing KAUN, komw ketin kasalehiong ie kilel en omwi kupwur mwahu;
irail kan me kin kailongkin ie pahn namenekla
ni ar pahn kilang duwen omwi ketin kansenamwahwihiehla oh ketin seweseiehda.
Copyright information for `PON2006