b15.151 Mak. 12.16.

1 Macc 15

Antaiokus Keisimen Peki Sawas sang rehn Saimon

Antaiokus, sapwellimen Nanmwarki Demihtrius pwutak ahpw ntingihada kisinlikou kiset sang ni deke kan en Krihs ong Samworo Lapalap oh kepina en mehn Suhs kan oh ong wehio pwon:

“Rahnmwahu sang Nanmwarki Antaiokus ong Samworo Lapalap oh kepina, oh ong mehn Suhs koaros. Nin duwen amwail mwangih me aramas suwed kei adihasangehr wehin ei pahpa kahlap ako. I koasoanedier I en pwurehng repenpwungiong oh onehda sapahl eh manaman. I kapokonepenehr lapalahn karis ehu sang wehin liki kan oh wiadahr sohp en mahwen kei. I koasoanedier I en mahweniong wehio oh irail kan me kamwomwalahr kahnimw tohto kei oh kauwehla sahpwo.

“Eri met, I kasaledekihkumwaillahr sang pwain daksis me nanmwarkien mwowe ko ketikihongkumwailehr. I kamanalahr kumwail en wiahda pein noumwail mwohni kan oh doadoahngki nan amwail wehi. Serusalem oh Tehnpas Sarawio pahn kasaledeksang pwain daksis. Tehtehn mahwen koaros me kumwail wiahda oh wasahn poadoandoar kan me kumwail kauwadahr oh mihmi nan sapwamwail pahn mihmi pahn amwail manaman. Oh pil amwail pweipwand ong wehi, me kereniongehr lelohng kumwail, met pil kasohralahr douluhl. Ni ei pahn pwurehng alehdi manaman pohn ei wehi, I pahn kihong kumwail, amwail wehi, oh Tehnpas Sarawio wahu laud ehu me pahn sansalohng sampah pwon.”

10 Nan pahr 174,
 PAHR 174: Sounpar wet pahrekiong pahr 138 mwohn Krais.
Antaiokus mahwenionng wehin eh pahpa kahlap ako. Sounpei tohto iangala eh pali, kahrehda me malaulau luhwe rehn Tripo.

11 Antaiokus eri pwakihala Tripo, ih eri sopolahng ni kahnimw Dor, me mi ni oahroahr, 12 ni eh esedahr me e milahr nan apwal laud, pwehki nah sounpei kan ar tangasangehr. 13 Antaiokus eri mahwenkihong Dor sounpei koahiek 120,000 oh sounpein dak oahs 8,000. 14 E pil mahwenki were sohp ko, oh kapilpene kahnimwo oh kahpwalihala douluhl me kahrehda sohla aramas emen kak pedolong de pedoisang loale.

Mehn Rom Sewese mehn Suhs kan

15 Ni ahnsowo Numenius, oh irail kan me iang ih ahpw leledohng Serusalem sang Rom wa kisinlikou kiset me doakedoake nanmwarki kei oh wehi kei: b 

16 “Rahnmwahu sang Lusius, sounkaweidpen mehn Rom, ong Nanmwarki Tolemi. 17 Pwihnen meninkeder ehu sang kompoakepahtail oh iengatail mehn Suhs kan leledohr reht pwe re en onehda sapahl inoun minimin oh ehupene me wiawidahr mahs. Samworo Lapalap Saimon oh mehn Suhs kan me kadariraildo, 18 oh re wa kohdo kisakis ehu me iei mehn sansar kohl ehu me uwen toutouwih elep en ten. 19 Eri, se koasoanedier se en pakairkihong nanmwarki kan oh wehi kan pwe re en dehr wiahiong mehn Suhs akan, ar kahnimw kan, de ar wehi mehkot suwed ni mwohmw ehu sohte lipilipil. Re sohte pahn mahweniong irail de utung wehi kan me pahn mahweniong irail. 20 Se koasoanedier me se pahn kolokol mehn sansaret oh nekinekid mwahu. 21 Eri, ma aramas emen me kin pangala eh wehi pahn sopohsang Sudia oh kohwei rukula nan sapwamwail, kumwail pahn pangohng Samworo Lapalap Saimon, pwe en kak kaloke irail nin duwen kosonned en mehn Suhs.”

22 Lusius pil wiahda soangen kisinlikowohte ong Nanmwarki Demihtrius, ong Attalus, Ariareidihs, oh Arsakihs, 23 oh pil ong wehi pwukat: Sampsamihs, Saparta, Delos, Mindos, Sision, Karia, Samos, Pampilia, Lisia, Alikarnasus, Rohdes, Pasihlis, Kos, Saide, Aradus, Kortina, Naidus, Saiprus, oh Sairini. 24 Pelien kisinlikou wet pil pekederlahng Samworo Lapalap Saimon.

Antaiokus Keisimen Mweisang Saimon

25 Keriapak en Nanmwarki Antaiokus eh mahweniong Dor, oh e mahmahweniong ahnsou reirei. E wiahda pasapas en mahwen kei, oh silehdi wasa kan me kahrehda Tripo oh nah sounpei ko sohla kak pedolong de pedoisang nan kahnimwo. 26 Saimon eri kadarala sounpei koahiek 2,000 pwe re en sewese Antaiokus, iangahki silper oh kohl oh pil tehtehn mahwen tohto. 27 Ahpw Antaiokus sohte ale dipwisou pwukat, e pil kasohrehla inou me e wiahiongehr Saimon, oh wiahla en Saimon imwintihti. 28 Antaiokus eri kadarala Adenopius, sapwellime lapalap likilik, pwehn wiekupwuriong Saimon. E ahpw ndaiong Saimon, “Komwi kolokolehr kahnimw Sopa, Keser, oh kelen mahwen me mi nan Serusalem, kahnimw pwukat kisehn ei wehi. 29 Komw mahweniongehr sahpw pwukat oh kahpwalihala. Komw pil kalowedier wasa tohto nan ei wehi. 30 Eri met, komw pahn kapwurehdo kahnimw pwukat me komw kalowedier, oh mwohni en daksis kan me komw rikasangehr wasa kan me komw kakaunehr likin wehin Sudia. 31 Ma komwi sohte pahn kapwaiada met, eri, komwi pahn kihong ie paun en silper 30,000, oh pil kapatahiong paun en silper 30,000 pweinen wasa ohla kan oh daksis kan me sohte pweipweila. Ma komwi sohte pahn kihda pweipwei riau pwukat, se pahn mahweniong kumwail.”

32 Ni Adenopius eh lellahng Serusalem oh kilangada duwen lingan en tehnpesen Saimon, dahl kohl oh silper kan me e kin doadoahngki, oh soangen dipwisou lingan teikan, e inenen dahkihla. Ih eri padahkihong Saimon duwen mahsen en nanmwarkio, 33 Saimon eri sapengki, “Saikinte pak ehu se adihada sahpw ehu sang nan wehi teikan de adihada mehkot sang aramas teikan. Ahpw ihte se kapwurehdo wasa kan me se sohsohki sang at pahpa kahlap ako, sahpw akan me at imwintihti kan adihasangkitehr ni mwekid sapwung. 34 Met se nannantihongete se en kapwurehdo at sohso kan. 35 Ong Sopa oh Keser, me komwi mahsanih me sapwellimomwi, se pahn patohwanohng komwi paun en silper 6,000, se pahn mehndahkihla duwen kahpwal laud me tohn kahnimw pwukat wiahiong at wehi.”

Adenopius sohte sapeng,
36 e ahpw pwuralahng rehn nanmwarkio nan eh lingeringer kowahlap. Ni eh padahkihong nanmwarkio dahme Saimon koasoia, oh pil koasoiaiong duwen lingan en tehnpesen Saimon oh soahng kan me e kilang wasao, nanmwarkio eri engiengda kowahlap.

En Sohn eh Powehdi Sendepius

37 Ni ahnsowo Tripo iangada sohp pwoat oh sopolahng ni kahnimw Ordosia. 38 Nanmwarki Antaiokus eri idihada Sendepius pwe en kaunda sounpei kan me mi limwahn oaroahr kan, e ketikihong sounpein nansapw kei oh sounpein dak oahs kei, 39 oh mahsanihong en mahweniong mehn Sudia kan. E pil koasoanediong en onehda sapahl kahnimw en Kedron oh kakehlahda ewen kehl kan, pwe en kak mahweniong mehn Suhs kan. Eri, pein nanmwarkio ahpw usehla eh pwakipwakih Tripo.

40 Sendepius eri kohla Samnia oh tapihada kahpwalih mehn Suhs kan ni eh mahweniong irail, kalowehdi aramas akan, oh kemeirailla. 41 E onehda sapahl Kedron oh kihdiong sounpein dak oahs oh nansapw kei wasao, pwe re en kak peiong oh silehdi ahl akan me kolahng Sudia, nin duwen me nanmwarkio mahsanihong.

Copyright information for `PON2006A