Zechariah 5

Kaudiahl en Pwuhk me Pipihr

I pwurehng kilengla oh met I kilangada pwuhk ehu me pipihr nan wehwe. Tohnlengo ahpw kalelapak rehi dahme I kilang. I ahpw sapengki, “Pwuhk ehu me pipihr nan wehwe; e piht silihsek reirei oh eisek limau tehlap.”

E ahpw mahsanihong ie, “E ntingdier loale keria me pahn kohdiong nan sahpwet pwon. Nan apali pwuhko mahsanih me sounpirap koaros pahn koakoahksang nan sahpwo; oh apali mahsanih me koaros me kin kahula ni lokaia likamw pahn pil koakoahkla. KAUN-O, Wasa Lapalap, mahsanih me e pahn ketin kadarpeseng keria wet, oh e pahn lellohng nan imwen sounpirap koaros oh nan imwen aramas koaros me kin kahula ni lokaia likamw. E pahn mihmi nan imwarail kan oh kauweirailla.”

Kaudiahl en Lih me mi nan Kopwou

Tohnlengo apw pwurehng pwarada oh mahsanih, “Kilang! Ehu soahng tohrohr pil kohkohdo!”

I ahpw kalelapak, “Dahkot mwo?”

E ahpw sapengki, “Kopwou ehu, oh e wehwehki dipen sahpwet pwon.”

Pweinen kopwowo wiawihkihda leht. Ni ei kilikilang, pweineo ahpw wakada, oh lih emen me mwomwohd nan kopwowo!

Tohnlengo ahpw mahsanih, “Lih menet wehwehki tiahk suwed kan.” E ahpw sikendi liho nan kopwowo oh pwaindi. I ahpw sarada oh kilangada lih riemen me pipihr kodohng rehi, ara pehn pihr ko me inenen kehlail duwehte pehn pihr en ikel. Ira pwekada kopwowo oh pipihrkihla.

10 I ahpw kalelapak rehn tohnlengo, “Ia wasa me ira pahn walahng ie?”

11 E ahpw sapengki, “Ira pahn walahng Papilonia, wasa me re pahn kauwadahng ie tehnpese. Ni ahnsou me tehnpaso pahn nekila, kopwowo pahn koasoansoandiong wasao pwe re en kaudokiong.”

Copyright information for `PON2006